新車激試

法國雄獅再怒吼　 Peugeot 208 GTi

呢個，係一個 hot hatch嘅年代！
半年內，到港嘅揭背小跑車近 10款。
品牌由豪極德國 M-Benz到新興韓國 Hyundai，市場已經由高性能愛好者，擴展到大眾化代步用家。
連沉寂已久嘅法國品牌，亦期望藉此翻身！
搶先登場嘅有十幾年前紅極一時嘅 Peugeot 208 GTi，且看能否如當年 206 GTi般再創高峰！

最型係由車窗底伸到去 C柱嘅電鍍邊，加上火紅 Gti徽章，復刻番元祖 205 GTi設計。 

又係想當年嘅時候，上次 Peugeot大熱，已經係 2000年嘅事，本身 306 GTi已經堅到喺香港創出「彎路之王」呢個勁朵，再加部意大行 Pininfarina設計嘅公子跑車 406 Coupe，令 Peugeot個形象升至十幾樓咁高，突然殺出一部只賣十幾萬嘅 206， 1.4普通版有當時罕見嘅天幕頂、 GTi勁版開創當時未興嘅歐洲 hot hatch市場、 CC開篷版更加玩到當時 M-Benz SLK先有嘅電摺硬頂，成為香港史上最好賣嘅法國車系！可惜 07年一轉款， 207 GTi就賣貴 10萬，$259,900車價傳聞賣出唔夠 10部，一手搞死法國車！不過，事隔 6年，大升級嘅新一代 208 GTi竟然只係貴咗 1萬蚊，$269,900有交易，上兩星期擺一次車展已經賣出十幾部，可見只要價錢合理，品牌同車款仍然非常有叫座力！唔信？問吓仲揸緊 206 GTi嘅法國車改裝專家同法國車會會員咪知囉！

靚到嚇你一跳

就算係車迷，相信都有 10年冇留意過 Peugeot車，印象仍然停留喺 206嘅年代。但一轉個頭睇 208 GTi，肯定會覺得靚到嚇親！全新家族式設計用六角形大口鬼面罩，車頭大獅子徽章再冇框框住搬咗上頭冚，夠晒新鮮感。超立體頭尾燈更潮到用 LED光條，科幻味仲勁過 Audi！法國車最耍家嘅精緻設計更加冧死人，細心睇鬼面罩扮晒賽車衝線格仔旗嘅粒粒格紋原來係 3D咁凸出嚟，車側窗底電鍍邊仲伸到去 C柱有個 GTi徽章，連套軨都玩 two-tone！
不過，咁都咪讚出口先，因為打開車門，你直頭會「嘩！」一聲叫出嚟！試問，你點諗到 Peugeot車仔中控台同門板會用到紅色縫線皮革同 touch screen機頭咁誇先？再追住望，平底賽車軚盤科幻到好似 concept car、對 3D剪裁桶 seat又玩到半皮半纖維、中間有大 mon嘅表板唔只有紅色 LED燈條圍住，轉數同速度表底仲有金屬格仔暗紋！連中控台裝飾都唔只 high到用鋼琴黑，仲玩到紅黑漸變！呢部邊係我哋印象中嘅 Peugeot嚟㗎？直頭靚到 M-Benz A仔咁啦！所以，之前車展啲客咪未試車都已經扑鎚賣咗十幾部囉！

不規則頭燈除有上面一條 LED日光燈，仲有一條 C字形 LED指揮燈。 

側鏡上半部加咗電鍍部分，側邊又有指揮燈，形象 high晒！ 

設計勁複雜嘅 17吋軨玩銀黑 two-tone超型，仲要連 brake卡鉗都噴埋火紅色。 

超型尾喉用孖方喉咀，連尾泵把底黑膠擾流都加埋電鍍邊。 

一個神話的開端 Peugeot 205 Turbo 16

1983年 Peugeot喺迷你揭背車 105同家庭揭背車 305之間，追加一個中間 size嘅揭背車系 205，本來只係得 51匹嘅代步車，但因為車架同懸掛設計得太堅， 84年就追加 GTi勁版，配上 128匹 1.9公升引擎，當年被權威《 CAR Magazine》選為世紀好車！而且廠方亦大力狂谷 205去鬥 B組世界拉力賽， 205 Turbo 16終極版癲到將 1.8公升 turbo引擎改到 424匹，再從車頭搬去後座，變成中置引擎四驅車，成功將 205車系推上神枱！

