180cm型男 Dominic肌男首度出戰拍寫真，身高 180cm的 Dominic話緊張到發惡夢：「本書又要影床照又要整甜品，早幾日發夢見到自己冇着衫着住條圍裙整甜品呀，完全接受唔到呀！哈哈哈！」
小報告
肌男出擊 '13寫真書戰率先爆
好快又到 7月水着季節，大班 模磨拳擦掌迎接寫真大戰，倒奶噴血寫真唔少得之餘，新血嘉欣 BB同餅女 Miki（楊愛謹）事先張揚以三點式搶灘，純女鬥剝模。
咪以為寫真淨係關電車仔事，今年連嫩口男模都加入戰團，周秀娜師弟 Dominic、 King同顧又銘分別晒胸肌晒床照，連姊妹市場都殺埋，今次真係大混戰。
Dominic女友糖妹今年唔出寫真似避猛男風頭， Dominic硬撐：「佢大把 fans啦，今年輪到我都得啩！」
跟糖妹偷師
Dominic同阿 King話本身已拍戲唱歌，唔需要靠出寫真增加知名度：「只係想大家知道我哋有另一面優點，多方面發展啫。」
首次影寫真的 Dominic同阿 King上週二（ 21日）接受本刊訪問，他認為香港好應該有少男寫真：「韓國、日本、美國都有男仔寫真啦，以前謝霆鋒、 BOYZ都出過，近年冇咗因為女性泛濫，娛樂圈或 model界嘅女仔好吃香。但係女仔市場呢，老闆話係時候照顧吓女性市場，女仔都好有消費力㗎！」
𡃁模出寫真不時遭白眼，甚至被書展職員趕離場， Dominic則表示不怕被人當𡃁模：「我唔認為𡃁模呢個名稱有貶意，係好 fresh、好 green嘅，唔代表唔專業。而且唔會有人叫男仔做𡃁模啩，就算要標籤我哋亦唔介意嘅，俾人標籤係好事嚟！」
翻版曉明顧又銘
現時身處北京的顧又銘，連英文名都索性叫「 Gym」，擁有 42吋胸肌又自稱拍寫真冇底線，仲預告會全裸添！ 
顧又銘有「爆肌黃曉明」之稱，亦是王菲在北京的私人健身教練，早前演出過「型男爆肌騷」而被周秀娜經理人 Roy睇中。
A&F肌仔 King
上月 King拍電影《爆 3俏嬌娃》期間急性胰臟炎入院：「每日飲 3杯大隻奶粉原來會物極必反，𠵱家唔敢再食，又諗住唔食澱粉唔食油，後來發覺自己唔夠肉呀，𠵱家要食番少少飯同肉，同埋 keep住做運動囉。」 
40吋胸肌趙勁皓去年由 A&F騷肌猛男殺入男模界，當時日日有女仔要求又攬又摸胸拍照，他說：「慣咗唔會再尷尬！」
同志頂得順
Dominic的寫真要賣萌樣及拍露點床照，他說有向女友糖妹偷師：「糖妹其實係扮 model啫，我係學佢可愛嗰方面，努力去試咋！佢都唔會呷醋嘅！喺我角度嚟講，有男仔攬住佢本書嚟錫，我反而會開心！」
而 40吋胸肌的阿 King，在寫真集內更會教做 gym：「公司話要露股，但好難做做吓 gym露股喎，所以健身嗰 part唔會，床照生活照就可以大膽啲， underwear咁，全裸我未必。我哋出男仔寫真因為女仔（寫真集）已玩到極限啦，男仔可能唔使一開始就咁大膽，留番啲下次嘛！」
少男騷肌，難免惹來基民垂青， King就大方話：「從來唔抗拒佢哋，身邊有一大班同性戀朋友，買我哋本書當然歡迎啦，就算遇瘋狂 fans，憑我哋嘅身形應該應付到嘅！」
收山師姐
去年𡃁模寫真競爭激烈，嗌交、阻街互寸乜都齊，去年是非多多的 Mia、 DaDa和 Phoebe全部缺陣，係因為上晒位抑或冇眼睇呢？
DaDa唔再出
DaDa（陳靜）攞咗最佳女配角獎又再做「百果園 E神」，上位成功順便封胸：「今年有 4套戲上畫，寫真就暫時唔會再出。」
Mia要等等
上年以機械人 i-robot造型出寫真的 Mia（陳靜儀）：「 iPhone都未出 iPhone 6啦， i-robot都 upgrade緊，大家稍等， I'll be back！」
Phoebe出到悶
寫真曾被評為二級而被在書展禁售的 Phoebe（許穎），雖然今年冇書出，不過仍寸嘴話：「已經出咗幾次啦，畀啲新人試吓，費事佢哋冇碇企啦！」
翻生 Miki 惡鬥嘉欣 BB
有 3大肌男爭食，純女亦唔執輸，今年寫真戰新入圍的，仲有餅女 Miki和嘉欣 BB，成為亮點。 28歲餅女 Miki（楊愛瑾）入行 11年，去年加盟悅目電影公司及簽約 TVB後，今年重新出發，推出首本寫真散文書＋ EP，惡鬥同樣出處女寫真的 29歲鍾嘉欣。
