鄧會長幾經艱辛才成功上莊，但遭前任突襲閂水喉，他只好硬着頭皮撐到底，「我將競選政綱放喺枱頭，提醒自己堅守承諾，壓力係好大，不過知道有好多同學支持我，我就會繼續撐落去！」
Main Camp
3,000萬基金遭凍結 港大學生會癱瘓
港大貴為本港龍頭大學，但上年港大學生會卻亂到震，先有會長陳冠康私自動用學生會 38萬，在報章發反梁振英黑金聲明，今年 2月千名學生靜坐反對陳冠康濫權， 3月又鬧出學生會選委雙胞，令學生會選舉幾乎流產！
幾經擾攘，新一屆學生會終於在 3月 29日選出，結果由社會科學系 Yr.3的鄧日朗（ Laurence）當選，個個以為新人士有新作為，但學生會的 3,000萬營運基金竟被前評議會會長譚振聲使橫手凍結。
新任會長 Laurence想改革，不過欠水講乜都冇用，據知現時學生會已欠街數近 100萬，問題不解決，隨時下學年連學生會 O Camp都搞唔成。
鄧日朗以「弘曦」為新一屆學生會內閣名稱，希望成員要有公民意識、關心社會，又寓意踢走黑暗光復港大學生會！而鄧亦以「反赤化」為口號，最終贏得新一屆學生會主席！
光復港大
與鄧日朗同班的前會長陳冠康成為港大同學公敵，但其實未出事前，很多同學對他好大期望，鄧日朗亦曾經係粉絲，「我同陳冠康係同班同學，上年見佢話選學生會，對佢好有期望，以為港大有新景象啦，點知仲衰過以前，佢同譚振聲都唔知為乜？似一班死士多過為學生服務，都唔知係咪有政治目的！」鄧會長口中的譚振聲，正是 3月被罷免的港大前評議會主席。
鄧日朗想光復港大學生會，但學會的 3,000萬營運基金的戶口，卻遭譚振聲私下在戶口加入自己簽名，間接凍結基金，鄧日朗無奈說：「譚振聲任期已完，又未經學生會授權，唔明點解銀行可以畀佢加簽，我哋警都報埋，最慘就係我哋打過好多次電話，又 email佢都唔覆，可以點？」
莊員夾錢
儲備被騎劫，鄧會長惟有向大學申請 100萬元貸款應急。但至今校方仍未答允，學生會運作因而大受影響，鄧日朗覺得有負同學期望：「我哋幹事會成員已經私人夾咗幾萬元出嚟，做六四宣傳活動，之前學生會大樓裝修，嗰 60萬工程費都未畀，學生會文具鋪嘅入貨錢又未找，加埋差唔多 100萬。連學生報《學苑》同校園電視等都因資金不足而癱瘓，仲有迎新日畀新生嘅資訊同物資都唔知點搞，可能下學年嘅入學迎新營都唔可以如期舉辦，所以好對唔住所有港大同學，特別係投我一票嘅同學。」
剛上任就觸礁，但鄧會長與一班學生會幹事只有頂硬上：「我哋一定會對嗰啲損害港大學生會嘅害群之馬追究到底，亦好想同學對港大學生會呢個名有番信心；喺學運行返出嚟帶領港大同學，唔好話一定要做領袖，但最起碼要插番港大支旗。」
足足 3,000萬被凍結，學生福利受損，港大校方就指尊重學生會的獨立自由，相信同學可自行解決事件，不便插手干預。而本刊亦曾致電譚振聲及陳冠康，但截稿前仍未有回覆。
欠百萬街數
被追數
學生會儲備唔郁得，現拖欠的街數想還亦還不了，鄧會長大吐苦水：「除裝修費 60萬，連我哋文具鋪都拖緊供應商數，希望供應商唔會嚟追數。」
冇枱凳
本來港大學生會會為各屬會提供枱凳，可是現今財政緊絀，枱凳有損毀也沒錢買過或修理，只好放在走廊，遠睇十足垃圾房。
鋪丟空
以陳冠康為首的上屆學生會，甚少為同學謀過福利，現任會長鄧日朗無奈說：「本來學生會大樓落成，理應可招便利店、電腦鋪等小店方便同學，但至今仍丟空，我一上任就四出搵商戶，希望增加收入。」
反赤化得民心
前幾屆港大學生會都被指染紅親共，而在鄧會長帶領下的弘曦，打住「反赤化」的旗號，勢要將民主重新帶入港大，所以得到不少港大同學支持。
貼錢搞六四
鄧會長雖無政黨背景，但勝在 Yr.1和 Yr.2等分別擔任港大宿舍大學堂的副會長及會長，管治經驗豐富，人面又廣，現學生會雖然缺水，但為搞六四活動更自資幾萬蚊，難怪獲得不少同學支持。
新一屆港大學生會拒染紅，當中更有成員來自學民思潮及社民連，不少莊員都是社運新血。
港大學生會𤓓事
港大學生會近年可謂多事之秋，醜聞一單接一單。除豪花 38萬登反黑金聲明、又試過千人聲討前會長，前評議會主席又聲稱被打報警，似做騷多過為同學服務。
'12 3月 登報插梁振英
前會長陳冠康在上年特首選舉期間在八份報章發表梁振英黑金聲明，遭其他大學的學生會圍插有政治目的，最終陳會長只好乖乖認衰仔！
'12 4月 譚振聲被打
上年前評議會主席譚振聲聲稱在被同學掌摑，更報警要求驗傷，但竟然俾人發現在救護車上玩電話，又成了一時高登熱話。
'13 2月 千人聲討會長
由於上屆會長陳冠康惡行曝光，所以今年 2月千名同學聚集中山廣場，就聲討陳冠康舉行靜坐。
《晴朗》專訪
上週三及四，鄧會長上商台時事節目《在晴朗的一天出發》講解學生會 3,000萬經費風波，他希望透過傳媒向譚振聲施壓，迫他現身交代。
失蹤個幾月
3月被罷免的港大前評議會主席譚振聲，至今仍不願交出學生會電郵和 facebook密碼等權力象徵，更堅稱依舊是主席，今次又脅持學生會 3,000萬潛水，唔少人都表示個多月聯絡唔到佢！
Main Camp：
留言列表
