開設時裝店的 Andy(中)和 Moon(左)兩夫婦,找來好友 Alan(右),在荃灣新之城商場開設日式雜貨店千之屋,成功引來大量年輕顧客。店鋪每星期都有主題熱賣貨品,最近經常下雨,所以這星期的主題是雨傘。 

壹盤生意

日式淘寶雜貨店 一開即賺

「全場三十五蚊,拎上手唔好放低啦,放低就無㗎啦!」此起彼落的叫賣聲,響徹商場走廊。這間取名「千之屋」的日式生活雜貨店,每到放工或假日就人頭湧湧,對面鋪的老闆娘大呻夜晚發噩夢都聽到叫賣聲。
千之屋意指千樣貨品的店鋪,其實是「倒模」日本的雜貨店,由雨傘、文具、毛公仔至醬油瓶、收納箱都有。老闆黃智威( Andy)和陳敬瑜( Moon)原開設時裝店,經常要到日本入貨, Moon笑說:「成日行日本嘅三一五円店,覺得啲嘢好靚同好抵,就試吓喺香港開。」於是,找來好友曹思倫( Alan)合資開鋪。想不到,千之屋開業四個月,每個月都有約六萬五千元的盈利,三人現已籌備五月頭在葵涌廣場開分店。雖然一開即賺,但沒有經營雜貨店經驗的老闆們,背後仍要面對一連串出乎意料之外的問題。

 


千之屋其中一個模仿對象是日本的 CouCou三一五円店,在日本有兩間分店,由貨品到裝修風格十分相似。 

千之屋的裝修、擺設,甚至音樂,都是「倒模」日本的三一五円店。白色貨架及粉紅色的牆身,全日不停播放的 AKB48歌曲,負責鋪面設計的 Moon笑說:「佢哋啲歌旋律夠快,可以激勵士氣。」另外,還有全日不間斷的叫賣方法,「呢樣係日本嗰邊嘅撒手鐧,有助增強店鋪氣氛及員工士氣,同時又可以令各個員工知道對方嘅位置,方便補位。」正在收銀的 Moon,雙手忙個不停,仍不時以響亮的聲音大叫:「全場三十五蚊﹗慢慢睇,慢慢揀。」

大陸貨 淘寶有售


打扮有如日本妹的 Yuki是千之屋的熟客,今天來買收納箱:「價錢幾平,個款又得意,買咗八個俾自己同朋友。」 

店名及營運模式抄足日本,但貨品清一色是大陸貨。「日本三一五円店賣嘅都係大陸貨,唔係邊有咁平?」負責入貨的 Andy指,日本雜貨店貨品的標籤上有內地廠家的資料,「我哋再聯絡廠家,睇吓有無貨尾,一係食人哋嘅貨尾,一係搭啲大單生產多百幾件。」記者根據一個玻璃糖果盤包裝盒上的電話,致電內地的生產商,但該廠的負責人指貨物從未出口至日本。對此, Andy解釋:「我確實喺日本見過呢款糖果盤,可能佢哋係同批發攞貨,唔係廠。」

 


收納箱是千之屋最好賣的貨物, Andy解釋:「香港地方細,屋企多雜物,而且客人通常覺得大件抵買啲。」 

內地淘寶網風行,不少千之屋熱賣的貨品,如收納箱及各式形狀的玻璃糖果盤,記者都能在淘寶上找到,但仍引來不少後生女幫襯。買了一套調味樽連木架的顧客李小姐表示:「三十五蚊好抵!我有玩開淘寶,呢度有現貨睇,見到啱用就買好方便。」客人嚴小姐亦清楚貨品是大陸貨:「價錢係比淘寶貴,但計埋運費同匯率就差唔多。」
講到淘寶這個競爭對手, Andy有備而來道:「淘寶係有得賣,但我呢度有現貨睇,可以即刻買,唔怕顏色、質地貨不對辦。有啲客淨係買一、兩件,價錢雖然係淘寶平啲,但計埋運費仲貴咗。」以熱賣的 DIY相冊為例,淘寶售約十元人民幣,但單件運費要三十元,總共四十元人民幣,即約五十港元。另外,做時裝生意已八年的 Andy,亦睇中部分顧客仍不喜歡網購,「好多客試過上網買衫,但成日有啲唔開心嘅經驗,最後都係返來幫襯我。」

