徐子珊撻傷大陣癱瘓10分鐘
徐子珊前晚於電視城拍劇發生意外，着住5吋高踭鞋跣腳向後倒地，「櫈」親「大陣」尾龍骨，當時她有十分鐘痛到不能郁動只爆喊，即急call白車送院，拍檔黃子華親自陪同，痛楚萬分的子珊需坐輪椅，經照X光後慶幸沒有骨裂，但不能出席昨日的新劇拜神。而子華則內疚因看見地下成攤水未有即時處理，結果釀成今次意外！
正忙於新劇《My盛Lady》拍攝的徐子珊，前晚與黃子華於將軍澳電視城開工，劇情講子珊拿水杯潑向對方，沒料穿上5吋高踭鞋的她，不慎因地上一攤水而跣倒，結果整個人向後翻兼撻落地，子華及監製文偉鴻等人即表現緊張，上前慰問，惟躺在地上的子珊不斷哭泣，還面露痛苦表情，在場保安見狀即電召救護車到場，並由子華及監製陪同到將軍澳醫院。
照X光尾龍骨冇裂
由於已是凌晨時分，醫院急症室只有寥寥數人在輪候，故坐在輪椅上的子珊，很快便接受醫生診治，經X光檢驗後，證實子珊尾龍骨並未有骨裂，但為免再弄到傷處，建議她不要多走動，乖乖在家中休養，眾人隨即鬆一口氣，及後子珊由經理人推住輪椅離開，見子珊上車時動作緩慢，一副小心翼翼模樣，子華則輕搭其膊頭謂：「你take care嘞！」
子華陪子珊到醫院，不時安慰她不用擔心。
子珊經照Ｘ光後無大礙，由經理人送回家，子華亦着她多休息。
子珊與子華密密傾。
上車時，子珊小心翼翼。
原定子珊昨日出席新劇開鏡，因受傷而缺席，在家休養的她接受電話訪問，直言意外發生後，整個人也動彈不得，她說：「真係好驚唔知會點，咪喊囉！好在醫生話冇骨裂，但個位就腫咗，開咗消炎藥，不過跌落地嗰吓因隻手借一借力，結果手腳都拗親，依家要喺屋企休息，盡量唔好周圍走。（之後仲着高踭鞋拍？）都要連戲，不過會小心啲，同埋唔想請咁多假，影響拍攝進度就唔好。」據知，子珊將於今日復工。
意外一刻簡直嚇死
而子華、陳敏之、高海寧、陳嘉佳（小寶）等昨參與開鏡拜神時，對子珊意外受傷，眾人均送上祝福，希望她早日康復。有份陪子珊入院的子華，坦言意外一刻簡直被對方嚇死，他說：「當時全廠靜晒，佢凌空咁跌，成10分鐘郁唔到，又係咁喊，好在X光睇到冇咩事。（會唔會影響生仔？）唔敢提，休息吓應該冇事，原本今日打算同子珊公布組情侶合唱團雙『子』座，我咁耐未試過登台，叫佢表演歌舞，我打拍子。（拜神前就出事？）之前好順利，係咁啱。」子華更指對事件感內疚，他謂：「事前我見到攤水冇為意，諗住拍埋先處理，點知出事，第時大家見到有問題要處理先，有事就難以挽回。」
昨日子華與小寶表現老友攬住影相，問到會否擔心被指鹹豬手？他笑謂：「我又唔會話冇意嘅，之前抱敏之手臂痛三日，就係因為驚鹹豬手，對手要特別就位，有時可能真係要鹹豬手，一陣跌落地仲慘。」
文：影視組
攝：追蹤組
監製文偉鴻：劇集拍攝冇影響
目擊子珊發生意外的《My》劇監製文偉鴻，昨於活動上講述事發經過，透露前晚於公司拍攝一場子珊向子華潑水戲，期間有水反彈濺在地板上，子珊不慎跣腳，繼而整個人向後跌pat pat落地，初時不能動彈，後來他聯同子華陪子珊入院，幸而照X光後尾龍骨沒有大礙，但由於子珊感到痛，所以暫放兩日假休息。文偉鴻更謂：「到時睇吓進度情況點，不過今次都唔影響到套劇拍攝，之後會補拍番。（補戲要唔要改劇情？）呢個就要再度。」
容易受傷的花旦
巾幗不讓鬚眉，女藝人開工時亦唔錫身，由於過分拚搏，因而令自己傷痕處處，有些更嚴重得要送往醫院求醫。
陳敏之
「索腿天后」陳敏之於拍攝劇集《公主嫁到》時，因經常戴古裝頭飾，不勝負荷而造成頸椎移位。其後為劇集《怒火街頭》拍攝裸跑戲時不慎跌倒，引致左邊鎖骨斷裂。
葉璇
