電訊型科

直擊 LG Optimus G Pro巨芒

1080p高清大芒手機已經成為新 trend， HTC、三叔、 Sony都已搶先出台，既然要「壓軸出場」，少啲氣勢點得？呢部 LG旗艦機 Optimus G Pro，請晒中港台、泰國、馬來西亞傳媒去澳門搞發布會，以 5.5吋 IPS全高清大芒姿態，正式進擊。望住呢個高清巨芒，銳利感進擊眼球，各位韓粉，準備好銀両迎擊未？

澳門直擊 LG請咗中港台、泰國、馬來西亞傳媒去澳門玩 Optimus G Pro，大家見到部機都好興奮，迫晒一齊試機，幾乎部部機都俾人 make實晒，盛況空前呀。 

spec.
系統： Android 4.1
處理器：四核心 1.7GHz、 2GB RAM
制式： 4GLTE、 3.5G、 GSM
屏幕： 5.5" IPS 1,920× 1080
鏡頭： 1,300萬（後）、 210萬（前）像素
記憶：內置 16GB、 microSD（最高支援 64GB）
體積： 150.2× 76.14× 9.4mm/172g
顏色：黑、白
售價：$5,698（ 6月 6日開始接受預訂、 6月中發售）
查詢： LG（ 3543 7777）

貴氣韓味

死對頭三叔部 S4俾人猛鬧設計同 S III冇分別，呢部 LG Optimus G Pro就精啦，機身設計加番少許心機，細心睇吓 home鍵原來就係 LED提示燈，來電、收 message等會轉唔同色，有心思。翻轉機背，之前叫好叫座的 Digital Cube花紋仍留喺 Optimus G Pro身上，加埋條銀色幼邊，望落機身更薄。不過最吸睛之處，都係個邊框極幼、尺寸超巨嘅 5.5吋 IPS高清芒！ IPS好處係冇偏色、暗位清晰、可視角度高，用嚟煲《進擊》睇巨人夠晒震撼。難得係電量有成 3,140mAh，比對手部 Note II多少少，當贏咗㗎啦！

巨人試巨芒大芒睇片真係特別爽，連隻巨人都大隻咗， IPS芒睇《進擊的巨人》色水冇乜味精。而且真係特別光，喺戶外試片都唔會暗。 

將部 5.5吋巨機拍上 model塊面，因為邊框位偷到盡，其實唔算好大部。 

雖然都係膠質背殼，不過 Digital Cube花紋夠晒特別，質感豐富咗好多。 

Home鍵邊位其實就係 LED提示燈，鬧鐘響時更會不停轉色，靚！ 

進擊拍片

對手不停力谷好玩影相 mode， Optimus G Pro就改攻拍片功能。主打有 Dual Recording，可以用盡前後鏡頭同時拍片，發布會時高層力稱佢哋係率先發明，點知俾對方 copy。搵 model試玩呢個分唇，介紹自己兼影發布會場，搞到 model好似做緊電視節目轉播咁，感覺十分搞笑。而且拍片仲加入大眼、長面等變形 filter，搞到片段入面嘅人個個好似 ET，好玩度升呢！拍片之外，仲用盡個大芒玩埋多功處理 Q-Slide，由以前只限影片畫中畫，升呢到可以用埋計數機、記事簿等，用盡個靚芒。

試相室內試影人像，對焦快，而且雜訊都唔算嚴重。 

用盡 5.5吋芒玩多工處理，而且浮動視窗仲可以校透明度，唔使下下拉來拉去。 

雙面拍攝唔只得拍片，仲可以影埋相，不過像素就較低。

撰文：鄺浿鏇
攝影：傅新發