Main Camp
「執嘢」熱吹入 U界 理大換物王 free到盡
牛肉巴士電費樣樣加，為抗通漲，近年香港興起一股執舊嘢熱潮，家中冇用物件樣樣 free畀你。
以為執二手用品是師奶專利，原來這股二手風最近已吹入大學校園，理大早前便搞了個墟市嘉年華，同學二手用品任你攞，中大更連食物都做回收。
有份計劃理大二手換物的 Yr.3學生胡恩恩更是執嘢達人，宿舍中電視電腦衣服全都是透過二手換物換搜羅自用，連電腦都 free到，同學仔真係要跟佢學吓嘢！
無綫節目《東張西望》亦有介紹免費交易平台《執嘢》，而近年愈來愈多類似組織出現，全城搵筍二手貨。
幾年前人人淘寶掃平貨，可惜人仔急升，埋單分分鐘仲貴。現就讀理大社工系三 Yr.3的胡恩恩，從不淘寶，只因自小家人傳授慳錢大法。「屋企人同親戚都習慣啲衫不啱着就交換，我嘅畀表妹，啲表姐又會畀我。」
Free嘢講誠意
從小覺得港人買嘢多過用，胡恩恩半年前首嘗網上執筍嘢之樂。「嗰次表妹想要盒木顏色，我又咁啱見到有個網可以自由 free嘢（免費攞嘢）同徵嘢（徵求想要物品），咁我就試吓徵木顏色，點知真係有，仲要全新，其實上網 free嘢同徵嘢最好寫埋原因啦，最緊要有誠意，有時啲人淨係話我要我要，個物主會覺得你貪得意，未必會畀你囉！」半年間胡恩恩在網上執過不少筍嘢，衫褲鞋襪、舊書舊煲，甚至床同電腦都有，頻頻執到筍嘢，只因夠勤力。「其實要睇住 update，睇相未必知件貨質素係點，可能都會留咗言先，就算唔啱用，亦可以 free番出去畀人。我都 free過衫、書同印花畀人。其實 free嘢唔等於蝕，拎嘢出嚟可以慳番啲位，又可以畀到真正需要嘅有緣人，利人又利己。」
環保又有意義，胡恩恩便想在大學推廣這種「與其封塵，不如送人」的文化，於是聯同其他搞手在 5月 10日舉行了名為「頂理。唔洗錢嘅？！」活動，希望為冇用物件尋到有緣人。活動另一搞手 Kim表示：「我哋唔會一次過拎晒所有物件出嚟，希望大家可以不斷返嚟執筍嘢。大學生冇咩經濟能力，但又好容易亂買嘢，最後可能用都未用過就入咗堆填區，其實你覺得冇用啫，可能有人覺得係寶，你又可能搵到一啲你想要好耐、買都買唔到嘅嘢，呢個社會唔使下下講錢嘅。」
理大 free嘢會
有歌聽除了擺地攤，胡恩恩有份籌備的理大換物會，同場有不少表演，有人即場教化妝、有人教撕紙藝術。也有同學聽到音樂聲仲拎結他同表演者 jam歌，似足嘉年華！
多樣化活動當日都有電視機、小型雪櫃等家電，而且全部用得不需維修，住 hall人啱晒！ 
有書換大學搞 free嘢當然有書揀，其中唔少仲係貴價參考書，同系師弟最啱用。
網上換物乜都有
唔只得死物，有人就將收留的流浪貓放上網 free，希望有好心人收留！ 
PS2雖然舊啲，但一樣有大把人爭。想氹到賣方？寫埋原因：「畀侄仔玩」、「玩完會 free番出去」，機會咪大啲囉！
中大仔食物照 free
上月一班中大仔就在旺角鬧市擺地攤。搞手之一的阿俊（左二）說：「初頭啲人都唔信任攞，以為呃人。後生仔就更怕醜，驚俾人話貪心。」
衫褲鞋襪傢俬電器可以 free，原來食落肚一樣得！中大之前就在 facebook搞咗個名為《食物放提》的群組，提供一個平台讓大家隨意 free嘢徵嘢，不過只限食物。
搞手之一，就讀中大新聞與傳播系的阿俊說：「其實我哋全部都係讀中大新聞，其中一個課程要我哋搞一個有關社會責任的活動，我哋見𠵱家香港剩食嘅問題又愈嚟愈嚴重，大家都諗咗好多唔同嘅方法去處理，而網上 free嘢徵嘢咁 hit，所以就搞咗呢個 group，希望將啲食唔晒或者唔啱食嘅嘢畀啱用嘅人。」
熟食都吼
到活動後期愈來愈多人攞食物，甚至附近街坊捐出食物支持，中大仔當然來者不拒！ 
為吸引更多人，搞手們即場用地攤食物製成多士派街坊。有得食又有得拎，加上見同學仔盛意拳拳，街坊都食得開心。
城大賣二手校方撐
城大一樣有二手物品交易平台「手易點」，仲要有校方贊助撥錢撥房當貨倉，同學就不用孤軍作戰，現時已收到捐贈物品超過 300件。雖然貨物不是任攞，不過都超低價，賺到就會成立基金令「手易點」持續經營下去。
到學期尾，不少交流生回國前都會棄置很多日用品，連床褥都有！所以「手易點」除在校園擺收集站，亦有在宿舍附近收二手物品。 
城大賣物貨品較大路，不過勝在價平，如壁球拍、耳筒等都係 4、 50蚊買到。
留言列表
