So Comment

爽死甜品店　金玉滿糖

元朗人真係唔使瞓！
就連一間糖水店都由下午兩點開到凌晨一點，仲要星期一開到星期日!!!
近日去探討元朗，發現香港人最早瞓，九龍人第二，而新界元朗人係唔使瞓。香港過十點想搵啲嘢食都唔容易，酒吧就多。如果要食消夜都差不多一定要過九龍，但係元朗簡直係我後生時的 dream place，夜夜笙歌，愈夜愈精彩！

B“涼粉” OUT！金玉滿糖“爽” IN！

大菜糕＋海藻＋豆奶，食起上嚟冇涼粉咁實，似杏仁豆腐多啲，都係爽的，所以叫做「爽」。

邊個發明？

「金玉滿糖」老闆 James嘅亞嫲同亞媽。廿多年前佢哋有間冰室喺藍地，間冰室淨係賣幾樣嘢：紅豆冰、菠蘿冰、紅豆豆腐、雜果豆腐。當日亞嫲同亞媽賣嘅豆腐， James加以改良變了現在嘅「爽」！
James都係一個奇怪人，原本係教書先生，但係好鍾意，好鍾意做飲食，所以將已結業的冰室再來一次。唉！做飲食又困身，又辛苦……咁真係要好鍾意先至頂得順！

芒果爽$28

好好食呀！啲芒果又多，又香，又夠熟，所以嚿嚿都好甜，加上小小淡味的爽， perfect！芒果係腍的，「爽」係爽啲，哈哈，食起上嚟，就係爽!!!

榴槤爽$30

當然我哋要同食榴槤爽嗰三個朋友分枱坐啦！救命呀!!!但係嗰三個朋友食到不知幾開心！佢哋話啲榴槤又夠凍，其實 James係將榴槤肉加奶用 blender打爛，雪凍加上爽上，朋友話又香又滑又甜喎！

熱戀芭菲杯$48

底係一嚿 85瑞士朱古力芭菲，上一層係 cornflakes再上一層係同 raspberries， strawberries同鮮奶做的汁，頂層係雪糕加 cream，咁最普通又唔抵食了！

超值桑寄生蓮子蛋茶$18

蓮子煲 4個鐘，然後去芯，再煲到腍開花，桑寄生煲 2 1/2鐘再焗 2 1/2鐘。如果自己煲，真係嘥火。 James係古老人煮法，所以桑寄生好夠味，蓮子又夠腍。除咗大肚婆，對我呢啲大肚「 dum」都好，可以補吓個肝、個腎，又可以對風濕痛好。
大家食完飯，都可以遊吓車河入元朗搵 James嘅「金玉滿糖」補一補，爽一爽！

金玉滿糖
地址：元朗鳳攸南街 40號好順景大廈 1座地鋪
電話： 2470 0878

蘇施黃
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。

攝影：蘇施黃