葉璇於2006年演出亞視劇集《情陷夜中環II》時，因她太投入拍一場刺殺戲，竟不慎被自己手持的牛肉刀插傷大髀內側，送往醫院縫上六針。
葉璇
朱晨麗
朱晨麗
去年11月，前港姐冠軍朱晨麗綵排台慶跳舞表演時，不慎弄傷腰，後來看醫生後證實其盆骨移位，需做物理治療和電療，認真慘情！
fit爆高Ling：着高踭鞋開工小心
以性感裝束亮相的高海寧（高Ling），盡騷減肥後成果，透露打扮乃戲中造型，更指今次飾演o靚模，戲服大多是性感兼露腰，故開拍前花了兩個多月時間，倣效陳豪的戒油、鹽減肥法，結果一下子減了10磅，令她非常開心。問到角色要不要色誘黃子華，高Ling笑謂：「唔使，戲入面我好單純同天真。（知唔知徐子珊發生意外？）睇新聞先知佢出事，我今次都要着高踭鞋，所以會小心啲，呢套劇拍攝氣氛好好，希望佢快啲好番歸隊。」
葉翠翠「盛女」望仔追
而葉翠翠對於近日被指搭上波子闊少，直言對方並非男朋友，更謂：「嗰日只係朋友揸車接埋我，佢係普通男仔，又唔係追我，都唔知會唔會同我絕交。」翠翠慨嘆追求她的異性首要條件是大膽，坦言曾有異性獲悉她是藝人便沒有再聯絡，白白錯過不少機會，雖然如此，但翠翠表示不會因此放棄事業，更謂：「我呢個年紀同人交往吓好正常，唔介意畀人影到，我都係『盛lady』嚟o架！」
黃子華攬實小寶，不怕被人話鹹豬手。
葉翠翠（左）與王君馨拍《My》劇好開心。
不會影響生育
對於徐子珊穿５吋高跟鞋拍戲時跌倒，恐傷及尾龍骨，家庭醫生關嘉美表示不會影響生育和引致併發症，她說：「因為個位置唔會壓到神經線，亦都唔會影響生育同有併發症，只係傷者行路同瞓覺時會感到痛楚。」關嘉美又表示傷者可打止痛針或吃止痛藥減輕痛楚，但因吃藥會傷身體，故可以塗消炎藥膏至患處，同時又指傷者在坐下時可以水泡和咕o臣墊着。問到要連戲需再穿高跟鞋，關嘉美表示只要子珊一切小心，應該沒太大問題，又說：「其實佢捱得痛，可以唔使休息就開工，反而仲可以分散佢對於痛楚嘅注意力。」
拍劇生意外 嚇窒子華
子珊跣腳撻地爆喊入院
■子珊前晚拍劇時跣倒，在子華護送下入院。
無綫新劇《My盛Lady》拍得如火如荼，可惜前晚發生意外，徐子珊要請病假缺席昨日的開鏡拜神儀式。事緣子珊、黃子華及陳敏之前晚在電視城錄影廠拍攝，劇情講述子珊用水潑子華，怎知水反彈到地上，穿上高踭鞋的子珊差錯腳跣倒，凌空飛起再撻在地上，由於尾龍骨落地，子珊當時痛到喊，劇組即電召救護車，在經理人Candy、助手、子華及無綫保安陪同下，將子珊送往將軍澳醫院。子珊經理人Candy昨日透過電話說：「照咗X光，好彩冇事、冇骨裂，醫生叫子珊唔可以行太多，寫咗幾日病假畀佢，要佢暫時休息，子珊已無大礙，喺屋企休息。」
《My》劇昨日在電視城舉行開鏡拜神，監製文偉鴻指子珊請病假休息幾日，不會影響進度，但該場戲要補拍。子華則坦言被子珊嚇死：「全廠靜晒，因為子珊有十分鐘講唔到嘢、郁唔到，淨係喊，好彩冇事。」這樣一跌，會否影響生BB？子華即說：「嘩！提都唔好提！之前都好順利，拜神前就有意外，好驚，但我相信係小意外。」
高海寧降Cup
開鏡中，高海寧以性感推銷員造型示人，露事業線及小蠻腰，提到瘦了不少，高海寧說：「為咗呢個角色，我瘦咗8至10磅，上圍都降咗一cup。」最搞笑是細細粒陳嘉佳從後攬子華，子華笑說：「好強大靠山，背山面海！」子華攬細細粒時似觸及女方胸部，他笑說：「我唔會冇意。」至於被指搭上闊少的葉翠翠，否認有新男友。
採訪：黃曉妍
【C女郎】
■高海寧昨日露少少事業線及小蠻腰，相當消暑！
攝影：黃偉雄 
■細細粒熊抱子華時，不禁露出冧樣。
留言列表
