原裝正版 Segway賣五萬幾蚊港幣， Arnold呢架土炮 Regway套裝就賣萬六蚊，不過，大家喺香港都出唔到街呢。 

IGOSSIP

電動輪椅冇監管

好鍾意研製機械人嘅土產發明家 Arnold， 06年曾經接受過我哋訪問，當年佢已經整咗條體感控制機械臂，之後又整咗隻二足步行機械人，用嚟教囡囡學行。

近排見佢 Facebook有 update，原來佢自製咗套土產 Regway（原裝叫 Segway） kit set出嚟，買返去跟住砌，就可以擁有一架兩輪自動平衡車，仲開始俾人訂購添！咪住先，呢架車喺香港揸，犯法㗎喎， Arnold就話佢主要 sell外國客，仲已經有一個客訂咗。佢話原本都想向運輸署申請牌照，「搵番之前啲報導同條例，運輸署話 Segway設計屬於電單車，但又唔符合香港道路交通規格，所以唔會發牌。」 Arnold補充話摷資料嗰陣，發現警務處指電動輪椅唔屬於交通工具，所以唔會用交通條例檢控當事人，既然係咁，佢下個目標就係兩輪自動平衡輪椅，整出嚟一定快過向運輸署爭取 Regway合法化咁話。

以眼還眼

百度之眼，外形囉喎，梗係冇得同 Google Glass比較啦。 

美國 IT界近期熱話，肯定係 Google嘅智能眼鏡 Glass即將派俾首批測試人選，好多人都想試吓究竟有幾好玩。上個禮拜內地嘅中文搜尋器龍頭大哥百度，亦唔甘心輸俾 Google，證實咗佢哋都開發緊一副智能眼鏡 Baidu Eye；眼鏡上同樣有個 LCD芒仔，兼夾可以語音操控，聽落效能同 Google Glass差唔多。不過，百度會大量過濾敏感字眼，同香港政治有關嘅嘢都 search唔到，淨係識得對共產黨歌功頌德，咁副眼鏡即係用嚟蒙蔽人雙眼㗎啫。

騎劫首頁

傳得火熱嘅 Facebook Phone，上個禮拜終於現真身，正如大家所估計，除咗公布嘅 HTC First內置 Facebook Home，其他 Android手機都會陸續有得裝。睇 demo， Facebook Home會騎劫手機首頁，用嚟顯示朋友動態、相同埋即時訊息，再通過唔同 gestures去睇訊息、俾 Like或開番其他手機 app……講到尾，似係一個影像主導嘅 launcher多啲。由於首頁被騎劫，其他 apps例如 twitter、微博嘅 notifications就唔會第一時間 show喺首頁，搞到用起上嚟冇 Facebook咁方便，變相抬高自己踩低其他 apps，呢招認真絕呀！

其中一個功能 Chat Heads幾好用，唔使離開用緊嘅 app，就可以覆到朋友嘅即時訊息，如果 WhatsApp都可以咁就好喇。 

首頁用晒嚟顯示 Facebook嘢，其他 email、日程提示咪冇晒？ 

text：周群雄