面對面
不再猶豫 葉世榮
下週一， 6月 10日是黄家駒的生忌，今年是 Beyond的 30周年。訪問葉世榮，在家駒與 Paul又爆罵戰前進行。人已在北京的世榮說為免再捲入是非對罵，一概不作回應。
其實， Beyond 30年，葉世榮一點也沒猶豫，訪問中爆出一句：「我前 30年已經畀咗 Beyond，後 30年想畀自己。」直接否定了沒有家駒的三人 Beyond再次站在台上的可能。
聽落好似好絕情：搞錯，淨係顧自己， Beyond唔係你一個㗎，係屬於大家㗎！
係咩？ Beyond真的是屬於大家的嗎？集體回憶就等於集體擁有了嗎？
你有你愛的權利與回憶，難道當事人就沒有權利走自己的路？
可惜，葉世榮注定要帶着群眾的期望做人，行錯一步就是忘恩負義，就是不夠長情，拒絕在 30周年重回 Beyond懷抱如是、喪妻九年後再娶亦如是：搞錯，點解唔係一世單身？我唔相信愛情囉。
49歲的葉世榮，經歷過兩次意外， 93年，樂隊靈魂人物黃家駒在日本意外不治； 02年，未婚妻又在婚禮前兩個月在家中浴室意外暴斃，正是因為親身經歷，他說不能再等，要換回點時間給自己：「我話 30年？邊個可以保證我仲有 30年？人生無常，畀我去做好唔好？」
你試過失去嗎？你知道甚麼叫失去嗎？
和事佬也有累的一天
Beyond 30年，尤其是家駒去世後，黃家強和黃貫中不咬弦、全靠世榮從中調和的傳聞就沒有停過。連世榮自己也說，搭的士都被的士司機話：「做咩唔重組呀？一定係不和啦！你哋啲樂隊一散 band，實係因為不和。」
「唔係不和，亦唔關能力事，喺我心目中， Paul嘅結他係全香港 no.1，家強作曲亦充滿才華。係 00年大家單飛以後， 03年再一齊，發現件事已經唔再 smooth。（家強說過，勉強夾 band，只會見到 Beyond三子口腫面青走出台。）我咁睇，人大咗，思想同獨立性都會強咗。 03年我哋籌備唱片、做埋告別演唱會。當時個演唱會打鑼打鼓係話告別，去到邊我亦都帶住家駒張相唱巡迴，就係要完成埋家駒嘅遺願。你哋當我哋個告別係噱頭；係炒票房，唔好意思，唔係囉。完成咗呢個告別演唱會，我就真係計劃緊自己未來嘅路，人哋要重組我唔反對，但係我可以肯定答你，我唔會參與呢個重組。 Beyond係輝煌過，但並唔係樂隊史上唯一嘅輝煌；我去到邊，都俾人截住想當年，呢個結果，當年組緊 Beyond、聽到歡呼聲嘅一刻，我已經知道係事實，一世都賣唔甩。我做我嘅嘢，歌迷期待第二樣嘢，我唔會覺得係包袱，反而會理解諒解佢哋。但係除咗班同我哋一齊長大嘅 fans，仲有 90後後來鍾意 Beyond嗰班，佢哋冇睇過，佢哋好想睇 Beyond站在台上一次，仲有 00後，可能過多十年仲有 10後呢……唔好意思，我唔可以滿足每一代 fans希望。過去 30年，我將自己畀咗 Beyond，往後 30年，我希望啲時間係屬於自己。」
世榮行自己的路亦致力培養新人，還借着音樂會和新歌帶住大班地下樂隊合唱〈薪火相傳〉：「 Beyond係其中一個輝煌，我相信香港未來會有其他樂隊創造另一個輝煌。」 
Beyond 30年，三子各有搞作，世榮堅稱三子沒有不和，最近家強和 Paul又再爆罵戰，你一句「冇咁惡毒嘅兄弟」、我一句「佢邊會畀結他我」……其實嘈嚟為乜？《蘋果日報》圖片 
05年， Beyond三子舉行二十場告別巡迴演唱會，世榮帶着家駒的相片走到每一站：「世界巡迴係家駒心願，幫佢完成咗呢個心願，我就計劃行自己條路。」《忽然 1周》圖片
再等唔慌唔再見理想
要用自己的時間追求自己的理想，葉世榮不是空口說白話。 00年，他從鼓手變成歌手，推出自己的首張唱片； 04年，他自組製作公司，發掘和培養獨立樂隊及歌手；今年，他推出新歌和新碟《薪火相傳》，又將在 7月 6日帶着一班樂手舉行音樂會；未來，他說要唱 heavy metal……係呀， 50歲都嚟緊先嚟 heavy metal，還有理想，還在實行中。
