今日好玩嘢

盛夏彈起　女性向 Pogo Stick

成日覺得極限運動「 X game」，同女生真係點都扯唔上關係。之但係𠵱家已經係 2013年，有咩係冇可能先？去年喺美國有玩家憑一支 Pogo Stick（彈跳棒），打個筋斗跳過 2.44米欄刷新世界紀錄，令外國媒體大肆介紹呢種 X game！最正係佢其實易學易玩，加上彈吓彈吓嘅動作，女孩子想減拜拜肉同粗腿絕對一流，難怪喺香港話咁快就有個 3,000人 facebook群組。趁住盛夏剛到，快啲同班 friend一齊玩兼減肥啦！

跳 Pogo Stick好 easy

去年年尾，美國玩家 Michael Mena用 Pogo Stick跳過 2.44米高欄，破世界紀錄之餘亦重新帶起呢種運動。

學玩 Pogo Stick，真係冇需要有咩底子，又或者有咩特別技巧要練。由頭到尾，只係講個勇字。女玩家 Lisa話多得屋企人細細個就買支 Pogo Stick畀佢由細玩到大，「成個動作好簡單，踏晒雙腳上去，放膽企直，加少少身體重力，已經可以不停彈彈彈。」就算你唔敢企直，支棒離地都唔高，好易就可以落番地，唔似玩滑板，一失平衡就成個人仆喺地。」

Pogo Stick熱潮最近都吹埋嚟香港，單係聚集香港 Pogo Stick玩家的 fb專頁，成立只有個幾月，已經有近 3千人 Like。

Pogo Sticks Hong Kong　彈跳棍　香港
網址： http://www.facebook.com/PogoHK

半個鐘即爆汗

睇落只係跳跳吓，連手部動作都冇，不過就連 Lisa呢種資深玩家，都話自己頂盡都係跳半個鐘。「企到上棒，手部要用力壓落支棒，腳部又要用力保持平衡，所以運動量都好大，減拜拜肉同粗腿一流。」雖然 Pogo Stick好多時只係跳來跳去，不過話晒係 X game，外國唔少人都玩到打晒筋斗，但香港以女玩家為主，好少玩到練花式咁誇張。

上棒 step by step

扶實把手，先踩一隻腳上去，感受重心位置。

兩隻腳踏上後，盡量企直身體，保持平衡。

手同腳盡力壓落棒身，令其反彈，咁就可以一路跳跳跳喇！

玩家有 say　 Kitty：成日落街玩

「玩 Pogo Stick真係好方便，得閒喺屋企可以直上直落咁跳，當做運動減肥。想跳得遠啲，練得辛苦少少，隨時落街玩又得。而且易學易玩，我同好多 friend都成日約埋一齊玩。」

揀棒要夠力

有心真係玩 Pogo Stick當然要買支私家 stick啦！好在 Pogo Stick絕對唔複雜，唔似滑板咁分唔同板質、板長，或者要搞一大堆配件。 Pogo Stick只係需要先度好自己高度，最好到胸口位置，其次就係踩上棒，睇吓夠唔夠力托起個人。至於品牌， Pogo Stick直頭冇一個出名品牌，全部都係中國製，店主話：「始終佢冇配件，又唔似滑板可以加好多裝飾，冇油水撈，自然唔多廠出。」不過對 user而言，梗係好事，起碼能夠平價入手開始玩嘛！

揀 stick要注意

棒長最好可以去到胸口嘅高度，如果唔係就會曲埋身，跳唔起。

企上棒，感受 Pogo Stick夠唔夠力托起個人，彈簧唔夠力就無法彈起成個人。

Pogo三尺寸

M size適合體重 40kg以下玩家。售價：$260

L size適合體重 40kg至 55kg以下玩家。售價：$570

XL size適合體重 56kg以上玩家。售價：$660

買入後要自己組裝，惟一要注意係腳踏要上得實，因為呢部分最受力。

UStar Ka Yan　入 U試玩

聽玩家 Lisa講到咁易，係咪真先？我哋就帶埋 Pogo Stick，去到 UStar Ka Yan間大學畀佢試玩。着晒安全護具， Ka Yan好放膽企上去，初頭捉唔到重心，跳一吓就企番落地。不過唔使 15分鐘， Ka Yan已經成功連續跳到十幾下。之但係一落棒佢就話：「對我呢種冇運動底子嘅玩家， Pogo Stick其實好易學，但真係好大運動量，我已經出晒汗兼喘氣！」

Ka Yan彈起上上落落多次， Ka Yan終於捉到重心，成功係咁跳！

拎唔到平衡點，企完上去好快又跳番落嚟。

初頭驚驚哋，慢慢度好位先上棒。