宣布得獎一刻，千嬅開心到面容扭曲，老公丁子高就激動到攬實老婆！兩公婆去到慶功依然勁 high，扮咀任記者影相。
真面目
天后宿敵 鬥足 17年 千嬅陰招趕絕 Sammi
95年一出道即被稱為「翻版鄭秀文」的楊千嬅，由華星年代開始同鄭秀文鬥生鬥死，今年由樂壇轉戰金像獎，終於擊敗對方首次贏得金像影后。
能夠打低大熱門 Sammi，千嬅除了靠「春嬌」食糊，更要多得老闆林建岳帶挈。據知原本錫晒 Sammi的岳少，眼見愛將 hea住等嫁，寧願改捧生完仔後積極復工的千嬅。為捧新寵，岳少更親自向金像獎評審團狂拉票。一心要做影后的千嬅最近亦積極埋杜琪峯堆，一於趕絕死敵 Sammi。
39歲楊千嬅，憑《春嬌與志明》撼低鄭秀文、江若琳及周迅，首次在金像獎封后。台上喊到收唔到聲，千嬅連老公丁子高同拍檔余文樂都唔記得提，淨係掛住多謝老闆同評審。
岳少拉票
攞獎要睇對手，但最緊要係有後台。與 Sammi同屬林建岳旗下的千嬅，最近坐正成為岳少新寵，林老闆更親自打畀張同祖等多位金像評審拉票，電話中竟然絕口不提 Sammi。
「岳少本來好錫 Sammi，點知佢上年話因為要結婚，推咗紅館個跨年檔期，到頭來又冇結到，激到岳少好嬲！相反千嬅結埋婚都仲咁爛做，生完仔嗱嗱臨復工，早幾日做完割纖維瘤手術就即刻出席金像獎，聽教聽話。而且千嬅好識做，只要岳少一開聲，即刻仔都唔湊陪老闆應酬，劈酒劈通頂！」知情人士透露。
千嬅自 95年參加新秀，並獲得季軍殺入樂壇，由於歌路似，當年一直被封為「鄭秀文第二」。二人鬥足 17年，今次終於到千嬅贏番鋪！《蘋果日報》圖片 
谷住 
賽前表明冇壓力的 Sammi，知道失落影后都強顏歡笑，保持風度。當晚同男友許志安宵夜時巧遇冇份提名影帝的郭富城，一齊化悲憤為食量，郭富城仲爭住埋單，請 Sammi食粥。
埋杜 Sir堆
有老闆關照都未夠，千嬅為了同死敵 Sammi睇齊，不惜得罪一手打造「春嬌」的彭浩翔，埋杜琪峯碼頭。知情人續說：「千嬅原本應承咗彭浩翔，拍心口話生完仔復出第一套戲就拍佢套《香港仔》，點知轉個頭就幫杜 Sir套《單身男女 2》開工，擺明剃彭導眼眉！彭導覺得千嬅好冇義氣，同佢嘈過幾鑊，搞到《香港仔》（張家輝、梁詠琪合演）都要就佢延遲開鏡﹗」
同彭導嘈交的千嬅，上台講得獎感受時仲暗寸彭導，公開話自己只係執二攤，唔係彭導的「春嬌」首選。話晒有今日都全靠彭浩翔，千嬅唔好打完齋唔要和尚喎！
千嬅憑「春嬌」封后，慶功時風騷同岳少（右一）、余文樂（左二）合照， Sammi就費事戥人高興，完騷即走，冇去慶功！ 
一早搵夠的 Sammi等嫁唔願搏命開工，現時手頭上只得由杜 Sir執導的《盲探》未出街。 
《忽然 1周》圖片
同彭浩翔合作無間，估唔到千嬅寧願得罪老友，都要埋杜 Sir堆，好現實！ 
《蘋果日報》圖片 
志明犯法慶功宴上，丁子高撇低老婆行出露台扯煙，而「志明」余文樂仲衰，當眾喺室內迫人吸二手煙！ 
