FACEweekly
「 GIN」性情 Gin Lee
去過台灣《超級偶像》及香港《超級巨聲 2》表演，唱得夠勁始冒人氣，由馬來西亞衝入香港，華裔女歌手 Gin Lee（李幸倪）上年一首〈今天終於一人回家〉人人識哼幾句！
今 8月推出新碟，先翻唱經典男神陳百強的〈偏偏喜歡你〉，但唱得以外，究竟你仲認識 Gin Lee有幾多？
今日一於由她親自講自己在香港生活近 3年的喜、怒、哀、樂。
早前 Gin就同朋友行西貢，仲話好多地方都想 explore，有次試過自己搭港鐵去沙田睇吓有乜好行。
中學係 100米短跑代表，每朝 8點跑樓梯、負重訓練到夜晚 8點，除了體力更磨練意志力，加上唔輸得精神造就任何事也不要放棄，就好似唱歌咁，唔可以因一時睇唔到成績而放棄。不過跑得太勁而神經勞損被迫放棄，𠵱家放假就會約朋友行吓山；又或者屋企做 resistance bands橡筋訓練，出一身汗好舒服！
怒 最留戀馬來咖喱
我一肚餓就會忟憎，但又唔可以係咁食，會肥㗎嘛！所以我 keep住一日多餐， 2個鐘食一次，不過屋企人由細到大都教落要食得乾淨同健康，縱使「掃街」好吸引都未試過。自己係馬來人，好鍾意食咖喱，但香港的印度咖喱都偏甜，好在媽咪一年會來兩次，每次我都嗲佢煮馬來西亞咖喱畀我，連埋椰漿飯食，超 sweet！
Gin除左最鍾意食媽咪整的馬來西亞咖喱，更鍾意飲港式奶茶，不過又愛又恨，因為腸胃一掂奶即肚瀉。
哀 睇愛情戲必喊
香港除了行山，有時間就會去睇戲，不過有個弱點，就係睇愛情片都喊，最近睇《大亨小傳》，因為戲中 Gatsby（ Leonardo DiCaprio飾）為見舊情人在所不計，喊死！另外一套係法國片《愛》，講一對老夫妻因病痛也不願離棄對方，喊足成場！講到喊之經典，必數發哥套'89《阿郎的故事》，計過睇足廿次，喊足廿次！
Gin之前睇《大亨小傳》喊，仲要自拍自己喊樣，學晒香港女生喊都要自拍，夠地道喎。
樂 行得慢都要唱
冇一個行業唔辛苦，但在職業上找到自己鍾意是福氣。在香港樂壇，要突圍好多時也要靠唱歌以外的，好在公司知道我在行唱，冇安排我去好多 event、拍戲咁。我情願自己條路行得慢啲，都唔想唔唱歌！所以現在可以喺香港推出第 3隻大碟，真係一個 blessing，來臨最想就係出國語碟，始終係母語嘛！
撰文：陳家豪
攝影：吳偉業
化妝： Krisie Wong
髮型： Eve Chiu@Queen's Private i Salon
服裝： 2%、 Dearbell
留言列表
