登機證

三百萬粒 LEGO　加州酒店

有邊個未玩過 LEGO先？根據官方統計，原來全球每人平均擁有 80粒 LEGO，在未有 iPad的年代，這塊小小積木，一直陪伴你我成長，仲記得當年的宣傳口號「樂高多創意，件件考心思」嗎？
上年聖誕，時代廣場一出 LEGO展覽， facebook、 instagram通通洗板，足證 LEGO在今時今日仍然人氣爆燈！
上星期位於加州 Carlsbad、全美首間 LEGOLAND酒店開幕，用上三百萬粒 LEGO砌成 3,500個模型，海盜、城堡及冒險主題房裝潢靚又有氣氛，房內及大堂都有 LEGO任砌。小朋友固然玩到癲，家長們同樣興奮，一粒 4× 2膠磚的魔力，大小通殺。橫跨 80多年的玩具，始終比一個人玩 Candy Crush更實在。

三種主題　房間篇

作為忠實 LEGO迷，對 LEGO酒店當然有期望。全球只得兩間以 LEGO作主題的酒店，一間在 LEGO故鄉丹麥，但加州這一間規模更大更精緻。酒店位於 LEGOLAND旁邊，三層高酒店似彩色城堡，前一頁的大門鐘樓有噴煙巨龍迎接，小朋友見到大堂內的 LEGO池，必定雙眼發光，大人則被接待處五千多個 LEGO人仔牆吸引，震撼！
三層酒店房分別為王國、海盜及冒險主題，共 250間房，部分房間更有露台。 Deluxe房布置比一般的精美，如我住的海盜主題房，由地氈到牆紙都有 LEGO蹤影，有海盜帽、寶藏、四腳蛇等七八個模型，可惜模型全部固定在牆上，得個睇字，想玩？房內有藏寶箱，破解開箱密碼，即獎你 LEGO人仔，仲有成盒 LEGO慢慢砌。如果連電視、水龍頭都係 LEGO砌成，就真係冇得彈。
所有房間都有小朋友獨立房，設私家碌架床及獨立電視，可以拉出子母床容納三人，大人細路各自瞓，更裝上小朋友防盜眼及廁所板，細心。普通房最平每晚$1,800左右，一家五口去最抵住。

3/F冒險房冒險主題最受歡迎，相對冇咁 sharp但帶濃厚中東風情。 

廁所位有大量模型，連浴簾都有 LEGO公仔㗎！ 

2/F海盜房位於二樓及三樓的房間先有露台，只有八間對正泳池靚景。

小朋友電視冇暴力色情節目，只有卡通片及合家歡電影。 

1/F王國房小朋友房的碌架床都算闊，牆上寫明叫大人走開，小朋友實開心。 

每間房至少有八個模型，砌得精細。

遊玩最強　公眾場所篇

在房間玩完，不妨走出公眾地方繼續探索，包你有新發現！酒店有不少好玩幽默的小機關，如升降機門一關上，燈光即時調暗，大播多首經典 Disco歌，好過癮！室外的小龍又會噴水，唔係齋擺設咁死板。遊玩區位於酒店大堂後方，大型海盜船場景夠靚，但得 LEGO積木同黑板，玩意不多，好彩每晚都會安排特備節目，同小朋友講故事玩遊戲補數。
餐飲較簡單，只有自助餐廳、酒吧及咖啡室，食物款式唔多亦冇特色，勝在周圍都有 LEGO公仔，部分仲會轉動，有人扮 LEGO角色同你影相，墊枱紙又可以俾小朋友填色。酒吧內的擺設較成熟，包括 LEGO人仔系列晒冷、城市場景，室外位的椰樹似曾相識，有砌開 LEGO的實會覺得親切。泳池及健身房均屬蚊型，算啦，入住都係方便去隔籬 LEGOLAND玩，可以優惠價每人$602購買兩日全包套票，住客仲可以優先入場，排少個鐘，有賺！

自助餐廳室內外共有十八個LEGO廚師模型，可愛。 

最愛 Disco𨋢，大播《 YMCA》、《 Saturday Night》等經典老歌。 

Skyline Cafe內的模型有 35個場景，細心留意會見到有人沖涼，好抵死！

LEGO最新推出的 minifigure系列，十套晒冷任你觀賞。 

泳池最深只有 1.5米，週末更會在池邊播放電影。 

所有小朋友見到 LEGO池都立即跳入去，砌得靚仲可以存放在大堂展示。

酒店側門同樣色彩繽紛，噴水龍就在這裡，小心！ 

單車輪上有放大鏡左右橫掃 LEGO人牆，睇清楚原來有重複！ 

遊玩區結合海盜船及城堡，每晚有人同小朋友玩遊戲。

等𨋢位有放屁發聲地毯，每層都報上層數的 LEGO公仔。 

酒店內共有四條龍，這條在大堂中央，按下隱藏按鈕，會發出流水聲。 

餐廳設有免費蠟筆，小朋友可以在墊枱紙上填顏色。

LEGOLAND California Resort Hotel

地址： 5885 The Crossings Drive, Carlsbad, CA 92009
電話：（ 1） 877-534-6526
房價：每晚$1,796起
網址： http://legoland.com/hotel 

