潮𡃁便當

過口癮　小食新店

人就係衰，正餐唔食偏偏喜歡留番個肚食立雜嘢，行街冇王（阿媽）管嗰陣更加係：原形畢露！
辣嘢、香口嘢、甜品通通掃入口。
呢排小食店大玩韓式、台式甚至懷舊港式，啱晒喜歡過口癮朋友，行街誘惑爆多，有時真係想宅一宅（不過邊得呀）！

手起骨落台式過檔　凍食蒜香雞

台灣逢甲夜市嘅街檔 ET鹽水雞 3個月前來到香港，選址在灣仔，店主 Sam採訪時一邊回答問題、一邊拿着剪刀，手起雞落，快狠準，原來正為雞隻去骨，方便客人進食，雞隻來自台灣，即叫即去，半件雞 3分鐘搞掂，加入調味料及配菜，撈幾撈食得，最難忘一道麻辣雞，香辣惹味，麻辣醬由店主自行炒製過，再細味下去發覺有齊蒜及麻油等味，加上係凍食，呢排天口轉熱至啱！而味道方面，唔食辣或麻辣，可以揀蒜同燒葱味，同樣唔失色。

Sam暫時一腳踢，所以經常手不離剪，刀功乃台灣學來。 

貴族雞餐$39可從 20多款配菜中選擇 3種，包括杏鮑菇、豬皮、小黃瓜等。 

台灣逢甲夜市的 ET鹽水雞。

咁好味嘅雞，全靠店內三款必殺調味料。 

水果雞餐$24有雞翼 2隻，番石榴及洋葱，洋葱配雞非常惹味，番石榴則有效中和重口味。 

立食指數：★★★★★

店內冇座椅，買完預咗要喺街邊食。

食客
陳小姐文員

我見呢度開咗新店試吓，麻辣雞好惹味，下次會試水果餐。

台灣 ET鹽水雞

地址：灣仔柯布連道 2號地下 4號鋪
電話： 2891 8183
營業時間： 12:30pm-9:30pm(逢星期日休息)

天后食街嘗煙韌蛋餅

開在荃灣沙咀道附近的小倆口蛋餅，因為租約期滿，索性由荃灣轉至天后食街開鋪，店主袁先生認為：「天后食街地理優越，可以吸引更多客人。」蛋餅皮每星期從台灣空運入貨，由熟手蛋餅師傅操刀，表皮帶點煙韌，餡料可選吞拿魚、肉鬆、粟米粒、煙肉等，簡單但好味，最後配以一個蒜蓉豉油蜜汁，自家調製，惹味香甜得來不會咁乾身！訪問當日，更巧遇一對曾在荃灣食過蛋餅的男女，兩人都大讚口味冇變！的確，細細份，過口癮食，幾滋味！

倆款口味蛋餅$30蛋餅內有肉鬆及粟米兩種材料，蛋皮好咬口，肉鬆鹹香撲鼻且有粒粒香甜粟米味，間中食到蒽花香，味道豐富。 

風味素叉燒堡$28漢堡餡以黃豆類製品製成，煎香後帶肉香，唔講仲以為係肉。而漢堡則用上全麥芝麻皮製成，健康得來香氣四溢！ 

地瓜拉餅$22薄餅飛脆，夾層夾入台灣番薯，雖然分量不多，但已甜到入心，冇落糖架！

小倆口特調凍咖啡$25咖啡豆來自台灣，乃店內師傅每日磨粉製，先用高溫再轉低溫煮 2小時，入口濃而香滑。 

店員收到 order後即整，新鮮熱辣。 

立食指數：★★★

店外有 6個座位，都在街邊，勁有街頭 feel。

食客
吳先生大專生

我哋之前喺荃灣食過，知道佢哋搬咗嚟呢度，肉鬆蛋餅好食，會再嚟！

小倆口台式漢堡蛋餅專賣店

地址：天后電氣道 96號地下
電話： 6402 6976
營業時間： 11am-9pm（逢星期日休息）

友情檔韓食一口雞

友誼無價說來老土，但 Obba韓食兩位年輕老闆 SeungJeon及 Sunny，正正是在澳洲 working holiday時認識的老友記，韓籍店主 SeungJeon，更娶了 Sunny朋友香港人 Ava，以為韓國男人大男人，但偏偏做跟得老公來到香港定居。曾在韓國主修傳統韓食，自小有入廚經驗，所以店內食物雖然普通，但絕對正宗。由於是小店經營，所以店內大部分食材都由 SeungJeon及 Sunny親力親為，好似炒年糕重點嘅醬汁、韓式壽司以及一系列韓國菜必備前菜如泡菜、海帶、黃瓜等，全部親自醃製調味。最有驚喜是一道韓式一口雞，先炸後撈，撈時加入特製醬汁，入口先是一股甜味湧來，再有惹味蒜香，微微帶辣，加上雞粒炸得恰到好處，可口無比。

韓食一口雞$25用上洋葱、糖、蒜及辣椒汁撈成，怪唔得知甜甜哋又好鬼香口惹味！ 

炒年糕$20醬汁乃年糕精髓，呈杰身，辣香濃郁而帶酸，勁開胃，入面仲有片片韓國魚片，口感更豐富。 

韓式泡菜豬肉包飯（另有牛肉及魚塊煙肉味）$25米飯內加入芝麻油及泡菜，所以即使夾入甘筍絲、菠菜等材料，酸酸辣辣又香口，仲健康一點。 

老友鬼鬼的 Sunny同 SeungJeon丟低 backpack後，將旅行夢想化身為開鋪。 

立食指數：★★★★★

店無座椅，通常拎走食居多。

食客
Lily中學生

我之前已經嚟過，睇韓劇見好多人食炸醬麵，估唔到呢度都有，今次試佢呢個一口雞，唔錯！

Obba韓食

地址：土瓜灣馬頭圍道 216A號地下
電話： 6492 8476
營業時間：星期一至五： 7am-9pm，星期六及日： 11am-8pm

重口味葱蝦腸粉

西環絕對係香港最後一片樂土，平靚正食店總在左近，在深宵糖水小食鋪可可店（出名腸粉加蛋）斜對面， 3個月前開了一間海傍陳記，有齊魚湯米線、自家製麻辣撈粉絲、飯類及各式小食，例如 XO醬蝦米腸粉、炸蝦丸、碗仔翅、咖喱角等。當中 XO醬炒蝦米腸，落咗勁多炸乾葱同蝦米粒，淋上豉油，無味腸粉都變得勁惹味。咖喱角其貌不揚，但脆皮之下有麵粉，脆中帶韌帶甜，配埋似咖啡肉鬆餡，簡單但有驚喜！

XO醬炒蝦米腸粉$18除了炸至半乾的蝦米，仲有炸乾蔥，佐底仲有豉油，食到底略嫌鹹咗少少。 

咖喱角$15Size雖然唔大份，但勝在唔係一味油膱味，餡料仲勁似咖喱味肉鬆，放咗少少已經夠晒好味！ 

碗仔翅$15分量超大， 3個人 share都得，內有切至絲狀的豬紅，本身唔食豬紅的朋友，可能從此開齋！

立食指數：★

店鋪出奇地寬敞，提供圓枱及長枱，坐 40-50人都得。

食客
Samuel
行政助理

我喺港大返工，俾呢度懷舊 style吸引咗，叫咗個雞扒麵，煎得好香，湯底冇味精，好食！

海傍陳記

地址：西環爹核士街 28號地下 C號鋪
電話： 2817 0966
營業時間：星期二至日： 11:30am-9:30pm（逢星期一休息）

撰文：梁智欣
攝影：葉曉明、顏青瑋