Jessica C.白色膠併金屬圈頸鏈$1,390 Juicy Couture白色綴金屬釦飾 bikini set$6,500 Louis Vuitton
cover face
Jessica C.明星夢
去到水寧舍清沙寧舍幼的馬爾代夫，對住眼睛寧舍精靈身材寧舍惹火的 Jessica C.，猛力搣自己一下，唔係發夢呀！
近年，間中見 JC，要不當活動嘉賓，要不當內衣騷女模，記者圍訪話題，不外乎其 LA男友 Mr. Bond。香港模界站穩腳，愛情有着落，當日，獨自由芝加哥來港試水溫，浸了四年，大抵已過試用期，未來日子，可以更放心更放手更放膽去織夢；現在，她發着明星夢。
行年 25，有樣又有身材，計我話，不如疊埋心水挾住半鹹淡廣東話去拍劇，黐頭套戴鳳冠踩高屐，活潑番邦公主絕對不遜於可憐小宮女……
《金枝慾孽》續集再續集再續集嗎？不是，我癡人說夢話而已！
Profile
Jessica Tess Cambensy
出生日期： 1988年 4月 18日（白羊座）
出生地：芝加哥（父為美國人，母為菲律賓華僑。）
身高： 5呎 6吋
體重： 110磅
三圍： 33C-24-35
語言：英語
學歷： Maine West High School畢業
簡歷： 15歲，母親鼓勵她往試鏡，翌年，入行當模特兒，曾於日本、新加坡等地工作。 09年，來港發展，憑 Canon打印機廣告一炮而紅。
代表作品：廣告「 Wacoal」（ 09-11），「 Canon打印機」（ 09），「 Salad」（ 10）。寫真集《 Just Jessica C.》（ 10）。電影《熱浪球愛戰》（ 11）。
微博： http://weibo.com/jessicacambensy 
10年一家人生活樂悠悠，兩個妹妹亦快樂成長，媽咪（左一）居功至偉。 
10年半裸推出寫真集，叫好叫座，「警鐘胸」風頭一時無兩。《壹週刊》圖片 
11年挾住𡃁模熱潮進軍大銀幕，自此，她四出試鏡，渴望成為正式演員。《蘋果日報》圖片
夢想拍電影
來港發展，行騷拍廣告出埋寫真集，錢賺到了，名氣有了，老實講， JC事業已到了瓶頸位置，真的要諗計仔轉型，否則，青春一去，路只會愈見難行。
「依家我最想拍電影。
「見過楊紫瓊上台講電影，我發覺，當一個人努力不懈地追求自己夢想時，真係好有吸引力，這種姿態，很值得別人尊敬，自此之後，拍電影也成為我夢想之一。
「初來港，唔識中文又冇朋友，總覺得港產片好得意好搞笑，四年來，中文進步，加上朋友幫手翻譯，懂多一點，現階段，識吓電影人、學吓做戲、睇吓港產片，逐步嘗試中。
「我都知，做 model賺到錢，拍戲的話，既要放棄接 job，面對小型製作，酬勞又唔高，不過，我好享受透過演戲去表達自己。
「未來，打算用 5至 10年時間去試，去搵一條適合自己的出路。」
最好有得揀
Jessica C.啡紅色圖案中空連身泳衣$99 H&M透明綴窩釘膠鈪$7,600 Valentino啡色木底高踭涼鞋（未定價） Michael Kors卡其色通花草帽 stylist's own
父母離異， JC是長女，兩個妹妹仍在求學階段，多年來，媽媽獨撐半邊天，家庭背景令她體會到金錢的重要，錢不是萬能，但沒錢卻萬萬不能。
「細細個已賺錢自己使，賺錢容易，使錢更易，去年，我喺 LA以幾萬蚊月租一層 apartment，方便過去探男友，點知成年沒住過！你話幾浪費。
「依家，努力學習理財，購物預設 budget，儲到錢，寧願帶家人去旅行或者置業投資，最好香港買一間自住， LA再買一間收租，希望 40歲前願望實現。
「唔係我需要錢，而係錢可以幫我得到生活所需。
「當年，屋企好窮，媽咪死慳死抵俾錢我去讀模特兒學校、去紐約試鏡，所有開支動輒幾千美金，佢犧牲自己，仲講『試過唔鍾意可以唔做，鍾意的話，努力去做。』
「我有今日，全因媽咪。
「每次想起，不停叫自己努力一點，唔可以懶，當然，最好可以揀工作，希望有朝一日由我自行排列工作優先次序，陪伴家人為先，再拍電影，有時間的話，周圍飛去做 model。」
佢幫我度難關
Jessica C.彩色印花圖案 bikini set$3,000 Chloé from Lauren Bright粉紫/桃紅色花頭夾各$100 both Accessorize
這四年， JC嘗到成功，亦跌倒過，備受負面新聞纏擾，得以翻身，全靠家人的正能量，越洋送暖，而雙親關係也直接影響其擇偶要求。
「父母離婚時，我才 9歲，還有兩個妹妹要照顧，不得不堅強，他倆一直保持友好關係，多年來，也是一起住，大家沒法做夫妻，便做一對生活夥伴。
「一段關係需要互相扶持，無論情侶、家人還是朋友，母女亦然。
「揀男朋友道理也一樣，我唔鍾意做一個妒忌心重嘅女朋友，更加唔想改變一個男人，互信最重要，最好還有點幽默感。
「真愛莫論條件，做得到，只得媽咪一個。
「做 model被評頭品足，每當負面新聞出街，情緒當然受影響，人嚟㗎嘛！但我唔可以被事情擊倒，媽咪反過來安慰我『你唔係壞人』，聽到呢句說話，成個鬆晒！
「佢幫我度過每一個難關。
「自己冇心肝啦！母親節唔記得買禮物𠱁佢開心，不過，每次我送貴重禮物，媽咪會即刻退回店鋪，只講『有錢就留給自己！』如果可以，我想將整個世界送俾佢。」
後記
Jessica C.啡色豹紋 bikini set$1,900 Just Cavalli金色金屬圈耳環 model's own
尋常人過尋常日子，偶爾發個白日夢，大抵不離中六合彩上車買樓交個好男/女朋友之類。
JC的夢，也很現實，想脫貧。
出身窮困，難得生得靚又有身材，索性以天賦本錢出外打天下，水靈大眼甜美笑容，來到香港，話咁易揚名，加埋一對警鐘胸，嗱！好快又有新廣告出街，靠靚搵食，雖還未至大富大貴，起碼自給自足得很；好過時下中產。
今日，靚女去到馬爾代夫，即引來酒店以至航運職員相繼邀合照，照咁睇，佢仲幾有人緣，這要比面孔標致更重要，希望早日見她明星夢成吧！
Shop List
Accessorize銅鑼灣希慎廣場 302號鋪 2523 0068
H&M中環皇后大道中 68號地下 2110 9546
Juicy Couture尖沙咀海港城海運大廈 302號鋪 2118 8236
Just Cavalli store.robertocavalli.com/hk/justcavalli
Lane Crawford中環國際金融中心 3樓 2118 3376
Lauren Bright鰂魚涌英皇道 633號 28樓 2506 2727
Louis Vuitton中環置地廣場地下 8100 1182
Michael Kors尖沙咀半島酒店 W2及 4號鋪 2366 2301
Valentino中環國際金融中心 2070號鋪 2234 7193
撰文：伍淑嫻
採訪及形象： Annie Hung
攝影： Kenji Leung
化妝及髮型： Lauren Lee
鳴謝： Sun N Sea Holidays
Anantara Kihavah Maldives Villas
留言列表
