下月 40歲嘅堺雅人，曾入讀日本著名大學早稻田專修中國文學，但因熱愛演戲而中途休學。扮乜似乜嘅佢，其實做足多年綠葉王，今年終於憑《半澤直樹》吐氣揚眉，星途有啲似 TVB視帝黎耀祥喎！ 

日面

半澤直樹堺雅人　上位要在中年後

今年日劇大豐收，繼上季《神探伽俐略 2》帶旺收視後，由堺雅人主演，以銀行做背景，講述職場爾虞我詐，不畏強權打倒賤老闆的《半澤直樹》成為近期熱話，上週日（ 22日）播出大結局，平均收視高達 42.2%，最高收視更曾攀升至 50.4%，超越 13年前木村主演的《美麗人生》 41.3%結局收視，成為本世紀最強日劇。無綫亦唔執輸，即買下播映權，暫安排於 12月在 TVB網絡電視煲劇台播出，傳聞稍後更有機衝上大銀幕。
39歲，開始步入中年的堺雅人，能打低木村成收視神話，自然成為大紅人，最近除接住演出於 10月出街的新劇《律政狂人 2》，廣告價更加倍狂升。𠵱家紅到發紫，但堺雅人亦曾經捱過唔少苦頭，更曾為了完成演藝夢同老豆斷絕關係，成功背後少不了一籮辛酸。

改編小說的《半澤直樹》，講堺雅人飾演的半澤直樹，小時因銀行堅拒融資畀佢老豆間公司，最後其父走投無路吊頸自殺。半澤一心為父報仇，於是大學畢業後即加入該銀行，點知入職後被上司老屈，於是他憑自己的智慧，同班奸狗上司鬥到底，最後當然惡人有惡報。

迫賤上司下跪

劇中，半澤最大敵人就係曾迫死佢老豆嘅上司大和田常務。大結局一集，講明要大和田常務 100倍奉還嘅半澤，終於用正義戰勝邪惡，最後大和田常務更要當眾向半澤下跪道歉，大快人心！

彩姐醒目

劇中，上戶彩飾演半澤直樹老婆半澤花，性格樂觀爽朗兼且唔囉唆，更識為老公收料來對付班奸狗上司，唔少㗎佬都話想有個咁嘅老婆。

身價 double上

劇中堺雅人憑住「以牙還牙，加倍奉還」的座右銘對抗班賤格上司，一眾打工仔感同身受，所以《半》劇由 7月開播後收視有升冇跌，上週播出大結局平均收視更高達 42.2%，成本世紀最高收視日劇。
《半》劇被捧為神劇，堺雅人亦被捧為打工仔英雄，現時堺雅人已成為日劇搶手貨，最近接住上演的秋季日劇《律政狂人 2》，劇接劇。
除拍劇，堺雅人更成為廣告界新寵，據知最近堺雅人的廣告酬勞更由原本 2,000萬日圓（約 156萬港元），颷升至 3,500萬日圓（約 274萬港元），身價加倍暴脹。

92年已入行嘅堺雅人，初出道時其實走過偶像路線，扮靚仔幫唔少雜誌影相，當時嘅佢個樣有啲似梁烈唯㗎！ 

爆紅後，最實際係搵真銀。堺雅人嘅廣告酬勞由 4個月前嘅 2,000萬日圓升到 3,500萬日圓，賺到笑。 

窮到食草

扮乜似乜的堺雅人於 95年入行，做足多年都是綠葉王，去年主演《律政狂人》才企穩一線。最辛酸一定是入行前，據知堺雅人讀書時，因熱愛演戲而荒廢學業，更為完成夢想而休學，卻因此激嬲父母，更嬲到與他斷絕關係，停止給他生活費，最後雙方停止來往達 7年時間。
早前堺雅人接受訪問時自爆：「憶述起當時，我為咗養自己，除努力打工賺錢外，更曾試過喺路邊摘蒲公英帶返屋企點醋嚟食。」聽見都心酸，但𠵱家賺到盆滿缽滿，日日食和牛配白松露都得啦！

老婆好腳頭

39歲堺雅人上年同細自己 3年嘅菅野美穗因拍電影《大奧∼永遠∼》而撻着，拍拖唔夠一年，今年 4月更拉埋天窗，婚後堺雅人事業一路暢順，菅野美穗真係好腳頭。

港星都追

《半澤直樹》於日本掀起熱潮，而呢股熱潮更吹到嚟香港，香港網民跟到貼集集追。一班港星亦唔執輸，由頭追到尾，所以話「邊個老闆唔乞人憎」呢類題材真係去到邊都受歡迎。

古巨基

真係神劇，忠奸分明，半澤直樹明刀明槍都可以戰勝賤老闆，好嘢！最重要係日劇唔會好似港劇咁，壞人一定要擄走人哋啲屋企人做要脅囉！

周秀娜

半澤直樹有句金句「下屬嘅功績係上司嘅功勞，但上司嘅過失係下屬嘅責任」同「以牙還牙，加倍奉還」，中晒打工仔心聲，我覺得半澤真係打工仔英雄。

撰文：何家文