貓狗大合照邵音音家中養了多隻貓狗,而小狗一般都活到 20歲以上,比大種狗長命十歲八歲。她說家中狗狗們平時吃人類的食物多過狗糧,可能正是長壽原因。真係信不信由你。
星悅居
邵音音 寶藏屋
《低俗喜劇》飾演「暴龍哥」的鄭中基,硬要邵音音做三級片《官人我又要》的女主角。無他嘅,當年一代艷星邵音音的《官人我要》紅爆影壇,至今無人可取替。
現實生活中的邵音音有個傳統的家,在九龍塘的三千呎的洋樓,擺放的裝飾陳設全部獨一無二,當中包括價值過千萬的油畫,以及盛惠三十八萬的酸枝餐枱。屋內件件寶物……與邵音音一樣,殊不簡單。
外公真跡邵音音的外公愛畫畫,識貨的她家中藏有外公畫的孔雀及公雞畫,「我外公嘅畫功好勁,畫山水好有神。呢幾張係我最鍾意嘅,仲有好多放喺倉呀!」
七彩自畫像估唔到邵音音都好有畫畫天份,「呢幅自畫像好多年前畫,當時我對住自己張相,都畫咗幾日!」幅畫用色繽紛,睇見都覺得開心。
千萬名畫這幅出自日本畫家的華南老虎畫,老虎的確栩栩如生,邵音音話幅畫估值過千萬,「你咪寫出嚟呀,一陣啲賊以為呢度好多嘢偷呀。」唔好意思,有好嘢當然要公諸同好。
美人照邵音音後生時風華絕代,迷倒不少影迷,難怪「暴龍哥」鄭中基稱她為女神。大廳隨處可見她的陳年靚相,仲有電影《大軍閥》的劇照,得閒可以緬懷過去。
最佳女配角邵音音 08年憑在《野·良犬》演惡毒婆婆,獲得金像獎最佳女配角,三年後憑《打擂台》再 encore,兩個獎都得來不易,咁有紀念價值當然珍而重之。
令狐沖 figure「呢個令狐沖造型公仔全世界得一個,整呢個公仔嘅人原本想送俾飾演過令狐沖嘅許冠傑,但我同佢講:『你唔會見到佢,不如送俾我算啦!』」就係咁,邵音音就據為己有。
一屋名畫
音音姐除了拍電影之外,其餘時間都喜歡留在家中,她說閒時愛細看家裏的大小擺設,每件都有它的故事,「呢幅老虎畫,係一個日本畫家畫嘅,依家估值過千萬呀,係以前一位朋友送俾我㗎!我好鍾意畫畫,可能係遺傳啦。嗱,呢幾幅都係我外公畫嘅,大師級水準㗎!我都有一幅自畫像,都見得吓人嘅!哈哈!」
原來音音姐坦言最大的興趣並非畫畫,而是打二人麻雀。放在大廳當眼處充滿古典味的麻雀枱,是多年前由意大利訂造回來的,中間有個中國象棋棋盤,但她甚少下棋。說時遲那時快,門鐘響起,一名麻雀腳來訪,邵音音姐親自開門迎接:「佢又嚟送錢我使,我呢種二人台灣牌好古怪,無乜人識打,不過就好過癮。你(指記者)自便,有咩要我配合就叫我啦!」說罷她就點煙,開始二人竹戰。佢咁愛攻打四方城,大可拍套《麻雀我要》喎!
古董餐枱飯廳中央的意大利木製餐枱歷史悠久,價值 38萬,「我最鍾意圓枱,一家人食飯距離點都唔會好遠,唔似西式長枱,遠到傾唔到偈!」
二人麻雀家訪中途突然殺出隻麻雀腳,邵音音笑說:「我鍾意打二人麻雀,打完返唔到轉頭!」既然鍾意打牌,麻雀枱都要講究,張枱由意大利空運抵港,夠晒巴閉。
阿女愛音樂邵音音有一對仔女,兩人早前在澳洲畢業返港,現與母親一同居住。女兒 Jean(紅衫者)最愛音樂,睡房放了鋼琴及數碼琴,採訪當日更與男友(右)一起 jam歌。
Jean喜愛旅遊,早前孭背包遊蒙古,買了數個羊奶樽回來,放在房內的高處。