面對面
舒服幾年沉幾年 雷頌德
係咁意數數雷頌德 21年來作曲、編曲、監製的音樂作品，維基百科紀錄在案的，已經多達 900多首，將近一千。
係咁意望望 20多年來經雷頌德打造的歌手與曲目，黎明郭富城陳慧琳鄭秀文楊千嬅彭羚林憶蓮許志安等等等等，原來雷生出品，每年閒閒哋有十首八首跑出，我們大家都識唱。
難怪下月 21日將在紅館開鑼的三場《 Thank You》演唱會，目前最頭痕的是嘉賓出場序以及曲目安排，係咁意都可以數出百幾二百首大 hit金曲，要精選三十首嚟開騷，你話點揀？
宏觀咁睇， 42歲、有能耐搞番個一呼百應的致敬演唱會，何其風光、何其榮耀？
倒帶回望，查實抄襲、老土、商業、冇新意、冇料到，道個獨領三晚風騷的音樂教父，過去二十年，哪有一天不被插？
「十幾廿年從來冇停過俾人插，你話我江郎才盡，我咪諗計改變繼續學習囉。識變，就總可以等到個機會再爆，爆完，又舒服得幾年，舒服完幾年，咪又輪到你沉囉……做人，咪就係咁咋嘛。」
舒服吓、沉吓，有人踩、又有人當你神咁拜，做音樂，咪就係咁咋嘛。
賺錢買衫
正職做音樂，兩年前兼營副業、時裝品牌「 Coolday,SIR」創辦人兼設計師，「撈偏」風生水起的雷頌德，其實讀書成績亦優良，中學在名校聖保祿男女中學畢業，大學在倫敦帝國學院讀土木工程，做音樂，簡單來說是機緣巧合，真正目的，則是搵多些少去買靚衫。
「我從小鍾意音樂，又喜歡時裝。中二三開始，自己夾 band玩音樂，亦都自己買衫襯衫，平時零用錢加埋補習賺返嚟嘅外快，一概用晒喺銅鑼灣名店街買衫，平時喺學校，就最鍾意鑽研 fashion書。」
年紀輕輕就寧願食少餐 lunch慳番個錢買衫，別人小息打波打到身水身汗，他就躲在座位上看時裝雜誌，這個畫面，無可否認，都幾乸型。
「係㗎，係乸型㗎，不過我好細個就百分百肯定自己淨係鍾意女仔，我啲女神都係八、九十年代班超模， Cindy Crawforld、 Yasmine Le Bon……以前嗰啲 model先至真正稱得上超模，樣靚身材正，幾時行出嚟都咁靚。𠵱家，生得怪身材又唔太好，仲成日俾人影到啲唔靚嘅一面，唔知係唔係因為𠵱家狗仔隊多呢……」
中學年代，既會玩音樂，亦會自己畫圖設計時裝，結果走進音樂這一行，多得世叔伯黃霑帶挈：「所以話，一個人行條咩路，同身邊嘅人與事息息相關，我跟得霑叔多、見得明星多，知道做音樂可行。入得行，我就話畀自己聽一定要得，因為我為呢行放棄咗好多嘢，青春、前途、父母祈望。唔衰得亦係因為我鍾意靚嘢靚衫，想要擁有佢哋。我𠵱家教兩個仔都係咁講，做人應該要有目標，想過奢侈嘅生活，就唔該你努力啲。」
巨星炮灰
師承霑叔，做過電影配樂；又夾過 band，與馮德倫合組過 Dry；拍過電影開過公司，雷頌德最大的成就，不用多說，肯定是作曲人與音樂監製：「以一個幕後人嚟講，雖然仲有好多嘢想做未做，不過做到咁，已經好滿意。不如咁講，假設我呢一刻玩完，無憾！」
話雖無憾，其實還是不多不少夾雜着些少遺憾。下個月的演唱會，最合作無間的巨星兼老友黎明、陳慧琳當然要唱足三場，然後還有不少一手捧紅的和現役同屬東亞旗下的，唯一猜不到，是歌手名單上的羅敏莊：「做製作人，係要推佢嘅特質出嚟。做監製寫歌，要畀啱嘅歌佢唱。我哋做人要計數，開戲寫歌要計數，但係冇 formula擔保你一定紅。我都有好多歌、做過好多人，得唔到預期效果。羅敏莊出道時我幫佢做過幾首歌，我曾經真心覺得〈挑戰者〉可以跑出，亦認為羅敏莊好有機會，結果事與願違……當年跑唔出，十幾年後先俾人發覺佢唱得、仲有一首歌叫〈挑戰者〉。霑叔講過，呢個世界冇懷才不遇。你首歌係好、你個人係好，一定有出頭嘅一日……所以我今次會請羅敏莊。」
