Webber

Miss Hunny何穎璇我唔會找數㗎！

Hunny其實「出道」咗好耐， 09年開網上魔術道具鋪頭，已經玩緊自拍做道具教學，愛魔術愛到中五畢業即飛美國魔術學院進修，成為學院首個華人女魔術師。
後來其中一段自拍片俾劉謙睇中，點名要佢做魔術節目《奇跡之門》，從此響朵！
要計要寫，做專訪都唔過分，淨係計佢 Webber身份回港後所拍嘅三條片，加埋已經過百萬點擊率！除咗靠賣樣，仲大膽跟高登仔輸賭魔術片穿崩就除衫拍片！
但 Hunny就同記者講件數唔關佢事，走硬數！

Webber's profile

Miss Hunny
原名：何穎璇
職業：魔術師
拍片資歷：約 4年
作品總數：主演 3套及大量客串作品
總 hit rate： 100萬以上
subscribers： 64,383

90後女仔通常都係用「 PS裝甲」自拍上網收吓兵。點解妳會揀魔術去自拍嘅呢？

Hunny人氣最高嘅三條片都喺晒 umovie大本營度拍，雖然環境混亂景又唔多，靠包裝一樣有回響！ 

我 12歲嗰陣有套小說好紅，叫做…《 Harry Potter》，哈哈哈！睇完後我覺得世界上真係有魔法，於是好想追尋呢樣嘢，於是正式開始接觸魔術。最初我鍾意佢夠自閉，因為我唔鍾意群體生活，魔術自己一個人就玩得，唔使同人配合。但正式學習後，加上呢幾年經歷，我先開始慢慢喜歡同觀眾交流，想知佢哋反應。

點解會同司徒夾帶一齊合作拍片？

咪俾佢個訪問同呢張相呃到，一拍片佢就黐線！想睇佢爆 seed打記者或者扮 Tommy仔 rap「拍 MV」，記得睇《 FACE》今期條獨家片！ 

我同佢識咗 8年，佢以前已想搵我拍套片叫《處女鹹濕鬼》㗎啦。我响台灣有地方駐場、大陸有巡迴表演，返香港發展先知道表演藝術喺呢度唔太受歡迎，決定喺網上搵個表演平台。我想拍啲同內地魔術師唔同嘅作品，以前响《奇跡之門》要行偶像路線、要扮嘢，但我自問唔係靚女或者做偶象嘅材料，唔想重複以前嘅表演方法，我諗起一個外國魔術師 Buka表演好好笑好好玩，想拍類似嘅片，於是就搵咗司徒夾帶幫手。

我都好想睇《處女鹹濕鬼》！咁妳之後會唔會繼續拍片呢？

復出後第三條片擺唔夠 10日超過 30萬點擊，因為 Hunny終於找數，除咗個 bra！ 

如果有時間，我會繼續拍片。其實本身傾嗰陣係定咗做 4集就完，但第一集放上網後反應好好，我𠵱家响商場表演時，開始發現有觀眾認得我，叫我找數或叫我個名，好似同觀眾關係親近咗，感覺都唔錯。其實我好希望香港觀眾可以學識點欣賞魔術，而唔係用「過中秋節」嘅心態去睇。（按：即係猜燈謎呀！）

妳到底幾時先肯找清條數？

其實一路都係司徒夾帶自己話，如果見到我嘅魔術片穿崩就要找數除衫。雖然我啲魔術片都有失手過，但條數其實應該搵佢找，無啦啦點解要我孭上身先！
（再按：找數是網絡術語，指網民發帖履行之前答應過的承諾，多數是惡搞為主，例如「如果我今期六合彩唔中頭獎就自拍响馬會門口小便」，如果最終沒有履行此承諾，則會被標籤為「走數」。）

Buka呢條《 Card Manipulation》表演勁好睇， Hunny話以佢為終極目標，睇前記得開聲！（ http://youtu.be/_iqahjU7SVc） 


撰文：熊俊彥
攝影：傅新發