媽咪姐
《金枝貳》編審寸鄧萃雯係老鼠
《金枝慾孽貳》收視低見 18點，跌破 2字頭，無綫連環出招救亡。不過你有你救火，女主角鄧萃雯就繼續「噴火」。之前佢插完「零劇本」同宣傳照「被改到好醜」後，繼續喺微博向編審周旭明隔空開火。
周旭明接受《南方都市報》訪問，炮轟雯女，後者即日喺微博還火。咦，仲好睇過套劇喎！
事緣雯女早前接受訪問時明言：「今次如妃人性化咗，但角色創作上有先天不足，令角色唔夠突出。」暗指編審周旭明劇本唔夠細膩。周二（ 14日）輪到周旭明以「老鼠」比喻雯女：「有時我悲觀咁諗，船要沉，總有人扮老鼠先走，呢次就俾我有咁嘅感覺。」報道出街後，雯女嗱嗱臨發微博話：「我沒有甚麼了不起更沒甚麼輸不起，不致介懷船會沉……你喜歡任性，不顧幕後人員和演員要有時間準備的需要，那就一同來承擔後果。」
兩人愈鬧愈激，鄧萃雯仲聲言：「如果我妥協，遵照遊戲規則（飛紙仔）才可玩下去，我會選擇唔玩。」暗指大家唔會再有合作機會。嘩，玩到咁盡，其實係咪一種宣傳手法呢？
「如妃」有「如妃」繼續插，「高流斐」陳豪同「木都兒」龔嘉欣依然試圖力挽狂瀾。周三（ 15日）又着靚靚出嚟宣傳《金枝貳》。以咁嘅宣傳密度，睇怕要 call多幾間服裝 sponsor先掂！
全站熱搜
留言列表
