Webber

窮飛龍　唔再窮

憑住二次創作〈陀飛輪〉歌詞而成名嘅改歌團體「窮飛龍」，起初只為好玩，將自製 MV放上 YouTube同各大 forum。
事隔 3年，旗下 MV已經坐擁幾百萬點擊率，係香港嘅網絡紅人，唔只出過唱片同書賣錢，仲有商場畀錢搵佢哋合作宣傳，原來玩二次創作都賺到錢！當日〈窮飛龍〉首歌唱嘅窮青境況，今日實唔適用喺「窮飛龍」身上，但就為一班仍為興趣改歌嘅網民指引出商機。

Webber's Profile窮飛龍

現時成員： 4個（負責編曲的 Roy缺席訪問）
拍片資歷：約 3年
作品總數： 54
總 hit rate：超過 685萬
subscribers：接近 22,000

你哋覺得點解會俾人睇中、請你哋做 event或出 show？

2010年成名作〈窮飛龍〉嘅 24萬點擊率雖唔及後來嘅〈葉問曲中轉〉同〈補貼屋〉，但因講中晒窮青心聲，當年喺 facebook廣傳，一炮令窮飛龍爆紅。 

可能因為我哋本身都係音樂人，點都做到啲表演啩！最主要相信係我哋唱好多民生歌，啲主辦單位會覺得我哋貼近觀眾，同其他 YouTuber有啲唔同。不過我哋個名有個「窮」字，啲商業機構可能好驟忌，之前都冇諗過有人請我哋做嘢，或者我哋應該改改名，哈哈哈（講笑）！

其實放片上 YouTube係咪都有錢收？

同年惡搞林峰首〈直到你不找我〉而成講賜座男事件嘅〈直到你刮到我〉，至今超過 154萬點擊率。但由於個 MV由導演 a/c發表，所以啲 hit rate冇計入窮飛龍自己個 channel。 

有㗎！其實早幾個月 YouTube開始聯絡過好多 YouTuber，自動提出放片分錢嘅機制。其他人唔知，我哋就大約係 10幾萬點擊就會分到$1,000左右。不過我哋唔會狂谷 YouTube片去賺錢，事關佢哋能夠隨時改制，話唔定第時會因為你 subscribers多而收你錢添，唔可以太信 YouTube㗎，哈！

有冇諗過點樣令你哋知名度再提高啲？

2011年獲唱片公司投資出書+CD〈直到你惡搞我〉，正式踩入商業市場，最後 2,000隻全部賣光。 

其實我哋都試緊改歌以外嘅嘢，好似已經拍咗唔少微電影同網劇。因為以前淨係改歌，我哋只吸納到一班對時事有興趣，或者鍾意聽歌嘅人，但我哋拍埋一啲 funny movie，可能會吸納到其他唔同層面嘅觀眾。同埋我哋都愈嚟愈多同其他網絡紅人合作拍片，佢哋未必好叻唱歌，所以要試吓拍其他類型片。

萬一將二次創作列為刑事嘅網絡廿三條重臨，點算？

其實我哋之前出過碟，都試過向原作者申請版權，例如改編〈囍帖街〉嘅〈補貼屋〉。不過，我哋本身都有做開原創音樂，就好似〈蝗蟲天下 2012〉，我哋就係用番高登巴打嘅詞，然後自己作全新嘅 melody，已經完全脫離晒原曲，再冇版權問題。萬一再推網絡廿三條，而申請版權又可能要審核歌詞，太煩的話我哋或者會轉晒做原創。

呢個禮拜窮飛龍獲邀出席荷里活廣場舉辦嘅幽默文化展，同「燦神」廖偉雄同場做宣傳。 

趁住父親節，窮飛龍將網絡 hit歌〈是是但但隨隨便便求求其其〉改詞成讚美父親嘅〈萬能爸爸〉新歌 MV喺《 FACE》 YouTube channel有得睇。 

撰文：陳兆奇
攝影：葉偉豪
鳴謝：荷里活廣場