老實說，王君馨是不是處女，真的關你鬼事。因為踏入演藝圈，成為公眾人物，所有私事才變了公事。王君馨由參加選美至得獎後，其實很清楚。她曾經很努力取悅身邊所有人，最終落得迷失自我的悲慘下場。「你話我笑得唔夠甜，我咪盡量笑甜啲，你話我唔夠瘦我咪盡量減肥囉，你話我把聲太高咪盡量低音啲講嘢囉。「全世界你可以please幾多個人？就算你please到一半，噢佢哋聽日話都係覺得你高音啲好聽啲……你明唔明呀？喺呢個圈我想keep住嗰個真，用真心對人，同埋慢慢去搵番自己。」人生在世，為誰而活，很多人該有自己的答案，

無論你是否和王君馨一樣是基督徒（或處女）也好。

 

初吻

要澄清，王君馨是否處子之身，不在本訪問探討範圍內，基於這是一本八卦娛樂雜誌，王君馨先來跟大家分享一下她的愛情，包括過去和現在的。

廿六歲的王君馨，四歲移居美國紐約，廿一歲才回港參選港姐。她的初戀發生在十七歲，即使當時未信主，她的韓籍男朋友在她口中是位「好虔誠嘅基督徒」。

「佢太乖喇，我覺得配唔起佢，我哋咀都冇咀過！因為佢以前個女朋友話佢錫得唔好，所以佢唔敢摧毀我嘅初吻。佢揸住我塊面咁樣（雙手摸着面、兩隻拇指按在嘴唇上），跟住咀佢隻手指囉，呢個就係我嘅初吻，隔住手指嘅初吻。

自小在美國生活，王君馨（右）的表演欲已超強。

○七年港姐三甲，（左起）亞軍王君馨，冠軍張嘉兒，季軍周美欣。誰人曝光最多，答案實在顯淺。

「第二個男朋友，同佢講咗我哋未必去到嗰個level，佢就發脾氣，我見到佢咁樣為咗呢件事發脾氣，我覺得睇錯人啦！跟住第三個男朋友就係依家呢個喇。」

因為宗教信仰而守住女仔人家最後防線，無可厚非。查實王君馨信主才四年時間，那麼廿二歲前的她，防守概念又是如何？

「好細個冇人教我嘅，係有把聲音，教咗我兩樣嘢：『君馨，你未同呢個男仔去say I love you嘅時候，唔可以同佢做嗰啲嘢；第二，你唔可以為佢死，就唔可以講I love you。』所以我細細個已經搵老公o架喇，我以為我第一次拍拖已經會嫁畀佢。」

現任男友在她回港選美前已拍過一年半拖，戀情當時無奈終結。緣份天注定，不到你不信，兩人分開六年後再走在一起。也巧合地，她四年前信主，他三年前也信了主，榮耀歸於主。

「佢係一個好尊重我嘅男仔，我記得第一次約會，佢送我返屋企就話：『好多謝你用咗今日嘅時間陪我。我知你好忙，其實你可以陪其他朋友。』點解一個男仔可以咁嘅？Gentleman到不得了。」

用心

兩人有共同信仰和人生目標，王君馨似乎已經認定了他。

「我好開心我哋好尊重對方嘅passion，佢想讀埋個MBA，佢知道我好鍾意演藝，總之好支持我，叫我唔好為咗佢放棄任何嘢。如果神擺我哋喺埋一齊，我哋係要令對方更加好！」

包括陪漏夜開廠拍劇的女友一齊吃外賣、得閒到女友家中洗碗執屋、去旅行分房瞓等。

「佢又好純嘅，我哋兩個都等緊結婚嘅時候，喺嗰個等緊嘅時候，原來係好用心好用時間去了解對方，我哋傾偈、一齊去睇電影、一齊去enjoy某啲嘢，真係用心了解對方，而唔係physically了解對方。當你好physically去識一個人先，跟住其他嘢可能好多heartbreak。我好多女性朋友太多heartbreak，喺佢哋身上學咗唔好咁快畀個身體啲男仔。

「純潔係唔需要證明，人哋係睇到你。我唔需要企喺度話：『係呀！我好潔淨好pure！』我唔係想話我好過邊個，完全唔係比較。」

王君馨（右二）《舞動奇迹》第二季冠軍，公司的一哥一姐也幾乎要向她俯首稱臣，時常喚她作「舞后」。

《日日有食神》是把王君馨（左二）打進地獄的節目，幸好否極泰來，苦盡甘來。

真我的風采

脆弱時，如果沒有肯付出的朋友幫忙，她可能已經做了傻事。多得高皓正、趙希洛和周家蔚帶她認識基督教，王君馨終能找回自己。

「我有自由笑，有自由去休息，就算畀個工作環境捉得好緊，可以冇得瞓覺，其實有得選擇，講真一句你係可以say no嘅。呢個世界某程度上係一個捆綁，但喺神裏面，點解唔可以選擇？」

她近日日以繼夜地工作，同時拍攝兩齣劇。

「我呢四日加埋都瞓唔夠十個鐘，差唔多兩個鐘、兩個鐘咁瞓。雖然係辛苦，但我好enjoy，當依家係一個訓練營，就唔驚辛苦，有乜嘢盡量做好佢，學識咗唔好畀自己太多壓力，一定要點樣、嗰滴眼淚要喺幾時落之類，呢啲已經要放低，總之你嘅戲係真、畀到戲你對手就OK。」

能性感是本錢，也能勝任某些角色，但王君馨也明白內涵的重要。

有了自我，她敢去表達自己，慢慢成為性感偶像。

「我覺得性感係一種感覺嚟，唔需要着得好暴露都可以好性感。點解我覺得我可以性感？因為我以前跳舞，我有好自信嘅眼神。我覺得個角色啱嘅時候性感啲係OK，或者呢條裙好grand好性感，你就要更加自信嘅眼神去hold住條裙。但你着得暴露引人注意我就唔認同，好身材嘅人大把，呢啲嘢唔會last得耐囉，出面嘅靚好各花入各眼。我覺得佢條腿靚，因為有少少肌肉，第個人就覺得『No！肌肉好核突，完全唔要，打botox吖唔該！』」

說着說着，她還是在意觀眾反應。

「其實大家依家諗嘅王君馨係點嘅呢？」

王君馨大讚無綫肯讓藝人發揮所長，籌款節目就是最佳的舞台。

勢頭

現在的王君馨，留着短髮，更愈剪愈短。

「嚟緊拍嗰套劇會更加短！」

為了《女警愛作戰》而剪短髮的她，勢頭也像愈來愈好。

「個勢好似好啲，好似啱番自己性格。個個都喜歡咁又OK，之前染過金頭髮，好多導演都鍾意，話要搵個角色畀我做吓。我會為咗一個角色做好大膽嘅嘢，可能有一日要光頭我都肯o架。所以希望呢幾年更加多挑戰，同埋識得愛錫自己，因為愛人如己吖嘛。」

跟王君馨過了一個下午，她令我罕有地想起《聖經》話語：「耶和華卻對撒母耳說：『不要看他的外貌和他身材高大，我不揀選他。因為，耶和華不像人看人：人是看外貌；耶和華是看內心。』」（撒母耳記上16:7）

不論王君馨留甚麼長度的頭髮、外貌怎樣，是否基督徒（或處女），相信她絕對樂於看見，有更多愛她就如愛己的人出現。

「祝福你！」她幾乎和任何人道別時，也用愉悅的聲線這樣說。

好，祝福你。

為拍劇而剪短髮其實算小兒科，讓我們期待王君馨（左）更突破的犧牲。