揞名爆
「跌膊」登台貪盡便宜
「跌膊」年紀雖然唔細，但有一定知名度，又 keep得唔錯，一副性感靚太樣！所以近年喺內地周不時有劇拍，又有登台騷做。
唔知係咪因為好景啦，呢位花瓶女星都好有「原則」㗎。登台前講到明，只會同主辦單位喺後台影十張相咁大把！你知啦，啲明星平時返內地登台，閒閒哋俾主辦單位啲姨媽姑姐領導幹部拉住影幾十張。所以，搵「跌膊」登台嘅中間人聽到佢開咁嘅條件都好頭痕！而去到登台場地，「跌膊」亦真係影完十張就黑面走開，戲都懶得同你交呀。
好好好，咁有啲嘢無得迫嘅。估唔到嘅係，「跌膊」帶住化妝、髮型同助手等一行七人去登台，主辦單位提供咗三間房俾佢哋住兩日一夜，最後埋單計數，每間房分別嗌咗成六千蚊 room service，再掃走晒房中 mini bar嘅所有酒同零食！嘩嘩嘩！有無咁餓？有無咁食得呀？睇嚟「跌膊」佢哋嗌完鮑魚做早餐，又用魚翅嚟撩牙囉。主辦單位見到張單，眼都凸埋！局住照俾嘅，但有無下次呢？你話嘞。
邊個係「跌膊」？
全站熱搜
留言列表