為合乎參賽資格，廠方限量生產咗 200部 205 Turbo 16街車版，而賽車版喺 85、 86年亦贏晒 WRC車廠同車手總冠軍。 


19年之後，今年 Peugeot再次為 208開發出 T16 Pikes Peak癲版，準備參加今年嘅 Pikes Peak International Hill Climb美國山路賽， turbo引擎改到成 875匹，一樣搬去車尾變中置引擎四驅車，但應該冇可能量產嘞！

車迷講嘢：「隻獅子搬咗位，唔係咁習慣！」

唔只筆者覺得 208 GTi個 look掂，香港法國車會會員 Sky一樣咁話：「 208 GTi個樣直頭唔同晒啦！個 class完全升咗幾個 grade，以前成車黑膠，𠵱家用晒 LED同加咗好多電鍍嘢，貴氣好多。不過由我認識 Peugeot以嚟，車頭隻獅子就係有個電鍍框框住放喺鬼面罩，𠵱家冇咗個框又搬咗去頭冚，唔係咁習慣！」

香港法國車會會員 Sky 

其實冇框獅子 logo擺頭冚呢個係 Peugeot上年先開始用嘅全新家族式設計，唔只 208 GTi， RCZ facelift版、最新一代 308同 4008全新 SUV，以至之後幾年嘅車款都會係咁樣。 

棍波易揸到暈

不過事實係手波車只係聽落好似好 hardcore，其實 208 GTi一啲都唔難揸。最基本係以前校極都校唔啱嘅法國車手長腳短司機位設定，喺 208 GTi身上已經完全改善，軚盤高低、前後同座椅高低調校幅度，都比以前大好多，亞洲人身形都可調校到舒服駕駛位置。而且以前超長嘅波棍行程都大幅縮短至日本手波車程度，檔位仲要超級實在清晰，極力子超輕，腳踏之間空隙加大咗，今代改用電軚後又輕咗少少。簡單講其實同學車時嘅手波 Yaris一樣咁易揸，就係攔到你班「冇術」嘅自動波牌仔之嘛！

6速手波波箱行程短咗好多，檔位仲好實在，無論 3波上 4波，定 5波落 4波，唔使睇，一啪落波棍就入到！ 

波棍頭都用咗金屬色配火紅裝飾，大細啱啱好，好揸！ 

金屬防跣腳踏唔只有型，仲比以前分得開， brake同油門踏板角度亦容易做「踭趾」。

不過事實係手波車只係聽落好似好 hardcore，其實 208 GTi一啲都唔難揸。最基本係以前校極都校唔啱嘅法國車手長腳短司機位設定，喺 208 GTi身上已經完全改善，軚盤高低、前後同座椅高低調校幅度，都比以前大好多，亞洲人身形都可調校到舒服駕駛位置。而且以前超長嘅波棍行程都大幅縮短至日本手波車程度，檔位仲要超級實在清晰，極力子超輕，腳踏之間空隙加大咗，今代改用電軚後又輕咗少少。簡單講其實同學車時嘅手波 Yaris一樣咁易揸，就係攔到你班「冇術」嘅自動波牌仔之嘛！

