政府通過捐款一億予內地賑災，歐錦棠翌日在其facebook寫了一段對此事的感想，才三個鐘，便有六千多個like、千多個 share。

他的facebook fan page，除會張貼自己的生活小節和演出外，更多的，是他對這個社會種種的看法，有時會憑詩寄意，有時又以啜核字句諷刺一番，漸漸地，很多網民都把他視作「為民發聲」的藝人，甚至乎，早前碼頭工人罷工，有些網民更主動留言給他，希望他能站出來講兩句。

「其實我只係會選擇一啲令我有感動嘅事，先會發聲，而且，我發聲，並唔代表我企喺某啲位！其實作為藝人，我都可以唔表態o架，因為唔講，都唔代表冇個人立場o架嘛。」

但偏偏，他是個對四周人與事敏感度極高、表達能力又好的人，所以他想對大眾說的話太多，多得要開talk show，上台跟人分享，單是他去年自資、以時事社會狀況為主題的《中國隊長》，本月中也會舉行part 2。

「上次我教大家點做中國人，今次我會教大家點做香港人。淨係嗰句『You are not even a fxxking Chinese！』我都會玩好多嘢！哈哈哈！我好希望大家離場後會思考番一啲事情。」

真的，他對很多事情都有他的話兒。

公義

夠膽在社交網站發表對社會時事個人看法的藝人不多，單計facebook，數來數去，除了歐錦棠，就只有黃耀明和杜汶澤——畢竟藝人談論時事政治，壓力比常人更多，亦更容易踩界。

作為演藝人，我哋嘅藝術生活，係唔可以離開社會同群眾，因為我哋係用緊藝術嚟反映社會現狀，對某啲事嘅睇法，我哋被賦予嘅身份好特殊，一出聲，就會對大眾有一定程度嘅影響。所以，有啲even講緊演藝嘅嘢，都會畀大家揞住半邊嘴笑嘅artiste，唔發聲，都係一件好事！

我自己都只係睇對某啲事情有冇感動，先會表態，因為我有基督信仰，我只係想做啲公義同啱嘅嘢，並唔係為咗要贏得一個like，亦都唔會因為有網民讚而覺得開心，始終網上世界太虛幻，所以有好多網民都可以用好多唔使負責嘅方法去攻擊你，例如「反國教」嗰排，咪有好多「五毛」囉！睇得出o架！

他的facebook，經常就社會事情抱不平，或諷刺時弊，甚至更會親自落場表達關懷，就如碼頭工人罷工事件。

你持同我相反嘅意見，我OK，謾罵我，仲好！因為實有人幫我窒番佢哋，唔使我出手！試過有啲網民甚至會留言話：「好彩你冇仔女咋！」咁我咪覆番佢哋囉：「咁做你哋嘅仔女都幾唔好彩囉！」呢類嘅留言，我一定會剷走佢，一句不留，以後都ban鬼咗佢！嗰個係我個wall嚟o架嘛，我要保持清新，我冇民主o架！

至於你話怕唔怕有啲發言會得罪人，會冇咗啲job，或者影響到冇得返內地發展呢？我又冇驚過喎！佢要搵你，點都會搵你；唔搵你，你獻媚都冇用，有乜好驚？

本月中舉行的talk show《中國隊長2》，棠哥說，這次會教大家如何做香港人。

去年《中國隊長》，他全程扮鬼扮馬，教觀眾做中國人。

暴躁

是真的，入行逾廿年的歐錦棠，今天確實不愁出路，一來、他瓣數多，多年來電視、電影、舞台劇都有涉足；二來、他有一個很好的底：從前加入亞視，單靠主持《今日睇真D》，已經賺到了人生第一個一百萬，一年爆騷六百多，破了亞視紀錄——但亦因此，令他的性格變得十分暴躁。

我理解能力好快，表達能力又比一般人好，出嚟嘅成績又好，於是我嗰陣對所有嘢咪好急囉！因為急，先可以好快做晒所有嘢，咁當人哋慢嘅時候，要我等，我就會睇對方唔順眼，咪鬧囉！我嗰陣乜嘢人、乜嘢事都鬧，冇停過！如果唔鬧，我個人會好忟憎，要發洩喺第二度！但我自己又慣咗，唔會覺得辛苦喎！

早前跟（左起）米雪、劉雅麗、蘇玉華和陳潔靈，演出《我和春天有個約會》，叫好又叫座。

鍾意窒人，係我嘅性格嚟o架，冇得改o架！雖然我有咗信仰之後，個人都變咗好多，但呢個格仲喺度！好似上星期搭「車立」，架「車立」明明逼到剩番條罅，有個師奶都要問可唔可以入嚟！我就話：「（說時一臉藐樣）你話呢？」喂！點入啫？你個人塞得入嚟，個手袋都入唔到啦！如果畀着以前，我一早已經剷到佢以後唔敢搭「車立」！

又好似有次開廠，未埋位，我睇緊啲嘢。有個好自負嘅男演員，佢好叻扮鬼扮馬，扮聲亦都OK，佢嗰日喺度不斷扮聲，畀啲女同事圍住，好開心，我不勝其煩，因為真——係——好——很——嘈！於是我就問佢：「你係咪乜嘢聲都扮到o架？」「係呀！乜聲都扮到o架，你講我就扮到！」「真係？咁扮唔出聲呀！」佢當堂死晒！我就繼續睇我嘅嘢，跟住嗰日個廠都好靜！

