日面
打救日劇 伽俐略強勢回歸
近年日劇被韓劇爬過頭，好似上一季富士電視台起用超萌美少女剛力彩芽，孭飛擔任傳統最強檔「月 9劇」《古書堂事件手帖》女主角，最後大結局只收 8.1%收視，唔只成績慘淡，仲成為史上最低收視「月 9劇」。
為力挽頹勢，今季富士電視台決定食老本，再搵日劇一哥福山雅治將食糊作《神探伽俐略》拍續集，今次闊別 6年的神探照舊查案，但女主角就大執位，由日劇界新寵吉高由里子頂替柴咲幸做女一。久餓日劇嘅港迷，終於有劇追。
於 4月 15日在日本富士電視台開播的《神探伽俐略》，今輯照舊於每一集都追查一宗神秘謀殺案，而且集集有不同串星演出，齋睇星已值得追。
'07
福山雖然已經 44歲，但保養得好，仍然有型有款冧死女。闊別 6年再演《神探伽俐略》，驟眼睇同上集個樣分別不大（小圖）。
柴咲幸坐歪
今集柴咲幸將由主角變配角，而新紮劇后吉高由里子將頂上主角之位，飾演幸姐個師妹，第 1集幸姐就會帶住由里子出去查案，之後嘅戲分就由由里子帶到尾。
吉高由里子接替柴咲幸做新丁女刑警，將集集拍住福山雅治一齊調查奇案。
一 take過搞掂
為省靚《神探伽俐略》個金漆招牌，第 1集已請來前年憑日劇《仁醫》做視帝的大澤隆夫客串助陣，今次大澤於劇中會扮演新興宗教的教主，將會與福山飾演的湯川學正邪對決，當然唔少得鬥智鬥力場面。雖然兩位一哥首次合作，但據知 2人曾經拍一場要唸長達 10頁對白的戲時，竟完全冇 NG，一 take過搞掂，唔只導演拍手讚，連福山都忍唔住大嗌，佩服大澤咁專業。
《神探伽俐略》每集都有命案發生，第 1集就講有邪教信徒從高空墮樓死亡（右圖），經警方調查後，事件原來同大澤隆夫飾演嘅邪教教主有關，於是福山飾演嘅湯川學出手查案，同教主鬥智鬥力。
首集鬥邪教
由里子頂女一
講到神探的女拍檔，今集柴咲幸飾演的女警內海薰雖然仍有份演出，但已淪為大配角。取代幸姐做女一的，就係飾演內海薰師妹美砂的吉高由里子。柴咲幸降呢做大茄，據知是因近年主攻電影界的幸姐想專心拍電影，原本曾推拍《神》劇，但經電視台多番游說，最後幸姐只答應做配角，卒之益咗日劇界新寵吉高由里子頂上做女一。雖然執二攤，但預計《神》劇必爆，柴咲幸可能揼心喎！
《神探伽俐略》除電視版外，更會於暑假檔期推出電影版《真實的方程式》，實行賺到盡。
福山唔只忙拍劇，上週三（ 10日）亦推出個人細碟《於生日送上純白色的百合》，先用情歌冧 fans。
春季日劇鬥大牌
今季春季日劇除福山雅治的《神探伽俐略》外，其他劇集亦唔執輸，套套搵大卡士，例如大口仔香取慎吾、嵐的櫻井翔、日劇天后米倉及篠原涼子等演出，鬥收視前先鬥大牌。
《最後灰姑娘》篠原谷胸
已年屆 39歲的篠原涼子，將飾演因 10年冇拍拖搞到荷爾蒙失調嘅剩女， dry到爆已夠慘，最弊係生埋鬚，繼而製造一籮籮笑話。劇中涼子唔只同 23歲三浦春馬搞姊弟戀，仲將會上演大膽床上戲，齋睇佢呢張谷胸海報就知套劇 9成爆。
《幽靈女教師》敦子幫拖
一向拿手搞笑嘅大口仔，於喜劇《幽靈女教師》中飾演一名無心教學的男教師，一次撞邪後遇見由杏飾演、生前是女教師的茜，於是向女鬼尋求教學秘笈。今次除由杏擔正做女主角外，仲有前 AKB最紅隊員前田敦子加入演出，雖然做配角但肯定吸引大批 AKB捧場。
《家族遊戲》經典重現
將已故松田優作經典電影，拍成同名日劇的《家族遊戲》，由萬人迷嵐的隊員櫻井翔扮演一名上門補習老師以另類方法教學，顯盡日本社會和家庭的荒誕情況，頗為重口味。
《 35歲的高校生》米倉扮學生
米倉涼子近年扮差婆，扮醫生扮到上晒位，現已 37歲的她，在新劇《 35歲的高校生》中，會飾演一名多年前曾中途輟學，現為還心願復學的師奶。劇中涼子將同班 17歲學生一齊上堂，玩盡代溝橋引觀眾笑。
撰文：何家文
留言列表
