DC解碼

東京直擊　 Olympus E-P5復古新 PEN極秘登場

早排專業相機網站 Dpreview搞過公投，結果由 Olympus OM-D贏得 2012年最佳相機大獎，證明濃厚復古風造型加埋旗艦級無反功能，真係掂！
Olympus食過翻尋味，再次設計出外形極似佢哋經典菲林機嘅新 PEN系 M4/3── E-P5。部機未正式發布前， Olympus一直視為最高機密，死都唔肯預先畀樣大家睇，就連上星期筆者獲邀飛到東京率先預覽新機時，都要簽下保密同意書，太早洩漏資料就會俾人告。忍咗成個禮拜，𠵱家終於可以徹底展露 E-P5實機真身畀大家過目！

Spec

像素： 1,610萬
感光元件： M4/3 Live MOS
感光度： ISO 25600
影片： 1080p
屏幕：可揭式觸控 3"
記憶： SDXC
體積： 122.3× 68.9× 37.2mm
重量： 420g
顏色：銀×黑/全黑/全白
售價：$8,990（ Body）
$11,990（連 17mm f1.8鏡頭及 VF-4電子觀景器）
推出日期： 6月下旬

懷舊極致造型

雖然歷代 PEN系 M4/3 DC嘅設計都沿用懷舊主調，但當中仍不免加番少少現代元素，當 E-P5外形揭盅時，卻完全參照 Olympus首部換鏡菲林機 PEN-F嘅造型，再加上無縫嘅全金屬機身，筆者同現場好多人一樣，都覺得佢係 PEN系復古得最極致嘅一部機，甚至比 OM-D更加徹底。 E-P5仲提供最經典嘅銀黑襯色，無論懷舊相機迷定潮人都會 buy。

同時提供埋黑同白兩色選擇，懷舊味冇咁濃，但潮味依然，白色仲特別啱女仔用。

頂部

背部

右機頂前後轉盤用嚟校光圈同曝光補償，若將紅點拍片掣下面支桿（紅圈）由 1推去 2，就會變為調校 ISO同白平衡，呢個全新設計幾就手。

E-P5有 WiFi過相、手機遙控功能，且簡化了連線方法，以手機影一下 E-P5畫面上的 QR碼即可連線。

同 OM-D一樣有上下 180度揭芒，方便高低炒影相，唔揭時個芒食入機內，唔會凸出嚟。

Kit set套裝除咗 17mm鏡頭，仲包埋價值$2,390嘅全新電子觀景器 VF-4，可視率跟 LCD屏幕一樣， 236萬像素畫面亦夠晒細緻，裝 viewfinder影相仲畀人更 pro.嘅感覺。

EVF畫質

直擊日本 Olympus

今次應 Olympus邀請，到其日本製作室參觀呢次 E-P5發布會，場內唔只有高層解話，日本 OL捧機，仲有晒成個機身創作理論、設計圖、外形模型畀記者了解 E-P5的創作故事。

唔影吓 OL，好似冇去日本咁。

機身外形試辦都有 6、 7個。

呢啲設計圖，平時上網真係唔會見到。

PEN系祖宗轉生

PEN-F生於 1963年，係相機史上首部半格菲林機，每影一張相只取用半格 135菲林，雖然畫質下降，但一卷 24格菲林可拍出 48張相片，令當時所費不菲的沖印成本大大下跌，令攝影變得平易親民。

大光圈×高速快門　 E-P5捕捉日本美態

從 Olympus手中借到 E-P5，梗係要拎到日本街頭試玩。 E-P5 kit裝係跟一支 f1.8大光圈 17mm定焦鏡頭，只要用光圈先決模式開住 f1.8光圈，影 snap隨手都影到淺景深；但相對地，喺猛烈陽光下影相，就算 ISO校到最低，用 f1.8大光圈影相都好易爆晒光。唯一解決辦法就係校快快門，而 E-P5最高快門速度達 1/8,000秒，係現有無反 DC中最快，能夠捕捉水花四射等高速畫面，校到 1/8,000秒去影，影到光度適中散景相嘅機率就大好多喇！

唔使微距鏡幫手，只用番 17mm kit鏡去影呢個水勺，再校埋用 f1.8光圈，後面啲嘢當堂朦晒。1/400s快門f/1.8光圈ISO200

喺猛太陽底下影葉，後面景物朦晒唔在講，正因校到 1/320秒快門去影，光度啱啱好，完全冇爆。1/320s快門f/1.8光圈ISO800

五軸防震更聰明

E-P5將 OM-5最耍家的五軸防震功能再改良，感光元件繼續能夠透過水平、垂直、左右、上下同旋轉五個方向移動，去減低因手震產生的影像模糊， E-P5更比 OM-D再多一個自動感應功能，識得自己分析震動方向，從而揀番最啱嘅方向去移動。嘗試用佢在街頭追車影，冇開五軸防震系統嘅話，成張相只見到鬼影！

冇開防震從左、中兩圖可見五軸避震係幾有用；而右圖係夜晚唔落腳架，手持 E-P5試拍新宿街頭，張相依然好 sharp，且開到 ISO 6400（最高支援 25600）去影都冇乜 noise。

啟動防震

夜攝防震

398個 filter效果

Art filter不嬲係 Olympus嘅強項，無論任何級數嘅 DC，都比其他牌子相機多。今次 E-P5唔只依然具備 12個主打濾鏡，而且 filter與 filter之間可以合併使用嘅組合仲大幅增加咗，最多可 mix& match出成 398個唔同嘅效果，其他牌子肯定有排都追唔到，每日只玩 1個效果嘅話，玩 1年都玩唔晒！

即使喺唔多夠光嘅室內影食物，只要校番正常快門，用 f/1.8光圈影相唔只有淺景深效果，相片亦會夠光猛。1/250s快門f/3.2光圈ISO200

若喺陽光下用 1/8,000秒快門，再收番細光圈，影噴水池就會捕捉到一粒粒水珠。1/8,000s快門f/5.4光圈ISO1600

雖然只係繼續提供 LOMO等 12個 filter，但 mix埋其他濾鏡，變化一樣多端，而且有埋 WiFi傳相後， po相上 fb更 easy，好過直接用手機影。

早排先首次加入 Olympus DC仔嘅 Photo Story功能，今次加埋喺 E-P5身上，使用後可開影幾格唔同嘅相去填滿相框，好似玩手機 app咁得意，而且相框仲有幾款揀添。