明愛校內的民主牆是一班明愛社運鬥士的流連熱點。現於校內跟小明共同作戰的同學約有 11人，但上週三採訪當日，只有 6名學生到場！ 

Main Camp

箍胸誹謗嚇唔走　明愛學運新星繼續抗爭

早前特首梁振英到調景嶺明愛專上學院出席國際會議，示威學生與警方展開大混戰。一幕男督察「熊抱」、「胸襲」示威明愛女學生，惹來市民圍插，質疑點解唔用女警驅散女示威學生。
而「熊抱」女主角、現讀明愛社會科學系 Yr.1的何潔明（小明）亦成討論焦點，雖然輿論對她有讚有踩，更甚有網友人身攻擊，但孖生家姐是新進學運女神何潔泓的小明，卻情願把個人榮辱放埋一邊，與志同道合的同班好同學組織搞學運，由在學校吹雞到上街示威都以明愛學生排頭行先，學運女神更加唔稀罕做！

何潔明被警方胸襲，並沒有阻到她對社運的熱誠，他在 fb留言：「我們只會繼續勇敢地手挽手，義無反顧地以身軀阻擋！」 

自「明愛 516」事件發生，報紙、電視鋪天蓋地報道何潔明（小明）被男督察胸襲，上週三（ 22日）她及明愛五位社運新勢力接受本刊訪問。小明仍然有火說：「仲有冇人記得我哋當日爭取啲咩？係反加學費呀！大家只會討論我俾警察抬走，𠵱家因為啲枝節嘢錯晒 focus，所以我先唔想出名！」

紋身大平反

「愛港力」咩到插，就連小明右臂上的紋身，都被對方指有紋身等同做援交，小明只淡淡回應：「佢哋成日話我哋唔理智，𠵱家邊個唔理智，一睇就知！我紋身只係貪靚！」

家人阻我唔到

小明於 10年參加反高鐵苦行，開始了自己的社運路。之後支援菜園村居民，要求全民退保等，她亦走在最前。 

不想學孖生家姐何潔泓般成為學運女神，小明對於私人事亦不願多提，只肯說父母對兩姊妹參與學運大力支持，「由細到大，父母都會帶我同姐姐去六四燭光晚會、七一遊行，令我同姐姐會關心社會，不過今次屋企人見到都好擔心，驚我受傷，但佢哋知我做嘅係啱嘅，更加知阻唔到我，我覺得就係要趁後生先可以企咁前！」勇於表達訴求，卻有「愛港力」網民兼轉移視線轟小明有紋身等同做援交，難得她仍能一笑置之：「其實都慣晒，當笑話咁聽就算，搞社會 EQ要夠高，唔係點繼續落去！」

社運孖妹

小明與學聯副秘書長何潔泓是孖生姊妹，兩人同樣活躍於社運界，上年立法會選舉兩人就替社民連的陶君行助選，成為新一代社運 icon！

學生會冷感

其實明愛專上學院這股學運新力量，除了小明外，其實還有 11名同學一齊搞抗爭，他們除在 fb就不同議題吹雞，更在校內舉行展覽，簽名運動等，出心出力只因校內學生政治冷感。另一活躍分子傅威翰（ Crazy）直言：「明愛嘅同學對政治好冷淡，我哋搞聯署，成間學校都得幾十人肯簽名。學生會又淨係識搞歌唱比賽，完全唔帶領同學關心社會。今次 516事件特首雖然冇理我哋，但起碼身邊同學都會關心呢件事。」 Crazy說當日特首到訪，學校竟然禁止同學進入校園，才會令他們如此激動：「其實我哋當日唔係想咁激，但係校方竟然連同學都唔畀入，封埋個民主牆，警方又先主動包圍我哋，我哋嬲得滯先會咁做， CY肯停低聽我哋講就唔會咁混亂，我哋𠵱家要求校長公開道歉。我想話畀大家知，唔一定喺八大先可以搞社運囉！」

戰友：預入黑名單

不是每個社運戰士都可像小明一樣獲得家人支持。同樣熱衷社會運動的葉志衍（ Sammy）（右一）參與過各項示威，卻因經常上街遊行而和父母面阻阻：「食飯嘅時候屋企人喺電視見我行得咁前，都會嗌交。我媽媽嘅生日同母親節願望都係想我唔好再搞社運，不過我都知佢哋緊張我，而且好多親戚都有畀壓力佢哋。拜年嗰時啲親戚都會問我：『唔使去遊行咩？』其實我都預咗入黑名單，而且理念唔同，點都唔會打政府工。」

雖然相識不足一年，但 Sammy都經常相約一班明愛仔一同參加遊行，亦會在校內舉行大大小小的展覽、宣傳等，希望今同學更關心社會，一班人好團結。 

中胡椒兩年前開始參加社運的 Sunny，試過菜園村靜坐，上年特首選舉，他亦有上街示威，甚至遭警方用胡椒噴霧驅趕，事後要用清水洗眼。 

珠海妹大胸遭攻擊

除了何潔明被網友惡意攻擊，早前撐碼頭工人的苦行示威中， 19歲現讀珠海書院新聞系 Yr.1的辛兒璁（辛辛）就因冇心將斜孭袋放在胸間，因而將自己的上圍凸顯，即俾網友指她「有居心」、「博出位」、甚至用「核彈胸」、「波大冇腦」來形容。不過辛辛一樣企硬，唔向網友屈服：「我都冇做錯啲咩，我亦唔覺得有咁嘅身材有咩好處，不過我會企硬堅拒穿大碼衫兼繼續孭斜孭袋。」

辛辛初次踏上社運路就遭人惡意攻擊，有高登仔甚至將她與𡃁模合照合成，在網上瘋傳！ 

早前辛辛接受《蘋果日報》訪問，而是玩社運的男朋友亦出有面撐場！ 

Main Camp：

Main Campus簡稱，意即主校園，各大專潮人潮事當然離不開 Main Campus。

撰文：校園組
攝影：何榮亮