「企業號」嘅主要成員（左起）「卻克船長」、女通訊員 Uhura、「冼樸」，全部由第一集演員續演。據初步影評表示，今集動作、娛樂兼備，相當好評。 

來路貨

《星空奇遇記》　英勇未變質

又話五十年不變，我呸！
麥記家下賣埋飯，廉記依家乜都貪！
天呀！呢個世界究竟變成點？
都係《星空奇遇記》好！由 1966面世至今，翻拍重拍或者續集，一班主角依然緊守崗位，維持宇宙秩序！今次續集《黑域時空》，「卻克隊長」、「冼樸」原班人馬再度伸張正義。講真，冇乜新意㗎啦，不過呢種基本核心價值，喺現世代已經買少見少了。

導演 J.J. Abrams曾製作《特務 A》、《迷》等經典劇集。嚟緊佢將會執導《星戰 7》，就唔知佢能唔能夠延續呢個經典神話。 

要追溯《星空奇遇記》系列歷史的話，分分鐘老過你同我。
唔係我扮後生吖，整個系列，真正睇過嘅，只有 2009年 reboot版本。當時導演 J.J. Abrams保證，電影可以獨立睇，即使唔係系列粉絲都會睇得明。結果新知舊雨齊齊朝聖，電影全球狂數 3億 8千萬美元，成功「重新」打入市場。

大導玩新技術

下一步，當然就係拍續集。今次《黑域時空》（美國、香港 5月 16日同步上映）由原班演員「卻克船長」 Chris Pine、「冼樸」 Zachary Quinto等續拍， J.J. Abrams亦留低執導。據講初頭未有劇本時，佢都心大心細唔知接唔接好。不過劇本一出，大導放心晒，仲自動請纓拍 IMAX版。
電影公司眼見 J.J.咁高興，索性玩大啲，叫佢拍埋 3D。大導聽到都有啲抗拒，不過最終傾掂數，先拍 IMAX再後期加工變 3D，技術上算係開創先河，效果更足以媲美《阿凡達》。

「卻克船長」拯救其他星球時，為救隊友鋌而走險犯禁。當中嘅外星人由真人扮演，唔係電腦效果咁簡單。 

上一集留低嘅伏線之一，就係「冼樸」同女通訊員 Uhura嘅感情線。今集， encore再續。 

卻克船長今次開齋有女溝，新加入嘅艾麗絲伊芙飾演美女科學家，喺追捕恐怖分子時同船長擦出愛火花。

叛將作反

咁劇情講乜呢？講「企業號」一班成員，喺「卻克船長」帶領下拯救其他星球，途中船長因救「冼樸」而觸犯艦隊守則，被降職為副官，「冼樸」則調職去第二艘船。兩個正義朋友監生拆開，咁就出事嘞！
宇宙艦隊倫敦分部被炸爛，調查之下，恐襲分子原來係艦隊叛將。佢矢言要摧毀宇宙艦隊同整個地球聯邦，搞到人心惶惶。呢個 moment，「企業號」成班正義之師再度集合，勢要挑戰惡勢力。預告埋俾大家聽， J.J.已計劃開拍第三集， 2016到時再一齊打怪物。

新加入奸角班尼狄甘巴貝治，憑電視劇《新福爾摩斯》大紅。早前英國《太陽報》舉辦性感男士選舉，班尼狄竟連續兩年力壓碧咸稱冠。 


以往《星空奇遇記》。只會以紙板布景一幕幕拍攝。不過今次將會製作整艘「企業號」，由演員帶領觀眾「繞場一周」，增強整體性及真實感。 

地球聯邦被襲擊，就連「企業號」亦遭受攻擊，傷亡慘重。 

撰文：娛樂組