今日好玩嘢 好景商場

四樓冇四級　今日好景賣咖啡

講起好景商場，同事個個都話好多回憶，「嗰陣有個鹹片龍虎榜！」、「樓下四仔阿叔聽聞已經離開人世！」、「自助式買鹹碟服務嗰度首創！」嘩！講極都係核突嘢，有關嘅聯想，唔係四仔就係老翻，似乎冇乜好嘢，搞到我都唔好意思講自己都成日上好景買碟（ game碟咋！），容乜易被人誤會！直到近期，喺呢個充滿傳奇「色」彩嘅商場入面，竟然開咗間超有文化嘅品味咖啡小店，陣咖啡味仲一上扶手梯就已經聞到，買完 game可以順手買包咖啡豆返屋企磨，加埋其他因為租貴而迫入嚟嘅新勢力：飲咖啡、玩鬼佬 game、行好景，呢啲先叫 lifestyle呀！

GOOD DAY AT HO KING 01　罕見咖啡豆專賣店

店仔細細但咖啡豆就近十種，擺晒出嚟任你聞，唔幫襯都可以搵「好景陳豪」聶生吹水，啱傾佢可能會請你試飲！ 

好景有間咖啡豆專賣店？有相有偈傾，唔到你唔信！店長聶生份人勁好傾，一講咖啡就陳豪上身，佢話屋企沖咖啡其實唔難，有咖啡豆、磨豆機同咖啡壺已經足夠，但咖啡豆特性唔同，時間、水溫有分別，乜都唔識，等佢教你就最好，傾多兩句分分鐘主動沖杯畀你試！佢話開鋪最大原因其實係想推廣咖啡文化，等鍾意飲咖啡嘅朋友多個吹水地方，揀中好景不外乎貪佢人多兼租平，佢認為咖啡門檻唔應該咁高，亦唔係中產專利，乜嘢人都可以享受到，所以並唔覺得好景失禮人，反而開咗三個月左右，已經儲埋儲埋唔少熟客，仲好多都係買 game經過嘅麻甩添！

由外國入貨嘅咖啡壺設計勁靚！用法亦簡單，壺底加水、中層放咖啡粉，煲滾後就會响上層蒸餾出咖啡，一隻色得一個，記者都即買！（大$250/連 50g咖啡豆；細$200/連 30g咖啡豆）

呢個越南滴漏咖啡壺，上面落番專用嘅仿貓屎咖啡粉，再沖熱水就會自然滴入個杯，連豆都唔使磨， model Emily呢個初哥都搞得掂！（$50/連 20g仿貓屎咖啡粉）

想易入口要試試自家 House Beans（左），用三種豆混合，加糖加奶後口感順滑易飲，重口味者可以試耶加雪菲出品（右），香味持久、酸味明顯但溫和，第二度肯定飲唔到。（各$15/20g）

熟客華少

「早幾個月行過間鋪，個老闆三九唔識七，走埋嚟問我有冇飲開咖啡，傾傾吓仲話請我試飲，咁就幫襯咗佢到𠵱家！佢啲豆我試晒啦，最正都係日本嗰隻，我覺得自己沖得仲好飲過四十蚊杯嗰啲！」

My Little Coffee

地址： 1樓 27室/ 34888387

當年好景

好景响 1983年落成，初期已經係一個以賣遊戲、模型為主嘅場，因為翻版遊戲响香港大熱，由紅白機、超任到 PS年代，遊戲影響力一直上升，結果亦慢慢令好景變成著名老翻場， 90年代開始，好景已經係鹹碟同老翻嘅代名詞，商場龍蛇混雜，門口直情有四仔阿伯以「四樓有四級」口號拉客。 01年開始警方高調嚴打老翻，一直到 05年好景先正式有業主立案法團，從此多項翻新工程展開，鹹碟老翻亦慢慢絕跡。

平信和一半租

恆發物業羅先生 

「做犯法嘢嘅唔會租，近年啲鋪都係賣精品、遊戲， 3年前呢度仲係好靜，月租 4、 5千就得，𠵱家最貴要萬二蚊，相比信和、先達都仲係平一半有多！好景勝在有主題、人流多、租金平，我估去到萬五蚊都唔難！不過一樓商場淨係可以做零售，賣魚蛋奶茶嗰啲就一定唔得嘞！」

GOOD DAY AT HO KING 02　好景有格靚女美甲？

咪以為好景淨係得間咖啡豆專賣店咁反高潮，行過幾步，向來都係麻甩佬勝地嘅好景商場，竟然有間美甲鋪！雖然睇落裝修簡陋，但老闆 Penny做美甲 10幾年，牆上擺晒證書，絕非渾水摸魚街邊檔。咁爆，即刻叫 model Emily走去試吓手勢， model話喺好景修甲感覺有啲怪，但整完後覺得水準好好，約$170做到貴鋪質素。𠵱家女仔等男友買 game，唔使驚四圍都係公仔佬、或者要企喺地下食塵，修住甲等男友都得啦！