濕身大戰　 LEGOLAND

加州 LEGOLAND分成九區，我們行多玩少都要玩足成日，雖已有十幾年歷史，但每兩年一定增添新景點或遊戲，保持吸引力。如兩年前開幕的 Water Park，是唯一一個 LEGO主題水上樂園。入場須額外加$116，或者在 LEGOLAND入口買定套票。有除衫落水的衝動但冇準備？唔怕，門口有得賣潮牌 Quiksilver同 Roxy泳衣毛巾等裝備。地方雖然唔大，但足夠消磨一整天。
最搶眼是 14米高的五彩塔，有四條滑水梯，最長的 Orange Splash接近 100米，坐上四人大水泡滑下。
溫和點可玩 Build-A-Raft River，坐水泡慢慢在河流漂浮，與特大 LEGO膠粒一同漂浮，更要隨時閃避 LEGO巨人射水！有不少長椅俾人曬太陽，年紀太小的小朋友亦有淺水區，一家大細都照顧周到。

在 Build-A-Raft River，可以將巨型 LEGO砌在透明水泡上，水流緩慢，水深不足一米，小朋友都可以玩。 

水槍射程唔遠，純粹俾小朋友過下手癮。 

整濕衫都唔怕，有多部烘乾機，可以一次過供四人使用。

鐘樓定時定候有足足 350加侖水兜頭淋下，小朋友勁 enjoy！ 

想刺激要數最新的 Pirate Reef，坐在橡皮艇上直插入水，水花高到圍觀者都遭殃！ 

LEGOLAND比併

LEGOLAND California Resort

地址： 1 Legoland Drive, Carlsbad, CA 92008
電話：（ 1） 760-918-5346
開放時間： 10am-5pm， Water Park 12nn-5pm
票價：成人$753、小童$675，已包 Water Park及 SEA LIFE Aquarium入場費

玩埋迪士尼　駕駛閃電王麥坤

坐咗十幾個鐘飛機，冇理由唔順便去埋距離 LEGOLAND僅一小時車程的 Disney California Adventure Park。上年開設以《反斗車王》（ Cars）作主題的 Cars Land，冇華麗光鮮的城堡、王子公主甚至米奇老鼠，但有陳舊的汽車及充滿鐵銹的路牌欄杆，將整個打冷鎮（ Radiator Springs）忠於電影地移植！《反斗車王》迷都應該認得 66號公路及有六個尖峰的 Cadillac Mountain Range，路旁的機動遊戲、餐廳及商店外形都帶點仿古 feel，入型入格。閃電王麥坤及哨牙嘜會輪流出來影相，造型生鬼神似，仲識得同人講嘢、左右搖動，行駛時似足真車，可惜角色唔多，當日只見四架，唔夠喉！
Cars Land佔地 12公頃，但只有三款機動遊戲，最好玩的過山車 Radiator Springs Racers，人龍長到要排兩個半鐘！建議拎定 Fast Pass或者排單人線，快得多，我們只等了約二十分鐘就上到車。坐上不同款式的六人車，先慢慢經過車呔店、麥田等一幕幕電影場景，由模型車及投射動畫組成，登場角色仲多過大街，細緻逼真。未回神，車子突然加速，極速穿梭 Ornament Valley山谷中，同時有兩架車並排鬥快，瘋狂尖叫聲加埋響亮的引擎聲，大人玩都覺刺激！去埋餐廳 Flo's V8 Café醫肚，兒童餐有麥坤車形餐盒，仲靚過精品店售賣的行貨， fans必儲！

Radiator Springs Racers由室內飛車飛到室外，坐車的左手邊，可以睇得更清楚。 

商店外形好靚，但精品唔突出，買唔落手呀！ 

每日有六場 show，邀請小朋友參與勁歌熱舞，氣氛一流。

坐上迷你版哨牙嘜，不停自轉再公轉，車速唔快但玩完都頭暈。 

原理如氣墊球，用身體重心控制車呔移動方向，似慢版的碰碰車。 

麥坤兒童餐$109有三文治、蔬果及飲品，算健康！汽水連雪糕筒杯另售$75。 

麥坤同哨牙嘜每十五分鐘就換班，要夾啱時間！ 

Disney California Adventure Park

地址： 1313 S. Disneyland Drive, Anaheim, CA 92802
電話：（ 1） 714-781-4636
開放時間： 8am-10pm
票價：成人$675、小童$629

有用資料

簽證：持特區護照及 BNO均須簽證
機票： LEGOLAND位於聖地牙哥，迪士尼則在洛杉磯，可於三藩市轉機，聯合航空每日一班前往兩地，出發時間為早上 11:30，於中午到達。票價由$10,492（聖地牙哥）及$7,673起（洛杉磯）。
天氣：加州天氣和暖， 4月平均氣溫約 18度，入夜較涼，著多件外套保暖。日間陽光猛烈，宜帶備防曬用品。
交通：加州交通不便，建議租車自駕前往 LEGOLAND及迪士尼，多個機場均可取車及還車。 rentalcars.com有多間不同租車公司比較，價錢比 Hertz及 Avis便宜。
貨幣： 1美元約兌 7.8港元
備註：樂園每天開放時間不定，亦不時會休息，宜先上網確認及購票，買兩天套票較抵。

飛長途機，寧願加錢選擇 Economy Plus座位，空間增加 5吋，舒適得多。 

鳴謝：聯合航空

撰文：張頌婷
攝影：胡春輝