cover face
熊黛林 強人是我
纖瘦身形、水靈大眼、嬌嗲聲線，男人眼中的熊黛林，性感又惹人憐愛。
今日，阿 Lynn卻告訴我，她並不如大家所想般柔弱。
這半年間，喪父兼失戀，既要安撫家人傷痛，又要面對流言蜚語，任誰都不得不堅強吧！
早前，我們才一隊人興致勃勃飛往巴黎影相，她還暗示「富黛戀」逐漸明朗化，心情份外輕鬆云云……士別數月，忽發單身微博，個個嚇親。真箇世事難料！
分手已成定局，「小三」又好，「劈腿」也罷，反正，局外人就是局外人，這輩子也別想找到真相，自己倒是疊埋心水，買完鑽戒（戴在尾指，意指失婚/戀），再孖住老友韓國散心，物質填膺，順便證明我熊黛林使錢唔使靠男人，不做「天王嫂」，一樣逍遙自在。
Profile
Lynn Xiong
出生日期： 1980年 10月 10日（天秤座）
出生地：南京
身高： 5呎 10吋
體重： 105磅
三圍： 33-24-34
語言：普通話及廣東話
學歷：蘇州大學服裝設計與表演系一年級
簡歷： 99年，在上海獲得「中國民族模特大賽」季軍。 02年，被媒體選為「中國最佳時裝模特兒」及「中國十佳模特兒」。 06年，來港發展。 08年，參予電影演出，正式轉型。
主要作品：電影《葉問》（ 08），《花田囍事 2010》（ 10），《男人如衣服》（ 12）。電視劇（台灣）《拜金女王》（ 11）。
微博： http://weibo.com/lynnhung1010 
我唔想後悔
「富黛戀」一直予人男尊女卑感覺，大家估唔到分手是由女方宣佈，反客為主。由 16號晚微博發佈單身宣言，至今半個月， Lynn已逐漸收拾心情，態度果斷明確。
「過去就過去，依家重新開始，我係單身！」
七年情難分難解，大家原以為已走入大直路的一段情，突然觸礁，真的突然到不得了，當然，對我們來說是「突然」，也許，當事人早着先機都未定。
「我唔係大家想像中咁柔弱！
「十幾年前，自己一個人由南京去上海做 model，再來香港，咪又係乜都自己面對，由始至終，我都係自己一個人，冇乜嘢事係克服唔到。」說來有點淒楚，或者真係看官們一廂情願，以為她脆弱、易受傷，是金絲雀。
06年「富黛戀」就係拍 MV《風之子》定情。《壹週刊》圖片 
11年帶同媽咪一齊出席慈善活動，兩母女已非首次孖住公開露面。《蘋果日報》圖片 
13年3月睇完城城演唱會，即跟朋友回南京探親，微博寫住「南京鴨血粉絲湯」我見到都流口水。熊黛林微博圖片
但，對於一個女人，尤其是模特兒來說，青春就是最大本錢，黃金七年如流水一去不返，旁人（包括我）都大嘆可惜。
「冇話可唔可惜，由得佢過去，最緊要俾機會自己重新開始。」
放低了嗎？「點都要放低，向前看；「有啲事情，既然發生咗、決定咗，就要面對，我唔鍾意拖泥帶水，更加唔想做令自己後悔嘅事。」對的，走得撇脫，才不至於一敗塗地。
若感情走到盡頭，分手並非壞事，然而，公眾人物還多一層顧慮，流言滿天飛，面對惡言，繼續微博發功：「……惡意污衊……拿出證據來……恕不奉陪。」少有鮮明地表明立場，其挺然捍衞自己尊嚴的態度，我多想拍手鼓勵。
「只想做番自己。」
沒轉圜餘地嗎？「 Never say never。」兜個圈，為事情打圓場，證明人去矣，情卻未冷。
心情幾好
療情傷，最好方法莫過於購物，係㗎！膚淺，但有效。
事發後， Lynn跟老友飛韓國散心，「唔係為情避走韓國，我係 model，唔係一般朝 9晚 5嘅 OL，唔係咁易放假，呢個假期，我一早跟朋友夾定。
「去明洞 shopping，又周圍食好多嘢，玩足 5日，心情幾好。
「之前去過兩次只係工作，走馬看花，好想真正放假去玩去歎。」開心還開心，水土不服弄至面青唇白回港，又被認定情傷失落。
今日的她，一切還好。
自強不息，為自己，也為家人，現在，已是一家之主，不只母親，就連大哥也聽自己話，「媽咪同爸爸一直夫唱婦隨，感情好好，爸爸走先，我好怕媽咪覺得孤單，佢辛苦咗大半世，我依家只想佢開開心心。
「自己工作忙，兩、三個月至返老家一次，最近，索性叫媽咪申請來港定居，我要日日食到佢煮嘅飯至心足。」
孝字行先，會否考慮減少工作，照顧屋企？「我反而希望可以更多工作，有事業，賺到錢，家人至幸福。
「南京女人就係咁，有責任心，再傷再苦都唔會講出口，依然笑面迎人。」
後記
巴黎行， Lynn買到一條 30年代 Chanel古董珠鏈，韓國行，亦被拍到一袋袋 Chanel戰利品。
女人最緊要善待自己。
縱使遭人非議物質化，但我估，買吓香奈兒，唔使花盡身家啩！拜金，自己搵自己使，犯不着閣下肉赤啫！
謹祝 Lynn重新振作，真正幸福。
Shop List
COMME des GARÇONS中環雪廠街 10號地庫 B2號鋪 2869 5906
I.T中環雪廠街 10號地庫 B1號鋪 2147 5077/銅鑼灣希慎道 1號 1樓 2890 7329
Maison Martin Margiela中環雪廠街 10號地下 7號鋪 2869 7707
撰文： Nicola Lai
形象： Karen Ling
攝影： Parry Fung
化妝： Katherine Tsang
髮型： Carr Cheng@P.O.P Eight
鳴謝： I.T
留言列表