凸起嘅 7吋 touch sreen幕屏有型，介面亦好 3D，可惜完全冇駕駛模式設定。 

中控台雖然係人造皮，但紅色縫線手工都好好，高級到直迫 M-Benz A仔！ 

平底軚盤唔只外形勁 racing，形狀亦勁好揸，而且細過一般跑車成個碼，衰在有少少遮表板。

200匹非常夠用

唔好攞車長 4m唔夠嘅 208 GTi同上期嘅 Golf GTI、 A250 Sport或 M135i比，因為 208 GTi根本細一個碼唔啱班，用嘅 1.6公升引擎亦比常見 hot hatch嘅 2.0公升偈低一級，價錢都平 5萬以上啦！但勁在一樣用上最新 turbo增壓技術，馬力仲谷到成 200匹！加上 1,152kg車身比大一個碼嘅 hot hatch輕 200kg以上，所以 0-100km/h加速 6.8秒，只係比最新嘅 Golf VII GTI慢 0.3秒，性能絕對唔講得笑！
實際揸落，你又會再一次對 Peugeot改觀。雖然上代 207 GTi已經改用 1.6 turbo引擎，但 175匹唔算好勁， turbo lag更頗為嚴重。不過今代 208 GTi唔只多咗 25匹，輸出特性亦唔同晒， turbo偈都線性到好似自然吸氣引擎咁之外， 28.1kgm最大扭力低至 1,700rpm已經爆晒出嚟！加速時 1,500rpm開始有力、 2,000rpm開始大力，就算你揸手波唔叻，唔慣成日快速拖波 keep轉數，都可以好易揸得快。而且波檔夠密，同引擎輸出夾得好，用到 6波行 100km/h都係約 2,300rpm，既喺最大扭力輸出範圍隨時夠力加速，又夠低轉慳油， 5.9L/100km耗油，$1/km油費有找，每公里比 2.0公升 hot hatch慳$0.1以上，確係抵養！

表板設計夠晒科幻，唔只有紅色 LED燈框，仲有格仔暗紋，中間個 mon又夠大。 

引擎艙有大大隻 turbo喺前面， 1.6公升引擎都谷到上 200匹， 3,000rpm已夠力上大斜路，而且難得夠靜夠定。 

專家激評：「冇軚感，但好強路面感！」

法國車改裝專家 TRINITY主理人 Billy 

208 GTi同以前大熱嘅 206 GTi已經係 2個時代嘅產物，仍然鍾愛 206 GTi直接操控感嘅車主，對大幅現代化嘅 208 GTi又點睇？等法國車改裝專家 Billy話你知！「今代 208 GTi開始改用電軚，冇軚感，但好強路面感！雖然唔係輕飄飄，但扭動時係少咗份質感，奇怪係佢又可以令你 feel到好多路面訊息，劈彎時嘅轉向反應仲快過傳統風油軚，可以感覺到部車嘅避震雖然高咗少少，但喺大帽山都好夠用，反而係張桶凳可以再低啲就好嘞！」

Peugeot 208 GTi Spec.

引擎： 1,598c.c.直四 turbo
馬力： 200hp/5,800rpm
扭力： 28.1kgm/1,700rpm
傳動： 6前速手波
車重： 1,160kg
車身： 3,962× 1,739× 1,460（ mm）
0-100km/h： 6.8秒
耗油： 5.9L/100km
查詢： Auto France HK（ 2834 4233）
$269,900

Peugeot 206 GTi Spec.

引擎： 1,997c.c.直四
馬力： 137hp/6,000rpm
扭力： 19.8kgm/4,100rpm
傳動： 5前速手波
車重： 1,152kg
車身： 3,835× 1,900× 1,430（ mm）
0-100km/h： 8.4秒
當年新車價：$145,000
現時易手價：$8,000-$16,000

