Mandy Lieu綠色喱士上衣$499綠色喱士及膝半截裙$469閃石頸鏈$249紅色高踭鞋$799all Marks& Spencer紅黑格仔襪 stylist's own
cover face
Mandy Lieu Enjoy Life
對於某些人來說，生命很漫長，每天等放工，每月等出糧，每年等轉工，半輩子等結婚生仔買樓再等供滿層樓，無邊際地等下去。
對於某些人來說，生命很短促，一邊行，一邊細味，不會白過。
Mandy獨活在港，也曾等着日子過，要不開工等收工，閒日等朋友 call，要不一股腦兒談戀愛，用盡方法填滿生活，只因寂寞，一味等「節目」來刺激生活。
處境是否熟口熟面？
幸好，神遊完印度，開竅了，「拮串魚蛋也開心。」
賺到錢不等於賺到快樂， enjoy life豈不更實際？
倘若做人有得揀，我希望大家都識揀。
Profile
劉碧麗
出生日期： 1985年 3月 20日（雙魚座）
出生地：馬來西亞（父為美國人、母為馬來西亞華僑。）
身高： 5呎 8吋
體重： 106磅
三圍： 32-24-34
語言：廣東話、普通話及英語。
簡歷： 16歲，在馬來西亞當業餘模特兒。 03年，來港發展，跟周星馳合作拍廣告，成為新一代「啤妹」而走紅。
主要作品：廣告，生力啤（ 03）。電視主持， now《 Lifetival》（ 09-11）。
微博： http://weibo.com/elitemandylieu 
我唔怕失敗
拍攝順利也要 4粒鐘，完成後，方有機會埋身聊聊天， Mandy朗朗笑聲，將倦容完全掩蓋，工作一天，雙目依然炯炯有神。
計劃當前，返意大利補拍旅遊特輯，下一站想去南美洲，自家製作公司正物色平台播放節目，除了生意，又想拍戲，現階段，兩者均在接洽中；周身刀，究竟你想點？
「好多人問過我同一個問題『你最鍾意做乜？』諗唔到，唔係冇，係太多，唔知點樣 edit講俾大家知；「自細鍾意跳芭蕾舞，媽咪話『做芭蕾舞家賺唔到錢』傳統家庭傳統想法，但無損興致，拼命日日跳日日練，家人都唔敢 stop我，最終，考獲皇家芭蕾舞學院的表演級及導師資格。每逢學校考試，足不出戶，契媽要諗計仔引我出房，大家至有機會一齊食個飯或食件 cheese cake輕鬆一下，我做事就係喜歡 all in兼挑戰自己。
「唔怕失敗，自己有一個信念：經歷只當教訓。
「馬來西亞長大，想都未想過有機會出國，來港生活，日日打電話搵契媽傾訴，一放假就即刻訂機票返屋企，當時，根本唔識得獨處。之後，去意大利工作，見識當地人對生活嘅熱誠，好感動，啟發我檢視當下生活態度。
「我去過 3次佛羅倫斯，每次見到同一個人喺一條舊橋上自彈自唱，佢唔介意別人眼光、唔理 CD幾多人買，只講『能夠喺呢度睇住日落唱歌已心足』；又遇到一個女甜品師傅，一講起自家製朱古力猛流口水，我問自己『點解佢哋生活可以咁滿足？』
「原來，世界好美麗——咁講係老套，但咁諗可令生活更加 enjoyable。
「自己一向好鍾意接觸新事物，乜都想知、想試，唔想因為怕失敗乜都唔敢去做，到老至識講『假如』、『如果』；做咗先，唔得的話，拍吓自己膊頭『你已努力， move on。』
「自從拍過馮德倫《太極》，愛上演戲，當我進入角色，等於走入另一個世界，感覺好特別，好想再拍，我自知外形局限，唔算好 Chinese，中文麻麻哋， take it day by day，有機會的話， why not？
「我係一個好積極爭取所想所要嘅人，工作之外，拍拖亦然。」
13年去到印度，每朝早起做完靈修和瑜伽，還學製印度傳統藥方 ayurvedic medicine，經驗難得。《蘋果日報》圖片 
10年除了芭蕾舞， Mandy的琴技也達演奏級水準，一見鋼琴，即撲上前陶醉一番。 