低估難度做到喊

Andy和 Moon最初以為雜貨店的成本低,怎知投資額達八十萬。「同樣大小嘅時裝店,四十萬已經搞掂。雜貨店款式太多,每樣貨量唔多,拉高咗成本。另外,裝修要有日本 feel,亦唔可以求其。」 Andy指,所花的心力亦遠超估計:「時裝店開張前,半晚時間就可以執好啲貨。但呢檔嘢我哋十個人一共花咗三日兩夜,先可以執好啲貨!」一旁的 Moon接着道:「我當時坐緊月,都要去幫手。一百箱共成萬件貨,要執吓個樣,再獨立包裝同貼標籤,嗰三日兩夜真係好恐怖,做到我喊,最後仲發燒。」
另外,有些貨因為是貨尾,賣完就沒有,要再找新貨,所以 Andy每晚都黐住電腦,向不同的廠商要貨、追貨,他表示:「每次去日本都會影成千張產品相,再逐間廠打去問有無貨尾。所以供應商有成百間,散布喺全國各地。」因此,運輸成本甚高。 Moon搶着說:「第一個月嘅運輸費成四萬蚊,嚇咗一跳!」 Alan指,到貨時間極難預測。「啲廠出貨慢,加上查關時間唔定,好易有延誤。一星期返一次貨,返唔切就無嘢賣。最近成日落雨,一早訂咗批雨遮,原定上星期一到貨,最後遲咗兩日,好在仲未轉天氣。」


星期六下午是荃灣新之城最旺的時段,不少客人被千之屋的叫賣聲吸引,湧進店中,門口的雨傘最受歡迎。 

浮雕餐具是五大熱賣貨品之一。店內熱賣產品會打散放置於不同的貨架,吸引客人看其他毛利較高的貨品。 

叫賣手法犯眾憎

鋪頭一開,即成為荃灣新之城商場的「新星」, Andy招積道:「由開張第一日開始,爆足咁多日,好難想像新之城可以多人成咁!」不過,亦因此惹來不少投訴。商場走廊狹窄,對面鋪的老闆十分不滿千之屋「年宵式」的叫賣。「一日到黑係咁叫,個老闆娘把聲真係好響,搞到我同個客都講錯三十五蚊!」在千之屋對面賣童裝的黃小姐呻道。但 Moon卻直指無聊, Andy則說:「我收過無數投訴電話,租務部都有同我講過唔好咁嘈,但佢哋又唔諗吓我帶旺咗呢條走廊嘅人流。」
但這種方法亦令他們難以請人。「員工要不停叫賣,加上鋪頭每星期都要換大量嘅貨,好辛苦,所以好難請人。」 Moon續說:「有啲女仔做咗幾日就頂唔順,我哋出到高於市價嘅四十五蚊時薪,但好多女仔寧願搵少啲,去做時裝店 sale輕鬆啲。」葵涌廣場分店預計五月開張,店鋪急於請人, Moon惟有調動荃灣店的員工到新店工作。 Andy雄心壯志道:「荃灣主要係街坊客,葵涌廣場就咩區嘅人都有,係戰略重地,對提升知名度同散貨好有幫助。依家隔籬嘅鋪投訴我,但葵涌店就正正喺我自己間時裝店隔籬,可以用盡啲人流!」


裝有鏡片的水樽十分受歡迎。 


Andy和 Moon的女兒已五個月大, Andy晚上既要幫手湊女,亦要忙着發電郵與內地工廠聯繫。

開業資料( 12/12)

入貨:$300,000
裝修:$200,000
按金*:$160,000
雜費#:$140,000
總開支:$800,000
*三個月按金一個月上期
#連流動資金

營業資料( 03/13)

營業額:$350,000
人工^:$70,000
雜費:$15,000
入貨:$160,000
租金:$40,000
盈利:$65,000
^包括三位老闆,四個全職及三個兼職

一點意見


Nicole LawBlogger,淘齡三年,經常在 Blog中分享淘寶心得,由飾物、家中雜貨到傢具,都購自淘寶。 

Nicole到千之屋看過後,指不少貨都在淘寶網見過或買過,但身為用家,她指千之屋仍有賣點,並提出以下意見:
1.老闆選貨甚有品味,但陳列時無分類,令人感覺雜亂。
2.定價合理。在人民幣升值下,如果能保持劃一三十五元的話,仍然有吸引力。
3.雖是淘寶粉絲, Nicole坦言在網上看圖購物很容易會貨不對辦,令好多人卻步。即使是她,也覺得有些貨品一定要有實物才會安心購買,尤其是食具。


撰文:黎俊鍵
攝影:陳浩樂

arrow
arrow
    全站熱搜

    tvb4life 發表在 痞客邦 留言(0) 人氣()