探熱針
還人情:佘詩曼橫店秘拍《金枝慾孽貳》
一口答應
佘詩曼自從前年離巢後,無綫不時利誘她返娘家拍劇,甚至以靠食腦的黃子華合作為餌,不過依然被矢志內地賺人仔的阿佘所拒。
舊主出動王牌,一樣無法打動佘詩曼,唯獨老拍檔戚其義吹雞求救例外。據了解,去年六月底,《金枝慾孽貳》在橫店開拍期間,阿佘曾客串出鏡。
「之前阿佘一直話有劇撞期接唔到阿戚部《金枝貳》,後來阿戚搵佢客串,佢見抽到時間,都即刻應承。喺橫店埋位嗰日,阿佘都係等到劇組拍到差唔多,臨收工前嗰幾個鐘至出現,所以成件事冇乜人知。其實佢只係拍咗幾個 shot,有可能似《阿飛正傳》入面嘅梁朝偉咁,臨尾有幾個鏡頭,留番一條伏線。」一名工作人員說。
《金枝貳》有兩屆視后鄧萃雯,以及在國內人氣大升的蔡少芬,加埋陳豪及伍詠薇,卡士算有睇頭。
總之有驚喜。(設計對白)
《金枝貳》搞煞科宴,阿佘要在下半場圓方餐廳飲嘢先出現,伍詠薇跟苟芸慧等宮女合照放上微博,在現場的阿佘亦避上鏡。
現身慶功
今年一月,在《金枝慾孽貳》殺科宴兼為戚其義及周旭明餞行飯局中,原來有份客串的佘詩曼當晚亦有到場,為避開傳媒耳目,她刻意等到下半場才出現,跟伍詠薇、苟芸慧、黃德斌等到圓方的餐廳開香檳繼續慶祝。
「阿佘冇去尖東個飯局,因為殺科宴有記者,嗰晚好夜先 join番一齊玩,因為阿佘同阿戚關係好好,所以大家一啲都唔覺得奇怪,仲玩到兩點幾先走人。」知情者說。
為保最後一炮收視好好睇睇,戚其義出動人情牌,搵佘詩曼幫拖,為先後效力無綫二十八年,畫上完美句號。
○四年《金枝》第一集開記招做宣傳,現已離巢的林保怡跟未嫁入豪門的黎姿,以及佘詩曼、鄧萃雯在曾勵珍的帶領下大晒冷。
《金枝貳》有一場太監韋家雄強姦宮女龔嘉欣戲份,二人在橫店拍外景時零舍熟落。
為求認真,楊秀惠跟新人李興華都要搵師傅學崑劇造手。
陳豪跟關禮傑在劇中扮大老倌及花旦,之前要頻聽崑曲取經。
《金枝貳》在電視巡禮的宣傳片段,有蔡少芬跟鄧萃雯同床互嘴,正式拍攝時,同性戀元素會被大幅度刪減。
留言列表