tvbfun娛樂八掛大放送★

李嘉欣為囝囝力抗流感

內地爆發H7N9禽流感，疫情不斷抗散。雖然香港未有確診個案，但身為好媽媽李嘉欣，對於抗疫早就做足防範。上週四(11日)，李嘉欣出席活動時，話Jayden冇因為疫情而受影響，每日都如常返學同其他學習班。因為如果所有活動停晒，怕Jayden屋企會好悶。不過出到街佢就要囝囝勤抹手，不時用酒精紙巾抹手。但李嘉欣估唔到為囝囝好，卻換爸爸許晉亨投訴。許晉亨嫌Jayden對手被酒精搞到「鞋」晒，心痛都痛埋。其實你估李嘉欣唔心痛咩，佢堅持繼續咁做係覺得囝囝總好過因為受感染而入醫院。唔好以為李嘉欣只係得個講字，佢為Jayden健康，就親身示範一次勤抹手。

日前，Jayden係銅鑼灣上playgroup，李嘉欣趁有時間同保鑣、保母同工人，一行四人浩浩蕩蕩咁去接仔放學。雖然李嘉欣貴為闊太名媛，但接放學時同其她媽咪有傾有講，交流湊仔心得。當日見所有媽咪手上都拎住仔女上堂時習作，但李嘉欣手上多一包抗菌濕紙巾，而且有一張仲已經用過。好明顯Jayden一落堂，李嘉欣即刻用濕紙巾幫佢抹手，減低佢因為參加課堂而受感染風險。

近日李嘉欣雖然不時會微博上載囝囝近照，但全都係背影。睇佢覺得Jayden已經開始大個，唔想佢個樣再曝光。所以李嘉欣見到有記者影相，即時示意身旁保鑣保護少主人。由於事出突然，外籍保鑣即時以遮擋鏡頭，並及時撐開傘子，避過Jayden曝光機會。雖然李嘉欣唔想囝囝曝光，但都好守交通規則，冇隨隨便便停街邊上車。由司機駕駛白色保母車，早就停係附近利園商場，保母先抱Jayden上車，然後先到李嘉欣。最後，兩母子雖然已經安全上車，但保鑣繼續撐住遮幫李嘉欣開路，唔想俾記者有機會影到入車廂，認真夠細心，抵讚！

放大圖片