Seven（右）現已升為助理營業經理，容許他建立自己的團隊。 Seven認為溝通很重要，圖為 Seven跟他的團隊討論本月業績。 

青雲路

24歲𡃁仔的保險百萬大道

不少年輕人對工作滿口怨言，但要取得成功，除了要勤力外，還要沉着應戰。今年 24歲的 Seven，大學畢業後即從事保險行業，雖然自己沒有人際網絡，但他卻由佣金低的旅遊醫療保做起，凡事親力親為，儲到第一班客。 Seven入行年半已躋身百萬圓桌，年薪超過 50萬，成功全靠他沉實以及勤力的性格。

每天 Seven都會向上司匯報。營業經理 Maggie： Seven做事好有責任感，合作性好高，加上咁年輕就入到百萬圓桌，真係好有前途。 

訪問前，記者還以為任職保險行業多為吹水唔抹嘴的人，但與 Seven做訪問時，他說話並不多，他入行只短短年半已得到「百萬圓桌」名銜，每年收入過 50萬，從他臉上沒有現今年輕人的輕佻傲慢，反予人謙厚踏實的感覺，「我都明白社會上有唔少人對呢一行有誤解，樹大有枯枝，可能有人的確做得唔好，但我絕對唔會成為呢一類人。」
Seven現在 AIA任職助理營業經理，主要負責提供退休、儲蓄、保險及投資基金等服務計劃讓客人選擇，「呢類服務幫到客人管理財富同保障佢哋嘅生活，以退休為例，我會因應客人期望，再考慮埋佢嘅收入、消費模式，每月儲幾多先可以幫佢儲一筆可觀嘅退休金，好似一個 30歲嘅人月入 2萬，扣埋所有開支每月約儲到$3,000，儲 15年就可以得到約 5、 60萬。」

客戶姜先生： Seven好盡責，幫我 claim錢好快手，加上我任何時間都搵到佢，令我覺得佢好可信。 

現年 24歲的 Seven，在讀副學士時，本想畢業後投考消防員和警察，收入穩定之餘，又有正義感可以幫助到人，但因父親一次大病，改變了他的前路，「喺我讀緊 AD Y.r2時，爸爸患咗大腸癌，爸爸係全家人之中唯一一個冇買到保險嘅人，屋企冇錢醫佢，惟有排政府醫院，媽媽要全職照顧爸爸。當時我壓力好大，想讀埋嗰年出去考政府工搵錢畀爸爸醫病，但爸爸話入大學係難得得機會，好想我成為大學生，所以我決定圓爸爸嘅心願，申請入大學讀埋個學位，好彩最後爸爸都醫得番，佢好開心見到我行大學畢業禮。」

爸爸患病改變路途

Seven曾到泰國參加業務會議，其間到郊外遊玩，圖為他餵馬騮時攝。 

爸爸得病時，令 Seven深明保險的重要性，可以保障自己和家人，「契媽喺我讀緊小學時，因一次意外，令佢唔可以再做操勞工作，好彩佢有買保險，而保險公司嘅賠償都令到契媽得到唔錯嘅生活，相比之下，爸爸冇買保險，就要排年半政府先有得醫，令我認定保險真係幫到人，畢業後第一份工，就從事保險業。」
從事保險業，好講求人際網絡，但 Seven為人沉默，所識的朋友不算多，也曾遭朋友白眼，「我係新移民， 5歲同家人一齊嚟到香港，家境唔富裕，我同好多新移民一樣，覺得自卑，點解同其他小朋友唔一樣。直到上中學，開始打籃球，同班波友仲做埋死黨。我最初入行，都有啲朋友叫我唔好 sell佢，又有啲人會叫我轉行，但我唔介意，要努力先有成績。我有約班波友出嚟，講解咩係投資，我唔會 hard sell，佢哋唔幫襯我唔緊要，但佢哋好好，會不斷介紹朋友畀我認識，令我識多咗人。」

