根據網上資料、本刊資料室等顯示，鍾麗緹是90後的性感女神。那些年，周秀娜在上小學，DaDa應該在抽偶像閃卡……

「我都唔知自己有sex appeal，不嬲我覺得自己係好熱情、好passionate（激情），依家都係。」

的確，訪問期間鍾麗緹的表情、動作，有多無少，還以粵語、國語、英文三聲道廣播，音調變化之多，拍得住配音員。

「啲人話：『佢有三個小朋友嘞，嘩！一定好老啦！好肥啦！』所以我一有時間都做運動、跳舞，要keep！」

四十二歲，經歷過兩段婚姻，已遷居北京九年的鍾麗緹，認為成就自於三個女兒，所以被問起千年舊愛郭富城的「富黛戀」玩完，她可瀟灑地說：「我哋已經pass咗！」

不過，對人生，鍾麗緹仍有其passionate之處，例如她會自備歌曲作拍照之用，「咁先有energy，有mood啲吖嘛。」

話畢，其私家小喇叭便隨即響起Jennifer Lopez的〈Dance Again〉，鍾麗緹自在地擺動腰肢，跳出自己的舞步。

雖然，我還是想起「吳好緹」。

 

從不是性感女神

騎呢如我，才會對「吳好緹」（鍾麗緹在電影《九品芝麻官》中的角色）印象最深，「哈哈！都OK，其實我唔係咁鍾意睇自己啲戲，就算係我最鍾意嘅《人魚傳說》（與鄭伊健合作）都係，我鍾意只係因為好多女仔同我講，睇完套戲專登走去學游水，我覺得好interesting。」

言歸正傳，鍾麗緹一向與性感掛鈎，即使已誕三女、身段比其高峰時期豐滿了點，對於今年即將四十三歲的「女神」來說，還可在新戲《瘟泉》中作性感浸溫泉演出，已相當標青。說性感，也不是本人採取主動，只源於鍾麗緹喝一口清水後一句：「我成日都好想問……」

之後就是：「乜我真係性感女神咩？我成日都想解釋，我真係真係冇諗過自己好性感，好有sex appeal，我覺得自己一直都係演員。到生大女嘅時候，我只係諗住留十個月畀自己生BB，都冇諗過生完會咁大件事。」

鍾麗緹口中的「大件事」，只是「性感女神」於事業高峰期生B而已，她最怕的，還是別人眼中的鍾麗緹，已變了「阿豬媽」。「我唔想啲人覺得我好老呀、好肥呀、唔fashion呀。國內真係有人以為我係咁，所以，我要keep呀！」

上周五（十日），鍾麗緹（右）與熊黛林（左）同場，一幀合照已顯示出「已經pass咗」及未pass得晒的分野。

○一年鍾麗緹在電影《色戒》（Samsara）中的激情演出。