咁樣對呢個男演員，最多都係傷害咗大家感情，我覺得唔緊要o架，因為點都好過我以前喺亞視，一遇到咁嘅情況，我一係會拍枱：「收聲呀！X街！」一係就會「bomb」一聲，大力打落個布景度，啲人見到個布景有嘢爛咗，全世界就會靜足一日，你話幾咁划算！哈哈！

今年為李小龍逝世四十周年，他選擇不參與任何活動。「有幾個job approach過我，衡量過之後，全部推晒！冇後悔，亦唔覺得損失，唔搞咪唔搞囉！我可以有咁嘅心態，反而開心咗。」

婚姻

因為這樣的暴躁性格，他和太太萬斯敏九七年婚後才年多，婚姻生活已出現了嚴重大問題，兩公婆年復年的吵吵鬧鬧，在家中他更曾打凹鐵架，亂飛櫈，結果分居收場。

我嗰陣真係黐線，真係好大鑊o架！調番轉，我都一樣忍佢唔到：我今次已經低低地慣咗一鋪，下次係你啦啩？點知下鋪都仲係我去認低威？唔得喎！佢同我一樣，都係個講嘢好直嘅人，佢嗰陣講親每句說話，我都憎死佢o架！大家撞到咁點相處啫？

最後佢決定要走，咪畀佢走囉！不過大家都唔敢簽離婚紙，簽咗，全世界就會知，呢個係我哋最大嘅壓力。跟住我哋就連屋企人都隱瞞，有任何function、event，兩公婆照出動，做戲做全套，散咗band就你返你屋企，我返我屋企。我哋仲犀利到，佢後尾要去英國讀書，我都有送機，仲去埋嗰邊探佢，保密工夫做得好正，完全冇人知我哋已經分咗居，我仲喺嗰陣已經發展緊其他感情——不過我個人當時好混亂，脾氣仲係咁衰，結果全部都無疾而終。

就係咁，我哋兩個就分開咗三年幾。

去年四月，跟萬斯敏再行婚禮，「既然我哋因為信仰喺番埋一齊，上年又係結婚十五周年，咪大搞囉！」

抑鬱

而就在那段分開的日子，歐錦棠得了抑鬱症，猶幸剛信了耶穌的萬斯敏，從英國回港，讓他看到了信仰的力量。

我第一次發作，係坐喺Starbucks飲緊杯mocha，嗰日好好天、又有音樂，我冇乜嘢諗（煩），但突然就喊，喊到控制唔到。當時其他客人都認得我，個個見到我咁都O晒嘴。喊完，我就抹乾眼淚，當冇事發生過。

呢啲情況跟住發生咗好幾次，我知道PK，去睇醫生，係抑鬱症，但佢話初期嘅唔需要食藥，叫我放鬆啲，放鬆你個死人頭咩！如果係咁簡單，我一早搞掂咗啦！

○九年，他在太太萬斯敏（右二）陪同下接受浸禮，連他視為父親的已故演員陳鴻烈（右一）也被邀請來觀禮。

後來老婆喺英國返咗嚟，睇見佢改變咗，原來佢啱啱信咗耶穌，好熱情咁過緊佢嘅教會生活。但我好憎，因為我鍾意孤獨、鍾意靜，見到人哋好喜樂、大家一齊喺度笑，我就會好火滾！有乜好笑呢？有乜嘢值得咁開心啫？笑乜鬼嘢啫？都變態、黐線嘅！

跟住我有次揸揸吓車又病發，停埋咗一邊喊到收唔到聲，我就試吓第一次祈禱，點知我之後嗰幾個月都冇再病發過！就係咁，我知道係信仰改變咗我，我脫離咗以前嘅生活、想法同性格，我同周圍嘅人嘅關係唔同咗，睇呢個世界嘅角度同顏色都唔同咗，亦慢慢發覺，我有過嘅所有經歷，都係不枉嘅，因為我可以用嚟serve人——

雖然，我把口仍然好鍾意窒人！

功夫和空手道，至今仍然未停過。「我依家喺浸會傳理系做緊講師，要有足夠精力對住班後生仔，好彩我仲有keep住玩呢啲嘢。」

有乜好驚？

關於窒人，歐錦棠跟我說了另一個例子。

「話說有次我有幸同幾位應屆港姐同枱飲嘢，佢哋好多都喺外國讀完書返嚟，對舞台劇都有一啲認知。講講吓，其中一位話：『棠哥，對唔住呀，我唔知你做舞台劇o架！』

「我覺得好奇怪，點解要同我講對唔住呢？我就好直接咁同佢講：『使乜對唔住啫？你唔出聲，我都唔知你係港姐！』

「呢句嘢，我係冇心o架，但係唔介紹，我阿茂鬼知你係港姐咩！大佬！」

我聽罷咔咔咔地大笑了，「如果我寫呢件事出嚟，你驚唔驚有事o架？」

「有乜嘢事呀？有乜好驚呀？」他理直氣壯地說。

有--乜--好--驚？呢句話，在政府總部門常開拍攝時，我都想問問那五、六位逐個來拍照做紀錄的保安姐姐們。

訪問拍攝時，分別有五、六位政總的保安姐姐前來，影我們的示威道具做紀錄。若然歐錦棠仍是從前般暴躁，應該開了拖。