全港歐洲 hot hatch價目表

Hot hatch都有分大中細碼，不過價錢同性能就絕對唔係同 size成正比，睇過下面現時所有香港有售嘅歐洲 hot hatch你就知 208 GTi性價比高！

Renault Twingo RS

$225,000 

車長： 3,687mm
引擎： 1,598c.c.直四
馬力： 133hp
0-100km/h： 8.7秒

Abarth 500

$269,000 

車長： 3,657mm
引擎： 1,368c.c.直四 turbo
馬力： 135bhp
0-100km/h： 7.9秒

VW Polo GTI

$269,800 

車長： 3,976mm
引擎： 1,390c.c.直四 twincharge
馬力： 180hp
0-100km/h： 6.9秒

Ford Focus ST

$299,900 

車長： 4,358mm
引擎： 1,999c.c.直四 turbo
馬力： 250ps/5,500rpm
0-100km/h： 6.5秒

VW Golf GTI

$349,880 

車長： 4,268mm
引擎： 1,984c.c.直四 turbo
馬力： 220ps
0-100km/h： 6.5秒

Alfa Romeo Giulietta

車長： 4,351mm
引擎： 1,368c.c.直四 turbo
馬力： 170bhp/5,500rpm
0-100km/h： 7.8秒

Audi A1 1.4 185bhp

$379,800 

車長： 3,954mm
引擎： 1,390c.c.直四 twincharge
馬力： 185bhp
0-100km/h： 7秒

M-Benz A250 Sport

$399,000 

車長： 4,292mm
引擎： 1,911c.c.直四 turbo
馬力： 211ps/5,500rpm
0-100km/h： 6.6秒

BMW M135i

$545,000 

車長： 4,324mm
引擎： 2,979c.c直六 turbo
馬力： 320ps
0-100km/h： 4.9秒

MINI John Cooper Works GP

$549,000 

車長： 3,774mm
引擎： 1,598c.c.直四 turbo
馬力： 218hp
0-100km/h： 6.3秒

惟獨未夠兇狠

今代 208 GTi嘅車架剛性、懸掛韌度、操控反應等已經拍得住所有德國 hot hatch，可以造到慢揸舒服、快揸強勁呢個境界， ride quality已經高咗 206 GTi三班以上。除咗因為技術躍進，其實最緊要係放棄咗少少以前法國車劍走偏鋒嘅堅持，唔只係外觀設計人人都可以覺得靚，連操控設定都同世界接軌咗，人人都揸得掂。
今日嘅 208 GTi，快揸時你一樣可以 feel到入彎時「車尾會走」嘅傳統靈活特色，不過反應已經柔咗好多。而且因為引擎輸出太線性，出彎加速力度唔夠狠勁。當然，係比以前嘅法國 hot hatch易揸好多，實際速度亦真係快咗。但係喺感性上，就冇咗以前桀驁難馴、要同部車搏鬥嗰種挑戰性。總而言之，有咁嘅市場，先有咁嘅產品。今日嘅所謂 hardcore車迷，已經冇以前咁重口味。極少數仲係留喺重口味年代嘅車迷，玩番舊車啦！車廠都要搵食㗎！

三門設計後座都有 3個位，載 3個成人一定迫爆，但 2個男人坐，其實頭部同腳部都唔算好迫，只係座墊短咗啲。 

半皮半纖維紅黑桶 seat外形超兇狠，腰部包圍力亦真係堅，但其實座墊冇想像中咁硬，舒適性都幾高。 

專家激評：「出彎想盡雞加速嗰下，硬係好似爭少少！」

上代 207 GTi開始轉用 turbo引擎，今代 208 GTi可謂成熟，但揸開自然吸氣引擎 hot hatch嘅車迷又 like唔 like？ Billy：「用 turbo偈已經係大趨勢， 208 GTi副偈 power band真係好闊，完全唔使踩高轉都好好力，平均嚟講隻隻彎都快好多。唯一缺點係少咗份爆炸力，就算踩高轉都唔會好爆，出彎想盡雞加速嗰下，硬係好似爭少少！感覺上部車仲係 under power。」不過 Billy話𠵱家啲 turbo車想增馬就易搞好多，只要換塊電腦 chips， 6、 7千蚊已經可以多幾十匹，想佢爆啲容乜易！

宿敵年中火併 Renault Clio RS200 EDC

由 206 GTi時代開始， Renault嘅 Clio RS已經係宿敵。最新嘅 208 GTi剛到港，同樣係最新嘅第 3代 Clio RS200 EDC就算未有貨，代理已經事先講到明年中會返，希望 hold得住啲客！
事賽上， Clio RS200 EDC亦擺明對着幹，由用開嘅 2.0公升自然吸氣引擎，突然改用 1.6公升 turbo偈，仲要同 208 GTi一樣係 200匹！但 Renault就威在有鬥 F1，副偈用咗好多 F1技術， 0-100km/h加速 6.7秒亦啱啱比 208 GTi快 0.1秒！不過最致命都係 Clio RS200 EDC唔只有 5門版，仲有最新 6速 EDC雙離合器自動波箱揀，唔再一味只得手波。更勁係加咗好多高科技花臣嘢，既有一㩒就會跳到作戰模式嘅 R.S. Drive掣，又有 R.S. Diff電子差速，連排氣聲都有 11種你揀，可以喺音響發出，唔只有 Renault經典 Alpine A110聲，連同集團 GT-R把聲都有得揀，問係死未！

撰文：陳致新
攝影：葉偉豪