阿柔　 20歲城市大學副學士康樂及旅遊系 Yr.1展覽會內的活動有很多，所以阿柔要定時在人流較多的地方舉起活動告示，通知客人活動流程。 

青雲路

暑期工賺錢賺經驗

暑期已到，有些同學仔選擇享受這個悠長假期，在家中打機，和朋友一起吃喝玩樂；但有些學生卻選擇打暑期工，除了可以賺取外快外，打暑期工還可以令自己提早接觸社會，汲取工作經驗，讓自己認清未來方向。

CASE 1：做展覽會 helper學溝通技巧

「今日我嘅工作係做展覽會管理部嘅服務大使，主要解答客人嘅疑問，首先我要知道成個展覽會嘅流程，好似某某座談會幾時開始，至到泊車地點喺邊我都要知。最緊要答得夠 pro，唔可以有半點猶豫，所以事前一日我已經拎住本展覽會介紹返屋企溫書。」採訪當日，香港會議展覽中心正進行《香港貿發局創業日》展覽會，阿柔是 helper之一。
2年前，阿柔經表哥介紹下入行做展覽會 helper，「嗰時表哥讀緊大學，我就考完 A-Level想搵份暑期工，但又唔想做 sales，聽表哥話展覽會有好多主題，會接觸到好多唔同國籍嘅人，練到英文之餘，又可增強到溝通技巧，最緊要係唔會悶，所以決定 in呢份工。」阿柔指工作崗位每次都不同，例如有控制人流、到場內派小冊子和做問卷調查等，令她覺得很有新鮮感和挑戰性。

被客大罵練 EQ

每個展覽會都會派發會場刊物，阿柔說：「淨係派係唔夠㗎，加埋笑容咁先夠 pro。』 

去年 5月舉辦的 Art Fair，阿柔試過被客人無理大罵，令她學懂日後投身社會凡事要忍耐，「上年 Art Fair，我主要負責 Information Centre，當時我正在解答一個外國遊客嘅問題，而後面有一個華人打尖要求我答咗佢問題先，我好禮貌咁同佢解釋要排隊，點知佢就破口大罵，話我種族歧視、崇洋，外國客人見到佢個樣咁不滿，所以讓咗畀佢先，而個華人仍然繼續鬧，嗰吓雖然我好難受，但都要不停同佢道歉，最後個華人都平伏咗，同事都讚我 EQ高。」
展覽會的工作時間很自由，所以阿柔在暑假期間仍有時間進修，「到目前為止， 4月中到𠵱家我總共返咗 4個展覽會，時間一就到我就會返。每個展覽會通常舉行 3日到 1星期不等，每日返 6至 10個鐘，所以我趁空檔時間去學日文，增值自己。」阿柔的時薪約由$40至$50不等，每個月大約工作 2星期，每月收入約$4,000。

點入行？

Manpower營運總監余美珠小姐 

Manpower營運總監余美珠小姐表示，公司會因應員工的能力來安排工位崗位，「我哋所提供嘅工種主要係展覽會 helper，假如員工識其他語言例如西班牙及法文等外語，我哋可以安排翻譯工作畀佢哋，時薪最高可以去到$130，因能力而定。」暑假期間約有 25個展覽會，當中包括書展、動漫展、珠寶展等等， Manpower會安排員工往不同的展覽會工作。

機構： Manpower
職位：暑期展覽會 Helper
要求：中七或以上，經驗不拘。
工作時間： 5月到 9月
起薪點：時薪$40起。
應徵方法： mailto:jobs.manpower.com.hk/user/about.cfm

CASE 2：做侍應見世面

Candice　 18歲Hong Kong U Space Y.r1初初入行時， Candice並不習慣傳餐，但經過兩星期磨練後，她已經對此工作游刃有餘。 

「我𠵱家喺銅鑼灣嘅分店做侍應，平時主要係幫客人落 order、傳餐同介紹 menu上面嘅食物畀客人，喺日本餐廳做嘢最重要係有禮貌，因為日本人本身好講究禮貌，我哋要營造呢個氣氛畀客人，佢哋先會食得舒服。」 Candice自上年 6月開始便在 Tonkichi打工做侍應，「上年考完 DSE等緊成績，又想搵外快，咁啱網上睇到呢度請暑假工，所以嚟咗見工，最後公司都請咗我。」
打第一份工難免會感覺緊張，怕自己應付不來， Candice也不例外，幸好有一班同事支持她，「初時入行真係唔習慣，每日企成 6個鐘，傳餐又重，不過同事好好，見我做唔慣都會主動幫我，令我更加有推動力做好佢，一星期後我已經習慣咗。」