Sammi輸咗畀宿敵千嬅，而影帝就由《寒戰》嘅梁家輝奪得，同樣大熱張家輝亦變陪跑。
45歲張家輝 08年憑《証人》首度攞金像獎最佳男主角後，之後再喺 6個影展封王。雖然今年喺《大追捕》表現出色，但影帝飲恨畀梁家輝。不過張家輝依然有價有市，連美國名導演 Michael Mann（曾拍《娛樂大亨》、《盜火線》）都嚟香港斟佢，就知搶手。
10萬一集酬勞
神劇《天與地》當年搵咗張家輝拍預告片，可惜最後都係拍唔成，搵咗黄德斌頂上。
張家輝多人爭，但原來搶贏嘅竟然係無綫，據知張家輝將會繼《天涯俠醫》，闊別 9年後回巢無綫，仲破晒無綫紀錄，肯出 10萬一集酬勞，接 30集長劇，女角仲有機係葉玉卿，據知新劇劇種更會以韓片《陽光姊妹淘》作藍本。
今次搵到影帝回巢，全靠《衝上雲霄 II》監製陳維冠跟張家輝稔熟，無綫先可以請得郁影帝回巢， 10萬一集在無綫是天價，對家輝在內地閒閒哋 80萬人仔一集計，今次回巢，絕對拍膊頭。
「係好初步咁傾過！」
問到張家輝係咪回巢幫監製陳維冠拍劇，張家輝即時笑晒，仲話：「嘩！老實，邊個話你知先！」
DaDa醉街女配角
首次提名擊敗邵音音等多位前輩奪得「最佳女配角」的 DaDa（陳靜），喺後台話最想飲酒慶祝，出名劈得嘅 DaDa講得出做得到，出席喺喜來登酒店搞的慶功宴劈到半夜 3點幾，仲醉到瞓喺大堂。
DaDa一上台，其實係話要多謝「 Golden Scene」（發行商高先電影），之後俾高登仔解讀佢話：「多謝高登先！」事後佢話都要多謝「高登仔」支持。 
醉到不省人事， DaDa撻咗喺大堂地下，鞋都除埋，唞足 10分鐘先醒，由朋友扶佢上酒店房過夜。 
「春嬌」首選王菀之：唔覺得可惜
9年後回巢 TVB 張家輝 300萬天價救亡
張家輝除咗同陳維冠（小圖）稔熟，仲同戲劇總監梁家樹關係友好， 09年《証人》慶功梁家樹都有出席，所以先請到影帝回巢。《壹週刊》圖片 
張家輝對上一次演出 TVB劇集，已經係 9年前。 04年張家輝拍住梁詠琪、郭羨妮拍《天涯俠醫》，當年仲去到非洲肯雅取景。 
韓片《陽光姊妹淘》講述 7位姊妹嘅成長故事，據知無綫今週仲會搵班落選港姐試鏡，飾演一班花旦嘅少年版。葉玉卿幫志偉拍完《我愛香港 2013》，再被志偉成功氹拍劇，好大機會拍張家輝。 
最貴大叔
無綫最近興重金聘年過四十的「大叔」演員回巢救收視，今次搵張家輝，肯出 10萬元一集，已冠絕一眾大叔。之不過比起內地劇出價仲差九班。
每集 8萬《衝上雲霄 II》張智霖電影、廣告大把人爭，大陸劇就拍唔停，返無綫 8萬一集絕對畀面。 
每集 8萬《衝上雲霄 II》無綫等足吳鎮宇 10年先拍得《衝上雲霄 II》，不過都係畀得 8萬蚊一集，比起佢內地身價 50萬一集差好遠。 
每集 6萬《 On Call 36小時 2》吳啟華 03年拍完《黑夜彩虹》之後，今年回歸拍《 On Call 36小時 2》拍馬明同楊怡，友情價 6萬一集。
採訪、撰文、攝影：娛樂組
留言列表