捧人路上，有紅有唔紅，有些則是因為個人原因離開香港。雷頌德舉了 03年一手發掘的側田做例子，說明自己和側田是兩種人：「佢離開香港北上發展，唔係因為香港搵唔到錢，係佢唔識同傳媒溝通，成日講錯嘢。換着我，一定唔會走，既然我嘅歌有人鍾意，點解要走？我都試過難行，但永遠唔會去到要抉擇做定唔做、走定唔走嘅階段。人哋從來冇停過話我抄襲、作曲冇新意，我冇得唔介意，當電台真係開始唔播我啲歌，唔到我唔介意，既然介意就要諗方法變。打擊還打擊，人唔會永遠都耷，耷嘅時候一定要識得爬番起身，唔係就真係 bye bye㗎啦。所以我好鍾意見到啲運動員 come back嘅體育精神。好似碧咸，踢錯一腳，一沉百踩，俾人鬧咗幾年。好似 Tiger Woods，早年風光，前兩年婚變樣衰到咁，佢哋兩個咪又係可以上番嚟？肯變，就可以等到機會再爆一次，一爆，咪又有得舒服多幾年囉！」
6月 21至 23日，紅館，《 Thank You雷頌德演唱會》， Leon、 Kelly義不容辭傍住左右：「香港人𠵱家太多怨氣，郁啲就鬧郁啲就賴，我想提提大家，要有番個感激之心。」 
早前在改革後的《勁歌金曲》接受旦哥訪問，雷頌德說：「香港下一個 superstar我見唔到，呢幾年嘅歌又噏唔出名，佢哋冇實力、冇自信，點做 superstar？」 
96年與馮德倫合組樂隊 Dry都叫紅過，可惜出了三張碟後拆夥：「唔係不和，係我哋各自有各自理想，佢鍾意電影，我想專注搞音樂。」《壹週刊》圖片
中學年代已經畫圖設計衫，雷頌德的時裝夢兩年前完成，興朋友創造男裝品牌「 Coolday,Sir」，還自己充當設計師。 
詞界有林夕、黃偉文，作曲界各台各機制作曲、編曲、監製大獎則多年都是雷頌德的囊中物。《蘋果日報》圖片
活動教
學
07年，雷頌德與模特兒女友梁家玉結婚，翌年產下一子，三年後，又生下幼子。雷頌德說，不管教育兩個兒子、還是對着現實正在培訓的東亞新人，都是一套方法。
「為人父母，其實好矛盾。見佢平庸，怕佢哋第時唔夠競爭力；發現佢有特長，又怕佢哋未能發揮到最好。最終我總結到一個道理，做人一定要有目標，入得呢行就一定要想紅，但係最重要，係按部就班。喺每個階段，好好完成你嘅份內事。小朋友，乖乖哋食完呢碗飯、用心做好功課溫好書；歌手，我唔該你就專業啲，喺錄音室用心錄好首歌，上電視前，諗定着咩衫、唱咩歌就要準備充足。好多歌手，去 TVB參加人哋節目，嫌時間短，又嫌唔係唱自己歌……一係唔好參加，一係就唱好佢，你 hea住唱人哋睇到㗎！唱歌唔好都算，你係賣靚仔賣潮，唔該你哋就 keep住最佳狀態，又唔係囉……蘇永康咁次次行出嚟都對得住個潮人身份！有啲人攞唔到獎，都唔需要抨擊個頒獎機制。個個傳媒都話自己最權威最公正㗎啦，個個廣告都讚自己最抵食最好味㗎啦，但事實係點？有冇內情？係人都知㗎啦！個遊戲規則係咁，你一係就唔好玩，係玩，就諗吓自己點樣適應！」
唔使估，大家都應該明雷頌德最後指的是年頭鬧過商台的 G.E.M.。雷頌德說，現今的香港歌手沒實力沒信心，少數有料有信心有機會可以成為明日之星的，就是 G.E.M.，不過，玩遊戲，請遵守遊戲規則喎。
當年與張燊悅拍過七年拖，又曾經情侶檔演出過電影《求戀期》。雷頌德說自己是幕後人，其實電影演出亦不少。《壹週刊》圖片 
雷頌德 07年與模特兒女友梁家玉奉子成婚，除了兩人所生分別五歲和兩歲的兒子，雷頌德妻子與前夫所生兒子亦視如己出。
音樂超人
做了父親以後，雷頌德很喜歡邊陪兒子看電影、看動漫，邊深入淺出藉着動漫電影說道理。
雷頌德在訪問末段說，動漫和電影裏總是有超級英雄救地球，現實世界，卻總是見不到超人和鋼鐵俠。
「唔係以前嘅樂壇好，係𠵱家樂壇愈嚟愈差。我想做超人，喺仲有氣力嘅時候，出一分力，救個樂壇。」
你唔好藐，人哋唔係得把口，過去二十年人哋真係起碼出過九百多分力。
留言列表