「傳媒好鍾意計數，話我唔參與 Beyond 30周年紀念活動，損失收入講緊千萬。就係多得傳媒計咗呢條數，幫我塞住咗好多人把口。我可以放棄呢個算係唔錯嘅收入，去換取我嚟緊嘅時間完成夢想，咁你哋仲有咩嘢講？人生無常，我都唔知仲有幾耐時間，點解要喺最後生命過程，畀自己一個希望？做 Beyond，我喺慣背後打鼓， 2000年單飛，我真係換個方式講嘢，換着係自己寫自己唱。唔容易㗎，歌迷未必習慣，自己能力亦未足夠。睇 01年我第一隻個人唱片《美麗的時光機器》就知，太難聽啦！賣幾千隻事小，我寫得唔好、唱又一般，喺宣傳過程中一個人做咗好多表演，先至發覺，騷我出得多，但係原來自己企喺個台度唱歌差很遠。就係咁，我決定鍛煉自己。香港演出空間唔係好大、選擇亦唔多，我最先諗到最近嘅深圳。深圳最多酒吧，我完全唔顧自己身份，當自己新人一樣，唔計場合、唔計酬勞，我仲消埋費添。倒貼都要唱，慢慢得到多啲機會鍛煉，歌迷因此多咗、膽亦都練大咗，於是愈踩愈入，唱到去哈爾濱、唱到去新疆克拉馬伊，仲有內蒙西藏，全中國都走遍。走去內地發展，係機緣巧合，喺內地識到朋友甚至太太都係機緣，所以我好期待 7月 6日呢個機會。佢唔係演唱會，係一個聚會，我真係好想大家睇睇十二年來世榮變成點。 49歲，仲有冇力 heavy metal，你哋睇吓咪知囉。」
93年 6月， Beyond紅到去日本，亦因此，家駒在日本遊戲節目意外墮下身亡。 7月 5日家駒大殮，三子哭成淚人，亦代表了一個時代的終結。《壹週刊》圖片 
01年葉世榮首次從鼓手變成歌手，出版個人創作專輯《美麗的時光機器》，銷量口碑俱不濟：「真係好難聽，我咪知道自己唔夠，需要鍛煉囉。」
有些痛一輩子不會忘
除了 Beyond的包袱，世榮還有一個包袱要揹一世。 02年，世榮與拍拖 7年的女友許韻珊決定結婚，誰知道就在結婚前兩個月，未婚妻在家裏浴室跌倒暴斃。靈堂門前，世榮寫着「葉府治喪」四個大字，喪禮變成冥婚，為女友套上戒指，讓她在最後一刻成為葉家人。無聲傷痛感動了無數歌迷，一廂情願認為世榮就該悼念亡妻一輩子，因此 11年再婚、 12年女兒出世，讓不少人對世榮大失所望。
「唔會平伏㗎，失去一個好兄弟，再失去一個另一半，點會平伏啫？到我死嗰日都唔會平伏！傷心會有，但係我唔會表現個情緒出嚟。我信佛，相信緣分，就算我𠵱家同你坐喺度一個短暫訪問，都係我哋前世修來。我同佢哋有緣分，但係佢哋亦自有生死緣分，呢樣嘢我冇得改變。痛係必然，唔好講樂，先離開咗痛苦至講。生老病死係人生必經階段，我覺得中國發明文字嗰個人好有智慧，舉個例子，我哋對眼兩個十字，鼻係一個十字，下面一個口，呢個咩字？「苦」。人喺出世開始就要經歷大大小小痛苦，太順風順水嘅人，受唔住打擊，郁啲就喺青馬大橋跳落嚟㗎啦……我唔會咁諗，人生難得，佛祖講過，做人嘅機會，等於每五百年大海裏邊嗰隻露出頭唞氣嘅海龜啱啱套住救生圈。女細老婆嫩，好多人呢個時候覺得賺錢最重要，我認為，錢夠用就得，要比，時間更重要。我話就話想用人生打後 30年去完成我嘅夢想，但分分鐘冇 30年，邊個可以保證我仲有 30年？所以我好珍惜現在，珍惜眼前人，最重要係珍惜時間。」
02年 10月，婚禮前兩個月，未婚妻意外身亡，葉世榮在靈堂為女友套上婚戒、舉行冥婚。《壹週刊》圖片
不會忘記
前妻，世榮說，從來沒有忘記，從來不會放下，他相信，有多想念、心裏有多少話要說，她一定會知道。 11年再娶內地模特兒張偉鈴，亦在婚禮前先帶對方去拜一拜前妻，知會一聲。
至於家駒，離開愈久，有些畫面愈是歷久常新：「我成日都記得喺琴行第一日見佢嘅畫面，成面暗瘡成面油；佢成日同家強嗌交，有一次家強話家駒爭佢一百蚊，家駒話還咗，兩個人嘈到火紅火綠爆晒粗；家駒好多嘢講好多意見，有次講到一夫一妻制，佢話男人三妻四妾係合理喎……」
所以說，懷念，各有各的方式，不是要逢五進十打鑼打鼓搞騷摺紙鶴放白鴿才叫做繼續寵愛。
11年聖誕，世榮與年輕 20歲的內地模特兒張偉鈴結婚，女兒葉凱淇翌年 6月出世。 
撰文：朱小博
攝影：范仲良
化妝： Kei Kei
髮型： Matthew@hq
服裝： I.T/ Puma
留言列表
