So Comment

貢入元朗食雞煲　佰味居

閒日好去處...
我絕對係一個唔怕煩，鍾意四圍去嘅人，有啲人叫佢過海大件事到要攞埋 passport咁滯，我一日過海三四次係平常，海底隧道對我嚟講只不過都係一條路。如果講食嘢，更加天涯海角都去。

而家喺香港要搵平靚正真難，被迫去啲租冇咁貴嘅地方搵食。結果食到入元朗！介紹「佰味居」叫你閒日去，因為 weekend你休想有位！閒日可以 enjoy吓泊架車喺門口，施施然地食飯。對面空地又有個露天 carpark。

雞煲

時興食「雞煲」。乜嘢係「雞煲」？好似打邊爐咁，有好多唔同湯底去煮隻雞，先食雞，之後再可以用個湯底打邊爐。
香港、九龍亦有不少食雞煲嘅地方，全部係 A貨，原裝係元朗。喺市區食嘅雞好油，又落好多花椒，食完條脷嚡嘅，雞又唔好食。元朗亦有好多食「雞煲」地方，總比市區的好，因為新界人舊時自己會種菜，自己養雞、養豬，一向食料新鮮，所以好識食，煮乜都唔會落味精，如果間鋪落味精都唔使撈。
而元朗「雞煲」店首推「佰味居」，點解，因為雞煮得最嫩，最滑！
湯底可以有 1.花蛤、雞（$148半隻/$188一隻）， 2.菇、豬肚、雞（$138半隻/$178一隻）， 3.麻辣雞（$128半隻/$168一隻）（都分大、中、小或唔辣的）， 4.羊肉$198， 5.啤酒鴨$178， 6.牛腩$168， 7.麻辣牛腩$168， 8.一品煲（番茄、花蛤、雞）（$178半隻/$238一隻），這個係店主推介，亦因為製作繁複，所以每日限賣，我當然先訂啦。

我哋五個人，叫咗一品煲同一個麻辣雞煲。老闆娘「唐唐」叫我哋先飲湯，再食雞。「唐唐」係桂林人，佢家鄉就有呢個番茄煲，不過佢一啲都唔欣賞，因為係用茄膏，又煮得好杰的，所以佢同老公「駱駱」改良又改良呢個番茄煲。如果淨飲個湯一定遠遠不及廣東人煲湯，冇乜層次，似廣東人嘅滾湯。但如果係當個湯底就冇乜所謂。不過雞就真係誇啦啦！好味，如我開頭講嘅又嫩又滑，好正！
老闆「駱駱」又叫我哋試吓佢老婆家鄉啲肉丸釀豆卜$35，「駱駱」話，老婆教識佢，朝朝一早自己就乖乖咁坐喺度先將啲豆卜用羮挖空個豆卜再釀啲豬肉入去，工夫多，但又唔賣得貴。呢啲工夫食物喺鋪租平嘅地方先至頂得順。放落去打邊爐，好嘢！叫了碟紅薯粉$15食落彈牙，似芋絲。
食完啲雞其實真想用個湯底打邊爐，但真無能為力了，飽到暈，結果用個出前一丁巧妙地結尾。最開心係埋單，五個人共食了$526！路途遙遠都值得大家去見識吓！