比賽前，阿 Paul交足戲，話自己嚟參加比賽「是來贏的」，點知第二場就出局，就連復活戰都衰埋。
同你吟一吟
黃貫中出醜執卅個
大陸綜藝節目叫明星跳舞跳水，仲有搵歌手一齊參加歌唱比賽爭冠軍，諗頭多錢一樣多。由湖南衞視製作，聲稱史上製作費最高最認真嘅歌唱比賽《我是歌手》，請嚟兩岸三地現役歌手上台展開 PK賽。
香港代表，有黃貫中。當正自己係香港搖滾教父，要佢上台比賽，仲要拍成真人騷出街，阿 Paul咁都肯，無非睇中主辦單位出價十萬人仔一集，只要成功過五關斬六將，分分鐘可以成為百萬富翁。一向沙塵嘅阿 Paul，賽前仲話要嚟攞冠軍走人。
據聞首場比賽，阿 Paul以《海闊天空》迎戰，帶動全場五百位有份做評判嘅觀眾拍手跟住唱，就算同場有來自台灣嘅齊秦，以及國內音樂才子羽泉，阿 Paul都攞到第三，可以繼續下一輪 PK戰。可惜一唔唱 Beyond作品，改唱張學友嘅《吻別》，即刻响第二輪比賽攞第尾飛出局。
就算大會突然話有復活戰，俾多次機會，點知阿 Paul都衰埋，頭尾執得三十萬咋！
阿 Paul收十萬一場比賽，其實價錢算低，有份比賽兼分數領先嘅齊秦，每場袋近三十萬人仔。 
Beyond三十周年演唱會開唔成，阿 Paul北上搵奶粉供養囡囡黃鶯。
撰文：八珍
全站熱搜
留言列表
