幸福滿瀉上週六（ 28日），陳茵媺在晨早 5時落機，愛妻號陳豪一見太太便即刻上前輕撫嬌妻凸起的小腹，成副幸福樣。
真面目
待產夫妻 老婆接奶粉廣告 陳豪停工陪茵媺安胎
金童玉女陳豪、陳茵媺呢 pair本來已經平易近人萬千寵愛，五月有餡、六月成婚以來，更加係雙喜臨門心情靚爆，去到邊都幸福甜蜜仲有能耐感染埋身邊人。上週六（ 28日）清晨五點，陳茵媺回港待產，小別兩個月嘅老公陳豪接機，影相訪問簽名仲同全場記者大合照，榮登最受歡迎圈中伉儷！
結婚係計劃之中， BB就係意料之外，搞到好好先生陳豪陣腳大亂，原定的離巢、北上、做生意大計全部要重新計劃，除了搵真銀的奶粉廣告，陳豪實行停工至下年，等老婆生完至算。
晒巨鑽陳嫂回歸，手上多咗隻巨鑽，挺住 5個月的陳茵媺：「頭幾個月係咁攬住個廁所嘔，哈哈哈！」
大計泡湯
自從二千年從電影圈轉陣電視、簽約無綫，陳豪極速晉升一線小生，亦任勞任怨長年埋首電視城耕耘。十三年後，陳豪地位非一般，諗頭亦都唔同當初，年初與無綫合約尚有一年未屆滿時，已經高調放話打算向外闖。
「都係諗好晒，先至夠膽講出嚟嘅！其實阿 Mo一直好想做生意，呢幾年拍劇都係主要同老拍檔合作，唔係咩劇都肯拍。咁戚其義、梅小青、劉家豪都離開無綫囉，所以佢都唔想再留。本來嘅計劃係簽 TVBC，做生意為主，其他時間北上拍劇搵真銀，結果五月 Aimee有咗 BB，計劃就亂晒！」陳豪身邊人透露。
陳豪最近忙為電影《點對點》趕戲，據知《點》片將於今週煞科，之後陳豪便會停工數月，只接商演廣告等活動，全心陪太太待產。《蘋果日報》圖片 
陳豪週日（ 29日）再為電影《點對點》開工，對於兩公婆齊齊拍廣告搵錢，陳豪笑住話：「等經理人安排，有人接觸過！」 
陳茵媺雖懷胎 5個月，但難得四肢仍然好纖瘦，上車都仲好輕鬆，週日（ 29日）揸車出外仲發生小意外，幸好大人 BB都無恙。 
直返新居陳豪為阿 B，晨早已用 3,000萬買下大埔比華利山別墅畀老婆及 BB享用，接機後陳豪即驅車返去新豪竇。《蘋果日報》圖片
續約轉陣
現正跟無綫傾續約的陳豪，獲樂易玲優厚條件挽留，據知將為人父的陳豪留 TVB機會頗大。
年初幾乎立定主意不續約，本來還埋《法外風雲》及下年另一套由新監製陳耀全拍攝的新劇兩個劇債就全力北上，如今太太有餡當然就要另作打算。
據悉為不想長期丟下妻兒，陳豪先打消北上拍劇念頭，又為保持固定曝光和收入養家，陳豪正式與無綫商討新約細則中。為妻兒焗留低的陳豪亦實行兵分兩路，趁住幸福待產期，積極與 Aimee齊齊接廣告搵快錢。而形象正面的陳氏伉儷亦確實有價有市， Aimee懷孕後期及產後一年的工作表，已經被廣告商及客戶 mark實，除了陳太今週以 20萬接一手表活動外，盛傳極有機會接下的奶粉廣告就有八位數字酬勞。對於夫妻檔搵食，陳豪週日則說：「等經理人安排，有人接觸過！」
御用監製閃晒
陳豪套台慶劇《法外風雲》將於 10月 14日播出，監製係回巢的徐正康，女主角又係甚少合作的陳法拉。 
拍新監製據知陳豪在下年約滿前雖會多拍一劇，監製則是新晉升的監製陳耀全（中），作品有《師父明白了》，但成績麻麻。
留言列表
