求愛大作戰 導師搶盛男鏡 綠魔 Karl 唔男唔女 狂接投訴
■Karl穿上圍裙又搔首弄姿，頂得住冇？
互聯網圖片
無綫去年節目《盛女愛作戰》掀起熱話，複製盛男版《求愛大作戰》前晚首播，盛男未出擊媾女，已遭導師反搶鏡。首集焦點，形象指導Karl Hui妖爆出場，唯一女導師陳莉敏（Queenie）則尖酸刻薄挑剔參賽者，一班盛男及導師前晚包場開P兼睇首播。
《盛女》難忘人生教練Santino的45度冧仔甫士，《求愛》的Karl則以青蛙綠衣襯短褲晒腿，更set了高髻，舉手投足都姣爆，遭網民討論「綠魔」Karl到底男定女。Karl被起底，自稱公關的他近年頻頻傍實𡃁模李蘊、張暖雅、黃榕及趙哲妤，甚至莊思敏等出席活動。黃榕更視Karl為密友，經常在社交網貼上對方「嚇」人照，還肉緊暱稱他做「小賤賤」。
「唔排除鍾意同性」
對於被網民懷疑性別及鬧爆作狀，Karl昨日在電話中說：「我當然係男！」性取向呢？他搶答：「我鍾意女仔，唔排除將來鍾意同性，我有條open line。」對於遭網民圍插，Karl說：「我尊重每個人嘅意見。」他自爆「綠魔」look出自韓國設計師，但據知他去年生日已穿過，他更預告會有誇張造型出鏡。而Queenie在《盛女》時也曾任導師，任職玄學家的導師陳定邦，則是戴夢夢舊愛。
■Karl晒腿又set晒頭，幾乎lady過陳莉敏。 
■黃榕肉緊暱稱Karl做「小賤賤」。
互聯網圖片 
■Karl昨晚着粉紅色短褲，比趙哲妤更姣。
另外，Karl昨晚跟𡃁模趙哲妤在銅鑼灣出席時裝店開幕活動，姍姍來遲的Karl表示心情沒受負面評語影響，他自爆長髮吸引異性，趙哲妤則笑指Karl的雙腿曾吸引她的舊愛，並說：「我哋出trip同過房。」
《求愛》首播，通訊事務管理局接獲14宗投訴，指評審不專業，內容無聊及帶有歧視成份，形象顧問的造型及聲線令人不安，又貶低男性地位及教壞年輕人等。無綫則接到6宗投訴，有指出Karl造型不男不女，無綫外事部副總監曾醒明昨日說：「佢中性打扮，不男不女觀眾先反感，但作為形象指導，已成功突出自己。」《求愛》首播平均收視18點（約116萬觀眾），最高20點（約128萬觀眾），節目高潮會安排4盛男配4盛女到峇里拍外景。
採訪：比華利、文國駿、何慧斯
攝影：黃偉雄
留言列表
