搞肥姐紀念騷　陳淑芬遭何B轟掠水

■何守信直腸直肚，直言如有人發死人財，一定遺臭萬年。

今年係肥姐沈殿霞逝世5周年，曾志偉、張學友、汪明荃同埋胡楓等為悼念故友，定喺6月1日肥姐嘅生忌舉行紀念騷；早前為張國榮舉行十周年紀念演唱會同推出紀念品嘅陳淑芬（陳太）都係搞手之一。肥姐生前拍檔何守信（何B）噚日同林超榮、陳淑蘭喺又一城出席港台《開心日報》午宴時，起初都話會睇情況參與，但係講到陳太喺張國榮騷賺咗二千萬？何B即刻好㷫咁話：「如果有人係為中飽私囊就好反對，佢自己一定會遺臭萬年，借其他人去達到自己私慾，點解仲要支持，完全唔使考慮（出席），連最基本嘅懷念都做唔到。」

■肥姐（左）生前同陳淑芬（右）老友，陳淑芬所屬嘅公司最近為肥姐舉行逝世5周年演唱會。

幫忙同支持已夠

另有指陳太其實係為咗幫肥姐圓夢，因為肥姐生前已經好想囡囡欣宜踏上紅館舞台，何B越講越勞氣：「阿肥對欣宜嘅期望喺生前已好強烈，但我個人意見，佢嘅期望令欣宜好大壓力，呢方面對阿肥都好有意見。𠵱家阿肥過咗身，期望佢（欣宜）成才都要佢自己成才先得，朽木推上去都會冧番落嚟，給予幫忙同支持就得，佢咁借阿肥嘅願望去巧立名目，對佢嘅做法好有懷疑，做到幾冠冕堂皇都冇用。」何B強調係對事唔對人，佢話：「無論點做都唔會影響大家對被懷念嘅人，喺心目中嘅形象，呢啲嘢唔關過咗身藝人或任何人事。」
撰文：馮仁昭