同是餅女的傅穎及鄧麗欣都在書展苦戰過， Miki要衝出重圍，自言一定要靠突破：「啱啱去完泰國象島影相，𠵱家寫緊本書嘅文章，我一向唔識講嘢，所以呢 10年大家都唔太認識我，我想透過呢本書，令大家認識我，但其實都冇乜參考佢哋（傅穎、鄧麗欣）。」
Miki更稱今次會首度水底影寫真：「我參與服裝方面，影咗廿幾套衫，有三點式，有啲喺水底影嘅，但我唔識游水，仲要扮鎮定擘大眼，啲同事喺旁邊陪住我，但影咗一百張我都係皺住眉，影咗好耐，影影吓我仲學識咗游水添。」
Miki在 Cookies年代曾影過三點式寫真，事隔 10年， Miki話唔想同𡃁模鬥身材：「哈哈！冇得鬥啦！想影健康嗰隻啫，唔想刻意賣弄身材，只能夠盡量唔令自己肥，正常我大約 100磅，去泰國前減到 97磅。」雖然相片趕緊後期未出得街，但有寫真、自傳仲加埋久休新歌〈綿羊〉，算係寫真戰中嘅清泉囉！
去到風景如畫的泰國象島拍攝， Miki話遇到美食都唔敢放肆，要 keep住身形，返香港至大吃大喝。 
Miki今次寫真出盡力，台前幕後都兼顧埋，包括三點式超過 20套衫，又加送新歌〈綿羊〉 EP+MV，抵睇！ 
嘉欣 BB近年接拍纖體廣告愈來愈性感，今年終於正式出寫真，粉絲有福喇！
新女試反應
每年都有新人加入寫真戰，不過唔夠舊𡃁模咁搏，只以性感加 gimmick包裝，打穩咗市場先。
Bonnie宣傳多
Phoebe師妹 Bonnie（梁晶晶）去年入行：「喺 5月尾會出咗寫真月曆先，希望做到一連串攻勢， 7月再出寫真，到時對我就冇咁陌生啦！」
Keiko賣韓風
Bonnie同門的 Keiko首度寫真將以韓風殺入書展：「化啲流行嘅韓國妝，同其他寫真有啲分別囉！影性感相好緊張，我本身比較怕醜，不過作為新人咁快出到寫真都幾好吖！」
Diva初熟格
DaDa師妹 32E上圍的 Diva（許珮榆）首次出寫真：「我唔只想騷身材，想有啲新鮮嘅感覺帶畀大家，希望表現到我初熟嘅一面。」
現場直擊 不死 Donut制服誘惑
剝模出寫真集，個個博做周秀娜、 DaDa咁成功谷上位，年年新血入舊人出。連續第 4年出寫真的 Donut，成員加加減減今年就有 12位𡃁模等上位，而且今年再度玩「妄攝」加制服誘惑，唔噴血唔收貨。
一踏入 5月，新 Donut成員已排住隊影寫真，其中 Elise為了拍妄攝照，她要先穿上護士制服，擺出誘人 pose拍多張照片，攝影師揀定一個最誘惑姿勢後， Elise便要 hold住姿勢讓工作人員 mark好位，然後脫剩內衣影多場，難度幾高。
舊成員 Elise今年 18歲，仍讀緊 F.5，她說今年寫真內容比往年大膽，因為競爭太大：「其實 model個個都係咁，我哋底線已經比其他高，至少有着衫吖！嗲哋媽咪有睇過，話只要唔好過咗火就 ok。我讀緊書，通常放學或者週末影，唔會影響學業，仲有同學組成 fan club添，不過學校應該唔知我影寫真。」她說拍性感寫真只因為愛拍照，將來目標是考入港大法律系，原來𡃁模都有好學㗎！
妄攝是由日本傳到香港，撕開相片露出女模穿內衣的姿態，中晒宅男偷窺的心態。 
12位 Donut成員今次都在香港拍攝，原因是拍過幾年寫真，發覺讀者注重模特兒的外貌和身材多過靚景，倒不如在香港拍攝減輕成本。
Elise扮護士
Donut今年玩制服誘惑，更會穿着制服到相關地點試反應，好似 Elise就會扮護士走入醫院同病人傾偈，拍成片段放上網，製造話題收宣傳之效。
寫真攝影師：蝕都要出
Ronald指現今寫真集大膽露骨已成定律，要贏就要在製作上多花心思，照片要達到 100分至出得街。
舊女剝盡啲
羅彩玲玩造型
同周秀娜舊愛 Avis傳緋聞的 Vivian（羅彩玲），話可能係最後一次出寫真：「今年去盡啲，半裸用手遮胸，又會有啲中性打扮多啲造型，會喺香港同澳門取景。」
蔚雨芯扮神秘
去年出過 cosplay寫真的蔚雨芯，魔鬼巨胸再接再厲，至於有乜新突破暫時要賣關子。
Irene再出擊
Irene（許麗燕）是前 Donut成員，首次單飛出寫真集：「會大膽少少，半裸上身，下身牛仔短褲，如果全裸好似過火咗啲，保留少少想象空間嘛！」
留言列表
