花式跳跳跳Anthony經常喺香港同外國獻技，表演時會着晒成身街頭 look，播埋 rap歌襯底，將 Hip-Hop舞步融入跳繩。

今日好玩嘢

花式跳繩 365

早排昂坪 360搞咗壇「激舞花繩 360」，請到國際知名花式跳繩隊 Saltare Crew遠道由美國嚟香港獻技，引到大班遊客專登搭轉纜車去睇佢哋表演。雖然𠵱家 Saltare Crew走咗，其實大家仍有機會接觸花式跳繩，因為香港都有唔少高手，平日除咗有表演同比賽睇，仲有學校開班教你跳埋一份，到時全年 365日都可以玩花繩。

諗到　發揮創意自由 Jump

花式跳繩，顧名思義就係喺普通跳繩上面加入花式，但到底有冇準則要點玩呢？香港專業花式跳繩學校教練 Anthony話係冇！「基本動作通常包括一啲特定步法、交叉跳、多重跳之類，亦會加入類似體操嘅翻騰動作，但其實成個玩法好 free style，只要有創意，你諗到將條繩點樣玩，都可以係花式跳繩。」而且參與人數亦冇限制，「我哋表演雖會分跳單人繩或雙人繩，不過中間實會轉換表演者，所以一樣會有多人參與，跳大繩的話，人數更可能多達幾十人。」花式跳繩絕對係一種集體運動，唔只一個人單獨跳咁簡單。

3大基本花式

交叉跳單人跳時一隻腳提起，只用另一隻腳跳，做到凌空咁左右腳交叉咁跳。

多重跳兩個或多個人同時跳，大家嘅既繩仲要互相 fing過其他人身體。

交互跳兩條繩同時交互舞動，視乎繩長度一人或多人喺中間跳。

比賽　鬥快鬥難度

大家學成之後，梗係想喺人前獻技。 Anthony話佢間學校會不定期派學員去唔同活動表演交流，香港亦有唔少比賽可以參加；達到一定水平的話，仲可以向香港花式跳繩會申請資格，代表香港出戰海外賽事。「比賽通常分兩種形式，一係 speed，即係喺限時內跳得鬥多鬥快；另一種係 free style，參賽者要自己編排成套動作，評判就好似體操咁根據難度、創意等因素去決定邊隊贏。」

早排香港專業花式跳繩學校亦派出 100人隊伍，喺昂坪 360活動入面同 Saltare Crew一齊表演過，仲憑住 48人同時跳大繩刷新健力氏世界紀錄。

Anthony話花繩最好都係自細學起，所以佢課堂學員細至小學生都有，佢亦有去唔同中小學開班，同時都有成年人包堂學跳。

花繩種類

棉繩冇手柄，長度同物料都同一般大繩差唔多，多人跳嗰陣先會用。約$100

速度繩花繩一般都會跳膠繩，貪佢速度比普通棉繩快，可轉動嘅手柄亦方便做花式。約$60

鋼絲繩速度比膠繩更快，但打中身體會好痛，高水平玩家先啱用。約$160

拍子繩有單人繩或大繩長度，繩身套上唔同顏色膠套，打落地會有聲，令玩家更易掌屋節奏，觀眾亦更易睇到條繩。約$60-$130