首月 3張單未氣餒

對保險業有憧憬的 Seven，頭一個月只開得 3張保單，但這沒有將他打沉，反激起他的鬥志，「我嘅 network喺保險界算差，所以初頭我咩單都做，除咗佣金低嘅旅遊保及醫療保外，連每張單得$1佣金嘅強積金我都照做，只係想儲人脈。有啲客幫我買醫療保，為咗方便佢哋，我會陪佢哋去睇醫生，跟住即刻拎張單返公司 claim錢，好多客覺得我跟得足，會介紹其他客畀我，我開始向佢哋 sell基金、人壽保及儲蓄保等，慢慢就開到單。」
時至今日， Seven所接的單銀碼都比較小，每月供款額約由＄ 1,000至$2,000，但他勝在夠爛做，去年他大約接了 100張類似金額的單，不怕捱，密密食，造就了今天的他。「有人肯見我，我都會去，所有時間我都會留嚟見客，試過一日食足 5餐，由早餐食到宵夜，雖然我天生食極唔肥，但我都唔想變肥仔，放假一定會打吓籃球。」
Seven表示要令客人放心，要盡好本分，凡事都跟到足，「好似基金組合，我會幫客人跟足，平均至少有 5%增長率，加上我會每月或每季向客人匯報基金賺蝕，客人覺得滿意，會推介我畀其他朋友，我亦因為咁客路慢慢多起上嚟，成績自然會提升。」

喜歡運動的 Seven，除籃球外，更會釣魚，「釣魚時可以吹吓海風、曬太陽，可以令我暫時忘記工作。」 

Seven（左二）很感謝班波友死黨的支持，是他工作原動力之一。 

為婆婆投資最深刻

入行年半， Seven亦有過深刻經驗，「曾經有個女客人發現佢退咗休嘅媽媽，原本放咗 120萬喺銀行嘅股票戶口，蝕到得番$60萬，因為婆婆一直冇理到，令到自己蝕咗咁多錢都唔知，所以個客人就畀咗筆錢我管理，仲叫我保守秘密，唔好畀婆婆知道蝕咗咁多，𠵱家我 keep住幫佢重新投資，每年都有 5%增長，仲有利息派番畀婆婆，覺得自己嘅知識可以幫到人，個滿足感好大。」
上年 Seven得到「百萬圓桌」的名銜，成績獲得肯定，「得到呢個名銜我都感到好有成功感，令我更有動力去走下一步，最近我啱啱由營業代表升咗做助理營業經理，公司已經容許我建立一隊約 4至 5個人嘅團隊一齊跑數，我都好樂意將自己識嘅嘢教畀下屬。」

每逢月底或季尾， Seven都會通知客人有關投資的最新走勢。 

平時接觸太多人，說太多話，所以 Seven在假期喜歡獨自一人坐在公園，享受寧靜時間。 

後記：保障家人

Seven爸爸患病的事，令記者非常感觸，試想想你看着家人躺臥在病床，自己卻無能為力，多麼令人痛心。為了保障家人，訪問完後記者立即致電回家，詢問家人有沒有買保險，得知家中除了記者外，所有成員都有買保險，看來沒做預防的就只有我吧。

咩係百萬圓桌？

百萬圓桌(Million Dollar Round Table)是由優秀壽險與金融服務從業員組成的國際性協會組織，現約有 25,000名會員。全球只有 1%的金融服務從業員能夠成為會員，屬業界的精英。 2013年百萬圓桌會會員最低要求為合資格佣金每年收入港幣 540,000元或保費收入港幣 2,160,000元。
http://www.mdrt.org 

點入行?

Seven指 AIA平時都會在各大求職網上貼有招聘廣告，好像 JobsDb、 CTGoodJobs等等，有興趣只要 send CV去求職便可，「公司有清晰晉升階梯，令員工好有推動力工作。」任職保險從業員必需至少考獲以下證書：
Insurance Intermediaries Qualifying Examination(簡稱 IIQE)
考試共分 5份試卷
1.主考保險原理及實務考試
2.一般保險考試
3.長期保險考試
4.投資相連長期保險考試
5.旅遊保險代理人考試

考試詳細資料可於 http://www.peak.vtc.edu.hk/cpdc/zh/iiqe.asp 或致電 2919 1467查詢。

晉升階梯

營業經理
約$30,000至$150,000（約 6年或以上經驗）

助理營業經理
約$20,000-$100,000（約 2年或以上經驗）

營業代表
約$6,000-$15,000

*以上資料由坊間金融機構為例

撰文：何倬然
攝影：彭自維
部分圖片由被訪者提供