幾時上我屋企裝寬頻先？（設計對白）
呢期我主打蛋糕同入油喎！（設計對白）
就算陳豪未有新劇出，晚晚打開電視都見到佢代言嘅廣告，呢身入油 look，街坊見到不知幾開心。
同你吟一吟
陳豪街坊至愛
身為無綫首席小生，陳豪賣點係親民，所以由佢代言嘅廣告，全部入屋，都係普羅大眾必需品，試諗吓，陳豪沖咖啡俾你飲，著住制服上你屋企裝寬頻喎，幾筍呀。
上星期六（三月十六日）陳豪又出巡，繼續玩 cosplay，去北角油站扮入油員送油券。免費入油都係等閒事，最重要係可以同陳豪握手合照零距離接觸，大人細路有車冇車，都要走入油站𥄫𥄫。
多得男友人氣帶挈，近年陳茵媺嘅豪嫂形象亦逐步入屋，但礙於性格唔及男友咁開朗，莫講話落區唔及陳豪咁受歡迎，開工拍劇，同拍檔一樣冇兩句。
早排豪嫂去到屯門一間餐廳拍攝新劇《單戀雙城》，劇中佢同「旅遊王子」兼男主角洪永城係一對，戲內表現甜蜜，但戲外兩個一句偈都冇傾。
陳茵媺做獨家村，洪永城就埋林夏薇堆，雖然林堂妹同樣名花有主，但都好過開工焗口臭吖！
得高層余詠珊力撐，洪永城過檔無綫即刻有得拍劇做男主角，可惜豪嫂唔多理佢，唯有搵林夏薇解悶。
劇情講飾演甜品師傅嘅洪永城，親手炮製甜品俾女友歎，陳茵媺鏡頭前笑到冧，轉個頭就做獨家村，坐埋一邊睇 playback。
全站熱搜
留言列表
