現年三十三歲的林峯情陷十九歲的吳千語，女方要乜送乜，拍拖近一年已燒銀紙過千萬，但仍七度高呼愛千語BB。愛到發晒狂的他，早前透露「鍾意小朋友和家庭生活」，上月更帶BB出席細佬美國的畢業禮，順道見家長，事後二人還買戒指定情。打得火熱的他們，日前到中環開餐，席間男方公然摸千語BB肚皮，孕味十足。

出身大戶的林峯，其父是「廈門李嘉誠」林華國，林家娶新抱，絕對要夠體面。故林家上下專誠來港為婚事奔走，已定好於家鄉豪擺百圍，更邀得第十六世大寶法王根本上師、秋吉尼瑪寧波車主持證婚，相當巴閉。

林峯和千語BB拍拖高調，日前二人撐枱腳後，林峯全程呵護孕味甚重的千語離開。

返港陪女

「峯語戀」打得火熱，拍拖未夠一年，已多番傳出婚訊。原定在橫店拍攝nowTV新劇《大漢賢后衞子夫》的林峯，即趁空檔返港會千語BB，一解相思之苦。日前晚上，二人戴住在美國買的定情戒指跟友人到中環開餐，公然摸手攬腰錫頭髮纏綿，情到濃時，千語BB竟出奇地摸肚跟林峯咬耳仔，林亦溫柔地摸她肚皮，一臉幸福。飯後，他還拖着孕味千語轉場到朋友家，見多幾面。

已屆適婚之齡的林峯，雖然事業正處於高峰，但甘願為BB放棄江山，他更透露有意結婚︰「我都三字頭！每個男人都會有呢個諗法，我冇偶像包袱。」至於由「屋邨妹」升呢至今時今日周身名牌、住豪宅的千語BB，年紀輕輕便釣得金龜婿，當然咬實唔放，一方面向外冧爆男友謂︰「拍拖梗係視佢為結婚對象。」另一方面又自爆夢想婚禮是在陽光與海灘上舉行，明顯向男友作暗示。

將首度娶新抱的林父，日前帶同女兒林蔚殷與寧波車會面，商討林峯婚禮證婚、擇日事宜。