Penny話歡迎 walk-in客，但開喺好景純粹方便九龍區熟客，所以暫時開店時間好 free style，見唔見到佢真係講緣分。 

環境唔大亦唔算靚，真係得一格仔位，叫做有梳化坐吓，但最重要係設備齊全，整得唔靚，裝修幾豪都冇用啦！

P&R Nail

地址： 1樓 53室

與佛有緣

呢間以往喺先達廣場頂樓賣泰國佛教飾物嘅鋪頭，其實都搬咗去好景一段時間。推薦人緣鈪，易櫬之餘，店長話經大師開光，有法力，戴咗可以提升人緣。

冇佛教信仰就唔使買佛像咁 heavy，揀隻人緣鈪戴吓先。（$150） 

風生水喜泰國佛牌

地址： 1樓 30室

炒埋 Hot Toys

好景有玩具鋪唔算好出奇，但呢間玩具鋪收埋唔少好嘢，好似呢個《 Iron Man 2》特別版可動人偶就超激罕，我諗 Hot Toys自己都冇，咁就有番理由要去睇吓嘞！（$4,680）

Toys Man

地址： 1樓 22室/ 9230 7350

實力提升

唔少信和鋪都因為租貴搬咗去好景，好似呢間賣動漫嘢嘅小店就係其中之一。 

老闆話呢本「蘿球社」作者出嘅畫集最搶手，所剩無幾，識貨就去搶啦！ 

三一同盟

地址： 1樓 54室/ 2359 9938

GOOD DAY AT HO KING 03　即睇好景最好玩樓上鋪！

其實好景全高 29層，除咗最低 3層商場廣為人知，今時今日其他樓上嘅商戶都慢慢形成一股新勢力，七點左右經過你就會見到電梯口大排長龍。至於四樓仲有冇四級？個阿伯都失業咗咁耐，呢啲咁「娘」嘅嘢梗係冇啦！不過大部分鋪頭 8點就開始關門，上去前最好都係問定營業時間比較穩陣。

16F

開咗唔夠三個月嘅新概念任換時裝專門店，畀$98一個月，成間鋪嘅衫任借，每次借一件，下次還番就可以換另一件，非常有趣，仲已經有電台介紹過添！
轉 look/ 9668 2665

8F

買泰拳用品唔使去尖咀搵，呢間店响上海、北京都有分店，要乜有乜，價錢亦賣得比較合理！
Twins Boxing/ 2851 7999

3F

三樓 Aqua cafe別有洞天，雖然位置隔涉要搵路先上到去，但有個煞食露天環境，加埋食物水準都唔錯，幾好 hea！
Aqua Cafe/ 3693 4818

26F

呢個本地自家設計嘅服裝潮牌，位置差唔多去到頂樓，非常隔涉，但採訪當日都見到有人幫襯，老闆話其實都係靠 facebook做宣傳，款式方面冇乜「 MK味」，可以一睇！
Octo gambol/ 9648 3447

15F

好景中心樓上最多其實係樂器鋪，呢間租房賣嘢教樂器一站式，近期仲推廣緊 Ukulele，款式好多好靚，唔只引到女仔，小朋友應該都會幾鍾意。
Megatone/ 2374 2666

4F

好多同事都好奇𠵱家好景四樓有咩賣，答案就係，四樓竟然有間非常四正、貨色都相當唔錯嘅 BB用品店，由四仔變成 BB仔，夠晒反高潮！
Babie Smart/ 3995 1155

好景商業中心

旺角花園街 2-16號

周圍古老景點多

好景 30年來變完又變，但其實好景附近有唔少地標分分鐘廿年都冇變過，肯定一聽就知，例如街口嘅劉華牙醫，記者細細個仲係小學雞時已經笑過，冇廿年都有十年歷史，另外對面街潮式粉麵店德園麵家，門口張「大大碗」仲响度，其實係當年金融風暴，全旺角粉麵店都要賣 10蚊碗，都未計廣華街一帶有全香港最齊 war game鋪，總之講極都唔完！

奴 COMMENT

好景是我小學開始流連的地方，當初接觸任天堂遊戲、到成長時到那裏買水貨 PlayStation、買 game、還有買賣二手相機。好景是我接觸世界的隨意門。
雖然沒有買過四仔，但仍懷念樓下冇牙阿叔拎住咭片叫囂「四樓有四仔」的有趣回憶，翻新的好景會變成如何不知道，但請保留接通世界的接口！

撰文：熊俊彥
攝影：彭自維
Model： Emily Suen@GlobalSaga Media Entertainment Ltd.