咪走啦 Rachel，你咪係我變喪屍前個索樣囉！

漫遊毒物

進化喪屍困獸鬥　《 Resident Evil: Revelations》

近期澳洲短片電影節佳作《 CARGO》喺網絡上瘋傳， 7分鐘講述一個就快變喪屍嘅老豆點樣喺最後一刻保護自己個手抱 BB，個個睇完大叫感動！如果遊戲世界入面嘅喪屍都一樣咁有人性，相信大家都可能手軟唔想殺。之不過，現實係殘酷嘅，《 Biohazard》新作《 Resident Evil: Revelations》入面嘅喪屍升級再進化，巨無霸、鉸剪手乜都有，部分仲識隱形襲擊你，靚女都冇情講，保證殺得放心！

機種： PS3
廠商： CAPCOM
類型： ACT
人數： 1至 2人
發售日： 5月 23日
售價：$268

突擊模式夠耐玩

其實《 Resident Evil: Revelations》係之前 3DS同名作嘅高清移植版，故事講 Umbrella被消滅後， BSAA隊員 Jill由於聽到 Chris失蹤嘅消息，於是連同新隊員 Parker去到地中海一架擱淺郵輪調查，最後 Chris就搵唔到，反而發現大陰謀！今集主角雖然係 Jill，不過隨住劇情發展，都會有機會用到 Chris。另外，仲有突擊模式（ RAID Mode）做補完，畀玩家重新挑戰每一關，但就減去劇情部分，並支援連線，玩家亦可以儲經驗升級或砌槍，加埋隱藏超勁敵人，包你有排玩！

RAID Mode設計其實唔錯，爆完機起碼同 friend仲有排玩，感覺似玩多隻 game。

雖然今集可以話係外傳，但都有涉及 Chris等正傳主角， fans要知晒成個故事，點都要玩。

回歸困獸超驚嚇

記者同好多 fans一樣，都認為呢隻係近年最出色嘅《 Biohazard》作品。皆因今集大家都困喺一架荒廢郵輪內，故事一開始你就已經被孤立，冇辦法離開，架郵輪唔只大到離譜，初期更因為冇電， Jill只可以用電筒照明，光線不足之餘，又成日彈隻喪屍出嚟嚇你，玩落感覺似番第一集咁恐怖！雖然話有 Parker同你一齊行動，但好多時都分頭行事，加上新世代喪屍超勁，隱形、鉸剪剪頭等，驚嚇之餘仲非常刺激！

水中戰難度極高，水中怪物速度快到離譜，盡快搵方法上水避開攻擊先係上策。

外形恐怖嘅鉸剪手叫 Ooze，其實只係最低級怪物，周圍都有，好在唔難打。

巨無霸怪物 Draghignazzo見人就會直衝過去，加上周身硬甲，係非常難打嘅 BOSS。

小心！神級喪屍

玩《 Bio》除咗有索女主角、恐怖氣氛外，喪屍本身嘅設定亦好吸引。今集《 Resident Evil: Revelations》嘅喪屍更經過大幅強化，筆者試玩就覺得以下幾隻最恐怖，最好避之則吉。

變身　 Ooze Rachel
其實係由新角色 Rachel所變，劇情入面會連續追殺阿 Jill幾次。由於設定恐怖，加上變身前身材超勁，所以好受注目，移植版加入做埋可用角色。

隱形　 Farfarello
BIO系列老牌怪物 Hunter今集嘅加強版，就係呢隻 Farfarello。勁到識得隱形，玩家要先用掃瞄器搵到佢位置，先有機會射中！

新怪　 WallBlister
呢隻怪物之前冇喺 3DS出現，係今次高清版先有。佢外形超兇猛，係速度快、攻擊力高嘅 boss級敵人，唔易對付。

製作人竹中司　生化漫談

既然筆者同唔少試玩過嘅玩家都讚呢集《 Resident Evil: Revelations》有以前《 Bio》嘅刺激感， CAPCOM亦好有信心，更派來遊戲製作人竹中司專誠來港同媒體分享製作心得。雖然佢冇三上真司咁有名氣，但其實佢都參與過《 Rockman》、《鬼武者》、《 Biohazard 6》等 CAPCOM名作嘅製作。

FACE： F　竹中司：竹
F：今次將手提遊戲移植至家用機，除高清化畫質外，遊戲難度等各方面有冇調整？
竹：好多細節都有認真處理過，例如今次過場 CG同所有角色模組都要重新造一次。喺大電視玩的話，甚至會見到 Jill同 Chris嘅腰袋好有質感，簡單講，畫面幾乎冇用番 3DS嘅嘢！另外今次新增 INFERNAL Mode去取代之前嘅 Hard Mode，敵人唔只係能力強化，連出場地點、數目都唔同，舊玩家相信會覺得好有新鮮感。

F：咁仲有冇乜嘢新模式玩？會有 online連線玩法嘛？
竹： Online或玩法繼續會喺原有嘅 RAID Mode上，今次家用機可以直接喺 internet搵到隊友一齊玩。另外會加入 DLC元素，暫時公布有新武器下載，但其他好似角色、服裝、場地方面，現階段唔能夠講有定冇住，未有其他嘢能夠作實。

F：點解會揀 Hunk同 Rachel做新角色？佢哋會追加劇情嗎？
竹： Hunk係 BIO系列一個幾有人氣嘅角色，至於 Rachel就係呢集其中一個角色兼 BOSS，本來唔算重要，但佢喺日本同亞洲人氣非常高，所以決定加入。佢哋只可以喺 RAID Mode出現，如果喺劇情模式都用到，就會影響劇情發展，但喺 RAID Mode用 Rachel殺喪屍版 Rachel都幾有趣！

F：今集喪屍種類都幾多，最令你印象最深刻係邊隻？
竹：哈哈！我印象最深刻反而係今集嘅聲音效果，加埋場景好多冇乜光線，玩嘅時候，唔同聲效會令你覺得非常恐怖。如果要講，我會揀 Ooze Rachel，之後係 Scagdead，佢都係一隻 boss，當佢追殺主角時，仲會不時哼出一段童謠，每次玩佢都令我好心寒！

3DS同 3DS版對比，可以見到 Jill嘅頭髮見番一條條，喪屍就更加精細。竹中仲講笑話佢同隻喪屍一樣為今次移植出盡全力，結果隻喪屍搞到成隻瘦咗！

PS3