除擔任 Charmonde CEO，胡敏珊更是自創品牌 Chouette的設計師，可惜生意最終爆煲，令她血本無歸。
探熱針
最靚 CEO胡敏珊 拖租欠薪執鋪
過去先後跟林建岳、許志安、龐維仁等傳過緋聞，有最美麗 CEO之稱的胡敏珊，成功結交上流圈後，○八年再將代理手錶生意搞大，自創品牌 Chouette，成立 Charmonde香港夢地集團，並自誇兩年零售額過億。
不過，近日盛傳胡敏珊欠債纍纍，位於中環的 Chouette專門店突然關門，在銅鑼灣禮頓道及西環的兩個寫字樓亦人去樓空。本刊發現，胡敏珊涉及的債務官司多達五宗，包括欠租、拖欠員工強積金、未有支付瑞士供應商費用，欠款多達一百六十萬。
清場充公貨品
被稱「鐘錶女王」的胡敏珊，十五歲入行做平面模特兒，但發展一般，直至轉型從商，才一帆風順。二○○○年，胡敏珊與當年的男友毛志輝拍住上，代理 Technomarine水晶鑽石膠錶大受歡迎，○四年再引入美國品牌 Philip Stein，均獲不少圈中人力撐。
雄心壯志！○八年胡敏珊自資成立 Charmonde香港夢地集團，自創鐘錶品牌 Chouette，大展拳腳。不過，近日鐘錶界盛傳昔日的「鐘錶女王」欠債纍纍。
「佢用開嘅手提電話突然停咗，好多人都搵佢唔到！」知情者說。
四月底，位於中環安蘭街兩層的專門店突然關門，五月底，在 Sogo的專櫃，更因無員工返工， Sogo管理層嬲到將飾櫃拆清，貨品充公。
「 Sogo規矩好嚴，合約訂明 counter唔可以無員工喺度，嗰日嘈到成層樓都知， Sogo管理層又即時聯絡唔到胡敏珊，所以嬲到拆櫃充公啲貨，其實兩個員工都俾佢拖咗幾個月糧無出。」
胡敏珊自家品牌位於中環安蘭街的兩層專門店突然結業，但大閘的手錶 logo仍未拆走。 
禮頓道的二千九百呎寫字樓已空無一物。 
瑞士錶商通晒天
胡敏珊陷財困，原來一早通天，五月中在瑞士舉行的 Basel錶展，手錶供應商已經遍傳胡敏珊唔掂消息。
「原本喺禮頓道嘅寫字樓，佔晒全層，又有成廿個員工，但原來三個月前已經因為欠租搬走，仲解散咗大部分員工，剩低幾個員工就搬咗去西環工廠大廈寫字樓。」
無聲結業，胡敏珊還有大筆爛賬跟尾。
「佢突然閂門，有啲客攞咗啲錶去整，之後攞唔番都好嬲；完全無出嚟交代，仲有啲街數未找，有人喺佢公司 facebook留言追數，佢都毫無反應！」知情者說。
中環的旗艦店在 09年 10月開幕時，胡敏珊邀得 Stephy和劉心悠剪綵。 
○九年二月 Chouette在 IFC開店，胡敏珊請來林憶蓮撐場。 
二○○○年孖實當時男友毛志輝做 Technomarine代理，賺到第一桶金。 
○九年，胡敏珊獲頒榮譽院士，細妹（右一）及妹夫都出席撐場。
物業投資慘蝕
本刊從法庭存檔發現，胡敏珊涉及的債務官司多達五宗，包括銅鑼灣禮頓道寫字樓欠租長達一年，拖欠員工強積金，未付瑞士供應商費用，款項共一百六十萬。
從事鐘錶生意超過十年，胡敏珊經常周身名牌出席社交場合，多年來亦一直租住豪宅地段，去年便由淺水灣道搬到現居的西半山趙苑。
外表富貴，但胡敏珊投資物業運卻極差，過往買入的三個物業，只有九六年買入的愉景灣賬面賺過一百萬，另兩個在九七年，分別以一千九百五十萬及三百四十三萬買入的東山臺及愉景灣單位，亦先後在○七年及○三年，以八百八十萬及八十萬蝕讓，蝕過千萬離場。
入稟追數
由去年三月開始，胡敏珊的鐘錶公司不斷被追數，根據法庭紀錄，先後有五次入稟紀錄，被追討鋪租及強積金等超過 160萬。
生意好難做
就欠債一事聯絡胡敏珊，她否認欠債，亦強調無拖租。
「我哋（禮頓道寫字樓發展商希慎）有啲誤會，件事已經交俾律師處理，所以唔方便講嘢，西環間 office都只係 temporary（暫時性）。至於安蘭街嘅鋪，因為嗰度租金太貴，三月幾開始無租，依家搵緊新鋪。」
有關 Sogo的 counter，被租方清場及充公貨品，又拖欠員工薪水一事，胡敏珊回應說：「 Sogo絕對冇沒收我哋啲錶，個 counter我同咗佢哋講會提早走。同員工之間嘅問題，已經解決緊。依家經濟大氣候根本好差，租金愈嚟愈貴，生意好難做。」
去年八月，胡敏珊在灣仔 Faces Music Lounge搞生日 party，好友王敏德高歌賀壽星女。 
Ba叔是胡敏珊契爺，風光時期，有指她經常科水撐契女。 
每有新款手錶推出，胡敏珊都會送給好友宣傳，用明星效應 sell錶。
交遊廣闊
有「靚女 CEO」之稱的胡敏珊，身邊從不缺有錢人，早年有男友毛志輝科水搞鐘錶生意，後來又先後與林建岳、龐維仁等富商傳緋聞，最低檔次的，算是與動作演員杜宇航的「姊弟戀」。
杜宇航
今年初，有指胡敏珊與細她九年的動作演員杜宇航撻着，男方被拍得連續六日出入對方豪宅，二人更不時在微博傳情，上載「 I Miss You」相片。
龐維仁
07年尾，胡敏珊與龐維仁秘密拍拖，二人被拍得到 IFC睇戲，在街頭攬腰，龐維仁更情不自禁向住女友額頭連錫數啖，睇完戲，男方返女方的寓所過夜。
林建岳
07年，有指胡敏珊暗撻林建岳，更獲對方科水成立公司 Christie International Group Holdings代理手錶，而她當時的辦公室亦位於林建岳旗下的鱷魚恤大廈頂樓。
許志安
01年，許志安與鄭秀文傳分手，有指許志安狂追胡敏珊，更送上 14萬名錶給對方。
毛志輝
未入行前，胡敏珊已與同樣做鐘錶的毛志輝拍拖， 00年，二人合作開設鐘錶公司代理 Technomarine手錶系列，至 02年分手，結束八年情。
留言列表
