博出位
喜慶事晒冷
禮物收到手軟
莊思敏每年都同 fans慶祝生日,氣氛好,又多禮物收嘛!雖然係嘈啲,但莊思敏 fans好有心思,除咗必備嘅生日蛋糕之外,仲將房間作特別布置,你睇壽星女幾滿足。
靚女祝福
王浩信、陳自瑤囡囡一歲啦,雖然仲未懂事,但阿爸阿媽就幫佢搞咗個生日會,熱鬧一番。喺《名媛望族》飾演王浩信三媽嘅江美儀仲祝「孫女」生日快樂,估唔到江美儀咁後生就做阿嫲。
自我許願
唔係個個明星都有大班人同自己慶祝生日,許廷鏗近排忙住做牙醫,惟有喺微博自我許願慶祝!最近有報道話佢為儲客,$400補一隻牙,仲樣樣嘢親力親為。鏗鏗咁忙,唔怪得冇時間慶祝生日啦!
絕種好老公
胡諾言同老婆陳琪結婚四周年,計埋拍拖嗰七年,嘩!兩個恩愛咗十一年,難得胡諾言仲 keep住咁錫老婆,又肯花心思同老婆慶祝結婚周年,抵讚!
演員破冰
32歲朱慧敏上年拍《愛.回家》時傳出擺阿姐款,意見多多得罪同劇成村人。不過上周一( 22日)成班同劇演員同朱慧敏慶祝生日,買埋生日蛋糕,睇嚟佢哋 friend番喎!
愛人同慶
喺有線娛樂台做主持起朵的陸浩明,最近簽咗無綫,準備大展拳腳。上周六( 27日)陸浩明上載生日照上微博,對住個「 I LOVE U」生日蛋糕,一定係愛人送啦,連以前舊同事余思敏老公鄭中基都有留言祝賀。
全站熱搜
留言列表