服侍客人領略辛酸

從事服務業少不免會遇到難服侍的客人，這令 Candice領略到工作的辛酸，「試過有個客，唔出聲自己一個行入嚟，坐大約 10分鐘就開始叫嘢食，但佢嘅叫法係每次只叫一樣嘢食，每次當你落完單，到上菜時佢就會叫第二樣，來來回回差不多叫咗 10次，嗰段時間我只係招呼到佢，雖然佢可能係專登，但我都要面帶笑容 serve佢，因為着住件制服就係代表公司，唔可以做壞公司個名。」
現時 Candice每星期工作 27小時，月入約$4,000。 Candice指打暑期工，令她明白金錢是得來不易，更明白到父母工作的辛酸，所以她希望更努力讀書，不會浪費父母多年來供書教學的血汗錢。

點入行？

Tonkichi Tonkatsu Seafood人力資源部經理 Sue表示，公司會因應員工的意向來分配工作，「員工入職時可以因應自己能力同興趣揀做侍應或者廚房，令佢哋真正發揮到自己嘅長處。』

機構： Tonkichi
Tonkatsu Seafood
職位：暑期服務大使
空缺： 10個
要求：中五或以上，經驗不拘，有禮貌。
工作時間： 5月到 9月
起薪點：時薪$35起
應徵方法： mailto:recruit@pokkacafe.com

CASE 3：做偵探學徒發現路向

Louie　 21歲全職偵探因怕暴露身份， Louie不能正面上鏡，她指跟蹤時要保持十米距離，並且要找障礙物作掩護。 

「平時我主要係跟蹤客人嘅目標，唔好俾佢哋走甩，同時又唔可以俾對方發現，得到目標人物嘅行蹤後，我就要報告上司，所以呢份工都好有挑戰性，同好刺激。」 Louie上年 8月在宏智國際調查顧問公司打暑期工，任職偵探學徒，今年在科大畢業的她，已決定做全職偵探。
「自己打算畢業後考警察，覺得有正義感同埋可以查案，咁啱上年暑假上網見到呢度請人，做落好有興趣，好有活力可以四圍走，覺得相比起警察，做偵探接觸查案嘅機會可能仲大，所以決定全職入行。」

跟蹤技巧很多學問

出外調查前，一定要準備充足，「我𠵱家上網溫習緊行動地點嘅地圖，做我哋呢行一定要熟路，咁先唔會俾目標人物走甩。』

現時 Louie接到的 case多為婚外情及替客人查子女有否吸毒等，她自言做偵探查案，要學很多技能，「啱啱入去學嘢嘅時候，有個師姐帶住我去執行任務，其間我學識咗點樣跟蹤人，好似跟蹤距離唔可以太貼，要保持約 10米距離；當目標調轉頭望時，要好鎮定咁向前行等。除咗跟蹤外，平時我都要熟讀香港地圖，因為我哋唔可以俾目標走甩，所以無論車路同行人路我都要熟悉。」
上年的一次查案經驗，令 Louie有很深的感受，更激發她的正義感，要幫更多客人查出真相，「嗰單 case係婚外情，公司應客人要求跟蹤佢丈夫，我隨隊跟住目標人物由朝到晚嘅生活，發現佢外面真係有第二個女人，而最令我震驚係佢返到屋企竟然可以好平常，當完全冇事發生一樣，我嗰刻覺得個客人好慘，所以好想搵出真相畀客人知。其實我𠵱家做咗全職後，真係見到好多人生百態，好多個案都係本身擁有大好家庭，但仲出去偷食，唔識得珍惜。」

點入行？

每次行動完畢後， Louie都要向上司 Philic報告當日的工作進度。 

宏智國際全女班偵探社的總裁 Philic指公司今年會加入青協舉辦的 Teen試再行動計劃，「好多 90後都可能未出嚟做過嘢，我哋希望透過提供工作機會，等一班 90後體驗到工作實況，從工作中訓練佢哋嘅責任感，同建立正確嘅金錢價值觀，等佢哋知道搵錢辛苦。」

機構：宏智國際全女班偵探社
職位：見習調查員（見習偵探）
空缺： 15個
要求：舊制中七、新制中六以上，經驗不拘。
工作時間： 6月到 8月
起薪點：每小時$40至$55，每週工作不多於 40小時，月入可達$8,000。
應徵方法： mailto:intern@g-inv.com.hk

暑期工邊度搵？

撰文：何倬然
攝影：黃家活、傅新發