面對面
胖我走天涯 龍小菌
去年 4月 27日，戴着面具在旺角行人專用區第一次現身，整整 14個月，換了六個版本的面具，唱了一共 24場街頭音樂會，今年 6月 22日，龍小菌終於除罩了。
終於選擇在這一天除罩，龍小菌說：「革命尚未成功，不過想滿足個失聰歌迷心願，同埋實在對身體唔好。」
個罩由業餘朋友手造，沒有經過荷里活特技大師用合乎人體科學材質度身訂做，小菌說，朋友建議最多戴 45分鐘，現實每次表演起碼三至六個鐘，結果輕則狂標汗、缺乏新鮮空氣；重則患過肺炎甚至在台後暈過幾次，為免真樣曝光，每次還是要冒着生命危險，連人帶罩被抬離現場才能醫治。
攞苦嚟辛 14個月，都是因為一個唱歌夢。
原名蔡小欣的龍小菌原本 250磅，中二開始參加無數歌唱比賽，聽過無數次勸阻：「你減咗肥先嚟唱啦……」於是把心一橫去幹一場抗衡社會以貌取人的革命。
這場革命證明了甚麼？龍小菌也承認我說的，要是面罩以下是一副 250磅的身軀，有遐想的歌迷傳媒一定所剩無幾；要不是化了妝還算養眼，除罩後張自拍相不可能秒殺 2萬個 like；一日戴着面罩、一日入不敷支，哪會像現在一樣婚紗護膚代言廣告不斷敲門……不過我還是真心佩服眼前這個高大清秀字字鏗鏘曾經的胖小孩，穿起制服戴上面罩做了一件前無古人的大事，感覺就像是電影裏常有、但現實中卻極度缺乏的超級英雄。
瘦身男女
見到龍小菌，我不得不問，她和一直有傳是緋聞男友的經理人邵子風到底是不是男女朋友。手舉幹革命的旗幟，龍小菌的答案卻非常行貨：「呢一刻事業為重，我哋兩個係戰友，我身邊仲有好多好多不計酬勞同我一齊完成呢件事嘅戰友。」
話雖如此，我聽到關於邵子風和龍小菌的故事，卻是活脫脫的現實中的《瘦身男女》：邵子風幾年前與龍小菌在歌唱比賽認識，當時男的 190磅、女的 250磅；邵子風對龍小菌說的第一句話是：「減咗肥先至唱歌啦！」，於是兩個人一起減肥、一起又肥又瘦磅數上上落落；龍小菌說一定要唱歌，邵子風就找來兩個木箱油上顏色，幫她打造屬於自己的舞台；龍小菌說想要出碟，邵子風為她舉辦街頭演唱會，在台下放個盒子籌募「碟花」；病了、暈了，是邵子風抬走她求醫，被毒男在網上攻擊，小菌眼不見為乾淨，邵子風卻訂閱了關鍵詞「龍小菌」，如數家珍告訴我討論區今天有甚麼新帖、最多留言高達 4千 7百多個還在遞增中……同一個問題，我先問邵子風，他左顧右盼猶猶豫豫：「你都係問番佢好啲，呢個問題，我點答都死。」
我問龍小菌，不論肥瘦都在你身邊為你完成夢想，為甚麼不是情侶？談過兩次戀愛，目前自稱單身的龍小菌說：「我哋冇嗰個感覺……所謂愛情，其實就係想搵到同我一齊追求夢想嘅人，我唔只搵到佢，身邊仲有好多朋友、同事不計酬勞陪我追夢，男同女都唔係一定要發展成男女朋友嘅。」
無論肥瘦貧富都有邵子風扶持，去年更被拍到十指緊扣，二人還是不肯承認情侶關係。
上週六（ 22日），龍小菌喊住以真面目演唱：「除罩呢幾日，舒服過頭，有啲唔慣。」
技蘭來了
唱歌以前，在教育學院畢業的龍小菌先在中學教了一年中文。教書和唱歌都是她從小的夢想，不過做了老師才發現，教學總是被教材牢牢框住，能改變的也最多是眼前三十多個學生，跟唱歌的影響力和滲透力無法比。
「我小三開始發胖，初中已經 250磅，身形係全校最大份，校服永遠都要訂造，仲好貴添，因為真係需要好大幅布。中學第一次同人講過，覺得高班有個師兄幾靚仔，當天就傳到佢耳邊。放學佢嗰級幾乎全級人圍住喺我課室出邊，依嘩鬼叫：『就係呢個肥婆啦……』；中二第一次參加歌唱比賽，一出場全場：『嘩……』然後有個人話：『震撼呀……』跟住個個笑晒……成長記憶中，我好多呢啲俾嘲笑聲包圍嘅畫面，我照樣去參加比賽，繼續唱歌，但係我一直都覺得唔公平，肥都可以有感覺、有愛好嘅！呢個世界，有冇一個地方係可以淨係聽聲唔睇樣嘅呢？」
