無綫花旦鍾嘉欣（嘉欣BB）與武打影星伍允龍的緋聞傳足六年，至去年年尾盛傳男方夜夜笙歌，兼秘密為黃婉佩（Race）搞生日派對，而導致分手收場。不過，回復單身的嘉欣BB，貴為宅男女神，自然不愁寂寞。

去年，嘉欣BB夥拍新晉靚仔小生陳智燊（Jason）拍攝無綫劇集《幸福摩天輪》後，過從甚密，有指兩人鏡頭前攬出愛火花，鏡頭後再續前緣，不時相約飯敍見面，陳智燊更充當護花司機管接管送。

本刊收到消息指兩人已撻着近半年，日前更拍得陳智燊接載嘉欣BB返回將軍澳新都城的香閨，兩人於車廂內甜笑談心，下車後驚見記者即時尷尬傻笑兼面紅耳赤。

被本刊撞破私會的鍾嘉欣與陳智燊，有默契地強顏歡笑，裝作鎮定，但嘉欣BB面紅耳赤的不尋常表現，已經出賣了兩人的親密關係。

戲假情真

○四年華裔小姐冠軍鍾嘉欣（嘉欣BB），憑着清純親民外形，瞬即成為無綫花旦，演技備受認同之餘，其對感情的專一更是有目共睹。自○七年與武打影星伍允龍合作拍攝電影《十分愛》撻着後，鍾嘉欣便謝絕其他異性埋身，人前人後大讚男友又乖又好打。可惜，隨着去年年尾伍允龍盛傳為黃婉佩（Race）搞生日派對、有影皆雙之後，兩人的分手傳聞此起彼落，感情不進反退。

據悉，鍾嘉欣與伍允龍的戀情一直不獲無綫支持，意興闌珊的她，於去年接拍劇集《幸福摩天輪》時，幸得劇組人員扶持慰藉，尤與靚仔新晉小生陳智燊（Jason）志趣相投，默契漸生，在拍攝初期已成為密友。據劇組人員透露，兩人於片場內不時並肩而坐，時而商談劇本內容，時而喁喁細語談笑風生，「佢哋兩個都喺外國長大，所以特別啱傾！一個靚仔，一個靚女，自然容易行埋。Jason成日o氹到嘉欣BB笑瞇瞇o架，我哋睇見都知發生緊咩嘢事啦！」

早前，本刊拍得鍾嘉欣與陳智燊單獨約會，男方更出動四十萬的雷諾座駕與嘉欣BB遊車河，而從車廂的倒後鏡中可見，男方甜笑着談心，表情冧爆（小圖）。

由陳智燊接載返回將軍澳新都城香閨的鍾嘉欣，下車後發現記者追蹤，即時尷尬傻笑，左手更不知所措地放到腦後。