11年為中央電視台電影頻道拍攝音樂電影《凱撒》，飾演埃及妖后。
Mandy Lieu
黑白條子恤衫$499
黑白橫間半截裙$469
銀色吊墜耳環$169
黑色短襪$99/ 3對
黑色喱士高踭鞋$449
all Marks& Spencer
做自己個伴
跟 Mandy聊一聊，你會感覺到，她一直很用勁地為自己打氣，笑聲有點 hyper，直至承認寂寞，一剎那神傷，這才算「回復正常」，畢竟，單身女仔離鄉別井又沒拍拖，難免失落，現在，已找到出路，好為未來加把勁。
「單身之後，我好寂寞，一靜下來就好驚，直至去完印度，方學懂自己做自己個伴， silence好寶貴。
「人生不斷由一段關係走去另一段關係，家人、朋友、拍拖，當中點都會切開自己少少部份去跟別人磨合，到頭來，最唔了解自己。得閒靜落嚟問吓自己鍾意邊隻香薰、邊種音樂、邊個導演、邊種食物，多發掘自己，漸漸唔再害怕獨處，相反，時間愈來愈唔夠用，最好一日 32小時。
「依家，一早起身打坐 15分鐘，我係初哥咋！師傅話，撥開腦內所有雜念係好難好難，即使只有兩秒安靜，已算成功。好天氣的話，去行山，身水身汗順便去埋街市買餸，返屋企執屋洗衫洗嚤所，再去見朋友，一日就過。
「以前，個個朋友都有一個 career plan，好驚！成日問自己，銀行戶口要有幾多錢至夠？想去流浪，家人點呢？到時到候，係咪要拍拖呢？其實，使乜咁緊張？！
「我鍾意濕草、落雨、海邊、木等香味，意大利認識一個香水師，調出我講嘅呢種味道，腥到呢！對方笑笑口『香味係語言，細心留意，才會明白別人意思。』做人打開心扉，一定可以得到更多。
「早前，搵人改名，暫時幾鍾意『劉璦嘉』，仲以為家庭個『家』字，劉愛家、劉黐家之類，啱晒我啦！跟契媽商量一下，睇吓佢鍾唔鍾意。
「就快到 30歲，唔驚，呢個世代已唔興咁快結婚生仔，況且，我仲未好好 enjoy life。」
Mandy Lieu
彩色花卉圖案外套$899
粉藍色麻質長褲$749
金銀色長頸鏈$249
民族吊墜耳環$169
all Marks& Spencer
白色背心 stylist's own
Mandy Lieu
粉藍色麻質西裝外套$899
粉藍色長背心$749
藍色綴窩釘手帶各$169
金銀色手鏈套裝（ 4條）$169
銀色閃石及珍珠手鏈套裝$169
白色蛇紋平底鞋$699
all Marks& Spencer
黑白色絲襪 stylist's own
Mandy's tips
Q：對於英國時裝有甚麼見解？
A：英國人好叻，擅長營造一個不刻意造型，好特別，將 casual chic玩到出神入化。
Q：最喜歡哪個時期的英倫時裝？
A： Johanna將一件件間條恤衫、格仔配飾、黑與白歸納成 mod look，好正，自己穿衣喜歡簡單，正好偷師。
後記
Mandy首次跟時裝設計師 Johanna Ho合作，對方為她造型，二人鬼聲鬼氣，甫見面，即轉 channel英文對答，份外投契。
Johanna覺得， Mandy有一股悠閒自若的氣質，很適合演繹英倫淑女的風格。
淑女通常系出名門，傳統淑女更要知書識禮，然而， Mandy沒唸過大學，遺憾嗎？「冇所謂，只要增值自己，我最大興趣睇書，算係一個 escape（逃避），逃離現實，跳入另一個國度/時空，等於免費去旅行，好正。」
逃避現實有時也是一種享受吧。
Marks& Spencer 中環皇后大道中 28號中滙大廈 2921 8323
撰文：伍淑嫻
形象： Johanna Ho
美術指導： Karen Ling
攝影： Parry Fung
化妝： Anna Wong@ZING the makeup school
髮型： Adrian Au@Beijing Hair Culture
鳴謝： Marks& Spencer
留言列表