於是，當遇到邵子風，龍小菌還是逐步實現夢的計劃。面雖蒙，肥照減，咪又係矛盾？
「我減肥係為健康，係想做一個負責任嘅女兒，最肥時，我周身係病、關節因為長期負荷過重而痛、一路行一路喘、瞓覺又有睡眠窒息，我減肥，係因為媽咪叫我唔好再放任，唔想白頭人送黑頭人。」
話雖如此，龍小菌還是直到減了大半肥才走上街頭；雖然在街頭靠掌聲累積了不少歌迷，龍小菌演出邀約還是極少，因為面罩似紙紮常被指唔老黎；除罩後個樣睇得吓，數日之間便收到無數商業演出及代言邀約問價，出道一年，總算有機會賺到錢：「係矛盾㗎，我做呢件事嘅原意係希望人哋唔好以貌取人，但事實上，冇樣睇就冇工開，除咗罩後，即刻有讚有彈，留言好多係講樣講身材。最終，呢個社會都係唔容許瑕疵……但係呢一年，我的確用聲音儲咗一班歌迷，雖然只係一年，為咗自己呢個小小願望開始過、堅持過，我已經覺得無悔。」
27萬原來都未夠出碟，餘下由前經理人吳君祥（吳君如胞弟）包底，不過二人合作關係至今年初告終。
17場街頭演唱會，歌迷有心會留在盒內 100大元「碟花」預購龍小菌專輯， 14個月共籌得 27萬 9千碟花。
去年暑假參加台灣貢寮海洋音樂節，綵排加演唱蒙罩半日，結果焗到暈倒被抬走。
終身學習
外界一直以為，只聽聲不見人、戴罩唱歌是邵子風一手策劃的歌手宣傳策略，邵子風指正，「龍小菌」計劃從頭到尾都是龍小菌本人說了算。龍小菌則說，自己獨立、果斷的性格，和成長息息相關。
「我為食，係因為屋企四個女，我排行第四，個個都縱我、個個都錫我啫；我獨立、堅強，就喺媽咪身上學返嚟，我幾歲大，爹哋就為咗第二頭住家拋棄我哋，媽咪一個女人，一個字都唔識，洗碗掃地做最低下嘅工作養大我哋四姊妹。好多人都覺得難以置信，問佢點做到。媽咪用行動話畀我哋聽，就係信念咁簡單，想做就可以做到。」
父親離家以後，從此對小菌母女五人切斷經濟和情感的所有聯繫，至「死」不相往來：「直到舊年五月，有人通知我哋，爹哋癌症過咗身，我哋至去喪禮送佢最後一程。好細個時，我都會羨慕人哋有爸爸錫，但我好快就話畀自己聽，嬲又好、羨慕都好，爹哋又唔會返嚟，我以為去到喪禮自己會無動於衷……原來唔係，一樣喊到崩潰。嗰一刻，覺得人生好無奈，點解我哋有咁深嘅緣分可以做到父女，但係又無以為繼冇人哋父女之間嘅情誼呢……但係人生就係咁，每一段經歷就係一個課程，冇呢段經歷，我哋幾姊妹同媽咪唔會咁團結咁堅強，我就唔會係𠵱家嘅龍小菌。」
三年級開始暴肥，整個成長階段去到邊被人笑到邊：「減肥唔係為唱歌，係為健康。」
年齡亦是龍小菌秘密，照計教育學院畢業後教過 1年書，現時應該未過 25。
罩已除，然後呢？
訪問以前，邵子風先旨聲明，準備衣服不得冇袖，因為小菌的減肥大業還欠手臂。
訪問期間，不肯透露年齡和現在體重的龍小菌，一直說自己不算瘦，尤其雙腿，粗壯結實。
其實平心而論，在街上見到龍小菌，會覺得她是個身形適中、高䠷漂亮的女生，只是那把審美的尺子放到藝人、歌手身上，就會扭曲變質。
原意是抗衡以貌取人，最終還是用了兩年時間減肥、慢慢改變自己來達到所謂標準，龍小菌還是說自己不會變！我告訴她，人人都會變，不得不變。
撰文：朱小博
攝影：范仲良
髮型： Lobo Chung@Chin. G
化妝： Gigi Chu
服裝： bread n butter
場地提供：心燒食堂
留言列表
